Read Tase Naga Esta 1 Bible Online

Esta 1 - Tase Naga bible

Esta 1

¹Hokhvmx Ahasuru rueq Persia mungx ghaqnyuiuz jungx Susa nuex httax yaq piq hokhvmx hoc nuex ngaungc vtueq, India mungx maq Ethiopi mungx nuex httuiuc laz mungx 127 kuex guimz tueq.

³Piq rueq guimz lawc tueq wawc thuimx vngoz nuex piq vyungx vlaungx bix nuiyc vshunc vshvlc jix hez lotlaz tvkoc phuiuz vsvy moalx yungx tvhungx kuq tueq. Persia nuiyc Media nolaungx phungc htenc muinz, vganc mungx hong mungx walaungx bix nuiyc vyungx vlaungx bix htenc waung wuez tueq.

⁴Piq rueq piq hoc wawc tsak vnyvmx htenc nuiyc muingjungc khushec htenc kuex yapix lex tvruk tvkhic tvlawc tueq.

⁵Kvruex yimaq hokhvmx waz rueq ghaqnyuiuz jungx Susa nuex httax yaq luiz waungx htemc saz lotlaz muex phuiuz svy moalx yungx tvhungx kuq tueq. Kvruex moalx kuex hokhvmx hoc wawc sunc nuex raungx mvshix tup moalx tueq.

⁶Kvruex hoc wangx kvyuq kuimphox kamx vpauk taq lungluiz htung htenc nuiyc khvymvnz vluiz vwuil vjuinc juing khvymvnz htenc kuex pasic nvm-yaz khvymvnz ruiuz maq khvrc vtueq tvmarc khak shec tueq. Chuing htenc kuex kuimshawx nuiyc kuimphox maq vtvhungx ruiux, lungluiz lungnyauk, lungshawx lungwuil vphawc shec tueq sunc wangx mungx nuex taq tueq.

⁷Hokhvmx waz rueq svpiq tix kuex kuimshawx kok htenc nuex htawc vtueq tvnuingc tueq, kvruex kok htenc kuex vshiz nuiyc vshiz rv-ngvlc muq, svpiq tix kuex hungx laz tvnuingc tueq.

⁸Vhtvp vhtaz ngoz tueq vguez; miq tek vtueq miqmac rueq nuingx roc shuex tanc khvnc nuingc tvkoc hokhvmx hoc mungx wawc nvrc waz hez muex nvr vtueq svpiq tix nuingc kuex vhtvp vhtaz yvmx muinz vguez.

⁹Kvruex baunglaung Hokhvmx nyuiuz Washti rueq muinz hoc mungx wawc yalxjuik rulx htenc muex phuiuz svy moalx tv-phauk saq tueq.

¹⁰Moalx raungx mvshix vngoz raungnuiyq hokhvmx waz kuex svpiq tix nuingx ruiux thuinz piauc hvlc rvtueq, piq bomc nvrc hez rvtueq, Mehuman, Biztha, Harbona, Bigtha, Abagtha, Zethar nuiyc Karka hez ngoz yaq vtonx vruez (unuk) miq waz mvshix kuex gvl tueq.

¹¹Piq rueq tsuinghez muex hokhvmx nyuiuz Washti kuex hokhvmx khux phop tv-phop ruiux piq kox nuex shvlc wvnc tvkoc nvr tueq. Hokhvmx nyuiuz kuex vshvmx svp rvp hvlc rvtueq hokhvmx waz rueq vyungx vlaungx bix nuiyc piq wuinz waz hez muex tvkhic kuy roc tueq.

¹²Yuq muinz hokhvmx waz rueq nvrc waz hez muex nvr tueq kvjaz kuex hokhvmx nyuiuz Washti muex jungx koq tueq, kaz mauk ngoz tueq tvlvlc gay tueq. Kvkhoc rvkoq tueq hokhvmx waz kuex thuinkhvy phuk tueq.

