Read Tase Naga EZRA 8 Bible Online

EZRA 8 - Tase Naga bible

EZRA 8

¹Vruex kuex honoc Artazeze pat nuex Babelon nuex thuq lvy rvhumc vtueq Ezra rulc vdvmz Yerusalem nuex yek waung tueq vtaungx waruiuz htenc wawc vkhux yaungc jix hez muingc wvlc rvtueq:

²Phineha taungx wawc Gershom Ethamar taungx wawc Daniel Dawid taungx wawc Shekania saz Hattusha Parosh taungx wawc Zecharia rulc piq taungx wawc miqwaz 150 (kvruex hez kuex tsuingshiq jix vwaz muingc wvlc nuex lomx yaq.) Pahat Moab taungx wawc Zerahia saz Eliehoenai rulc miqwaz 200 Zattu taungx wawc Jahaziel saz Shekania rulc miqwaz 300 Adin taungx wawc Yonathan saz Ebed rulc miqwaz 50 Elam taungx wawc Athalia saz Jeshaia rulc miqwaz 70 Shephatia taungx wawc Michael saz Zebadia rulc miqwaz 80 Joab taungx wawc Jehiel saz Obadia rulc miqwaz 218 Bani taungx wawc Josiphia saz Shelomit rulc miqwaz 160 Bebai taungx wawc Bebai saz Zecharia rulc miqwaz 28 Azgad taungx wawc Hakkatan saz Yohanan rulc miqwaz 110 Adonikam taungx wawc Eliphelet, Jeuel, nuiyc Shemaia rulc miqwaz 60 (tsuinghez kuex yix nuex phvnc lvy naungc jix hez rvtueq.) Bigwai taungx wawc Uthai nuiyc Zakur rulc miqwaz 70.

¹⁵Ngaz rueq miq htenc kuex Ahawa ghaq nuex kaz yaq yuix warc hep nuex tvrvtuimx vtueq, kvruex baung kvyuq nuiyq thuimx jerak tec httax tiq. Kvruex miq phungc kvyuq shomc waz bix lomx ruiux muinz, Lewi miqsaz kuex lomx muq.

¹⁶Ngaz rueq walaungx bix waz tvkuiuz kuex tvkaz tauk, Eliezer, Ariel, Shemaia, Elnathan, Jarib, Elnathan, Nathan, Zecharia, Meshulam hez nuiyc tvluingc waz wanueyc rvtueq Joiarib nuiyc Elnathan rvtueq.

¹⁷Ngaz rueq tsuinghez kuex Kasiphia ghaq nuex httax yaq phungc wawc walaungx Eddo kox nuex tvkaz vtueq, Eddo nuiyc piq kung vkamz shomc yuimx yauk shuimc jix hez kuex Shomc Yuimx nuex Tishox yauk shuimc shuimc jix miqsaz htenc ngoz kox nuex tvkay kuy tvkoc tvtay jungx tauk.

¹⁸Tsuingshiq muinz Tishox kejux maq Mali taungx wawc Lewi phvnx wvhungc wvlaungc jix Sherebia kuex ngaz kox nuex tvkaz phuex. Vsahez nuiyc vphuz vnox hez miq rokshiz rac tvjvt muinz vdvmz nuex kaz naungx tueq.

¹⁹Tsuingshiq kuex Merari taungx wawc Hashabia nuiyc Jeshaia hez rulc vdvmz tsuingshiq taungnyuing sanox waz 20 kvtauk tvkaz naungx tueq.

²⁰Kvdvyx muinz rvmuq Lewi miqsaz htenc muex romc lawc kuy tvkoc Hokhvmx Dawid nuiyc piq vyungx vlaungx bix rueq vjix vwaz pat maq raz tueq vtvhungx shec shomc yuimx yauk shuimc jix miq 220 muinz lomx kaz naungx tueq. Tsuinghez wvtaungx ruix kuex muingc wvlc nuex lomx wuez tueq.

²¹Naungshiq Tishox khaungkac nuex naungshiq lotlaz rueq phuiuz svy mamc vtueq miqmac shauk pumz tvyomx tvkoc muinz, naungshiq khuemc wvnc juing lvmx kuex shunshvlc kuy muex nuiyc naungshiq muinz naungshiq suiuz vsaz htenc muinz, naungshiq tsak vnyvmx htenc muinz tvkhup wungx kuy muex vpiq kox wawc thoz tvkoc tsuingshiq kuex Ahawa ruilx hep maq nvr tauk.

²²Naungshiq Tishox rueq vpiq muex kvmluimx jix miqsaz ruip rawx muex ruimrix kuq yaq, yuq muinz vpiq kox maq kvroz wvnc jix kuex raungc raq muq nuiyc murx tvgurc yaq ngoz tueq piq muex ngaz rueq jungx tauk, naungshiq khuemx wvnc tix lvmx nuex naungshiq kuex ralx yauk wawc tvkhup tvwungx kuy tvkoc mvre nolaungx phungc shiz honoc waz kox wawc thoz muex ngaz yvlc sac vtaungx.

²³Kvkhoc rvtueq naungshiq muex tvkhup wungx kuy tvkoc Tishox kox wawc phuiuz vsvy mamc vtueq vjux thoz wuez vshix, naungshiq vjux thoz bomc kuex vpiq rueq tay kuq yaq.

²⁴Shunshvlc jix shomc waz bix wawc Sherebia, Hashabia nuiyc vganc waz rokshiz kuex ngaz rueq thvl tauk.

²⁵Kvruex yimaq ngaz rueq Shomc Yuimx nuex yauk shuimc tvkoc, honoc waz nuiyc piq rulc rvjungc rv-phvnc walaungx bix, vyungx vlaungx bix nuiyc Israel miqsaz htenc rueq kuq tueq kuimshawx, kuimphox sawx nuiyc vshuimc vlvmc juing phvnx htenc kuex shenc vtueq, shomc waz bix kvmac kuq tauk.

²⁶Vruex kuex tsuingshiq muex ngaz rueq vkuq hup svmx htenc rvtueq: kuimphox sawx ton 22 kuimphox sawx hup vsvmx 100 kuimphox sawx kilogram 70 kuimshawx kilogram 3,400 kuimshawx pantuimz 20 - kilogram 8.4 kuimshawx pantuimz rulc vhtawz rv-ngvlc nvyrvyx pantuimz 2 rvtueq.

²⁸Ngaz rueq tsuingshiq muex ngoc, “Nuimshiq kuex Yehowa nuimshiq jix vwaz tamx Tishox tvkoc vsawc yaungx vtuinx ningkhvnc nuex, vsawc kuimphox sawx nuiyc kuimshawx hup vsvmx htenc lotlaz kuex vkuy roc shomc kuy juing htenc ikhoc vpiq kox nuex lvmz laq wuez shuinz.

²⁹Nuimhez rueq Shomc Yuimx nuex httuiuc waung vtueq, kvwawc shomc waz bix khok kvyuq kvruex htenc kuex shenc ruiux, shomc walaungx bix, Lewi miqsaz htenc nuiyc walaungx bix yauk nuex lekuq shuinx nuex httuiuc laz, kvruex htenc kuex honc lvmz hvt maq bvmc lawc wuez shuinz,” ngoz tueq jungx tueq.

³⁰Kvkhoc rvtueq shomc waz bix nuiyc Lewi miqsaz htenc rueq kuimshawx kuimphox sawx htenc nuiyc vshuimc vlvmc juing htenc kuex Yerusalem Shomc Yuimx nuex lvmc wvnc tvkoc shunshvlx shuimx lvmz tueq.

³¹Nuiyshiq kuex Yerusalem nuex waungc tvkoc Ahawa ruilx hep maq vphaungc yapix raungx 12 nuex kaz wvnc wuez tiq. Nuiyshiq Tishox kuex nuiyshiq rulc vdvmz httaz ningkhvnc nuex, nuiyshiq kaz wvnc koq tueq ralx guiuq maq khvt phuex wawc muinz nuiyshiq kuex tvkhup wungx kuq phuex.

³²Nuiyshiq kuex Yerusalem nuex httuiuc waung vtueq nuiyq thuimx tup nyec tvkuiyq guilc tiq.

³³Kvruex yimaq raungx bvlic vngoz raungnuiyq Shomc Yuimx nuex nuiyshiq kaz vtueq, kuimshawx kuimphox nuiyc vshuimc vlvmc juing phvnx htenc kuex shenc ruiux, Uria saz shomc waz Meremot yauk nuex kuq tiq. Phineha saz Eleazar nuiyc Lewi miqsaz waz nueyc rvtueq Jeshua saz Jozabad nuiyc Binnui saz Noadia hez muinz piq rulc vdvmz rvtueq.

³⁴Kvkaq dvyx hup vsvmx phvnx ruip saz kuex wvl shenc taq vtueq tvtsuingc wuiyq taq tiq.

³⁵Vthuq vruez laq wawc vyek waung hez lotlaz rueq Israel Tishox muex wvr maq jauk shomc nawk kuy muex shomc kuy juing htenc kuex lvmz laq wuez tueq. Tsuingshiq rueq Israel phvnx lotlaz tvkoc manx pung 12, khelbuenx pung 96, khelbuenx sahez 77 kuex shomc kuq wuez tueq. Tsuingshiq rueq mvrax wawc miqmac shauk pumz kuex tvsawc nawc tvkoc khelkhix 12 kvmuinz shomc kuq tueq. Kvruex nyvmx saz lotlaz kuex Yehowa tvkoc wvr maq jauk shomc nawk kuy juing muex tvyaungc vtueq shomc kuq tueq.

³⁶Tsuinghez kuex honoc waz rueq tsuingshiq muex kuq tueq vnvrc luik kuex lvmz ruiux, mungx walaungx bix nuiyc Euphrat maq Shalx nyuip kox mungx hong wawc vyungx vlaungx bix muex kuq koq tueq, tsuinghez kuex miqsaz htenc rulc shomc yuimx nuex nawk palx yauk shuimc htenc kuex romc kuq naungx tueq.