¹³Hokhvmx htungx vlayx httax yaq rulc rv-ngvlc tvrac nuiyc vnvrc lvmz nuex seng vtueq phaqjic httaz hvlc jix hez muex wiz tvkoc ngoz tueq, piq rueq vruex lvmx kuex yvmx khoc ruec juing lac wisoz tvkoc piq rulc rvjungc rv-phvnc walaungx bix kuex tvgvl tueq.

¹⁴Piq rulc vpaung rvjungc phvnc jix kuex Persia nuiyc Media wawc Karshena, Shethar, Admatha, Tarshish, Mere, Marsena nuiyc Memukan hez waz mvshix rvtueq, tsuinghez kuex mungtan nuex johvlc yauk shuimc jix vyungx vlaungx bix rvtueq.

¹⁵Piq rueq tsuinghez muex ngoc, “Ngaz, Hokhvmx Ahasuru rueq ngvy nvrc waz hez kuex hokhvmx nyuiuz Washti kox nuex tvkaz vtueq, ngaz rueq nvrc bomc kuex tvjungx kaz tauk piq rueq ngvy kvjaz kuex tvlvlc tueq! Kvkhoc rvtueq tvrac vlvmz maq naunghez rueq piq kuex yvmx khoc ruec juing lac?” ngoz tueq wiz tueq.

¹⁶Kvkaq Memukan rueq hokhvmx waz nuiyc piq miq vyungx vlaungx bix muex, “Hokhvmx nyuiuz Washti rueq hokhvmx waz dvyx yomnamc rvmuq, piq vyungx vlaungx bix muinz, honoc mungtan wawc miqwaz rulx lotlaz muinz yomnamc gay tueq!

¹⁷Honoc mungtan wawc yalxjuik ruip rawx kuex hokhvmx nyuiuz rueq ruez wvnc tueq lvmz kuex tay wuez ruiux yuq, miqmac taungx waz hez kuex wvlc guez tvyaungc wvnc wuez shuex. Tsuinghez rueq, ‘Hokhvmx Ahasuru rueq hokhvmx nyuiuz Washti kuex piq kox nuex mkaz rueq ngoz tueq nvr koq tueq, Washti rueq tvlvlc gay tueq,’ ngoz tueq rvjungc wuez tuex.

¹⁸Hokhvmx nyuiuz rueq ruez wvnc tueq lvmz tay jix Persia nuiyc Media wawc vyungx vlaungx bix taungnyuiuz hez rueq shalx max nyuip nuex dvyx, tsuingshiq taungx waz hez muex jungphvnx wuez shuex. Taungnyuiuz tamx rueq miqmac taungx waz kuex wvlc guez tvyaungc ruiux yuq, vtaungx waz tamx kuex tsuingshiq taungnyuiuz hez muex thuinkhaq wuez tuex.

¹⁹Taungjix Hokhvmx waz rungx raz ruiux yuq, Washti kuex hokhvmx khaungkac nuex mkaq muinz nyuip mvy muq shex lvmz bomc tvdvy shuiuz. Kvruex kvjaz kuex mkaq muinz layc gay lot muq lvmz Persia nuiyc Media tvrac luik nuex m-wuiyq taq shec shueq. Kvruex yimaq piq hokhvmx nyuiuz jvp juing kuex piq htauk nuex vhvlx vganc nyuiuz shiz muex kuy mvy yaq.

²⁰Mbomc tvdvy shuiux kuex vtanc khvnc yungx yaq honoc mungtan lotlaz nuex tvtay ruiux yuq, yalxjuik rulx htenc rueq miqmac taungwaz kuex luiz waungx, rvmuq ngoz ruiux htemc saz yaungx ruiux muinz tvtsanc nganc wuez shuex,” ngoz tueq jungx tueq.

²¹Hokhvmx waz nuiyc piq vyungx vlaungx bix rueq vruex kvjaz kuex roc wuez tueq, kvkaq Memukan rueq jungx tueq kvkhoc hokhvmx waz rueq shuimx tueq.

²²Yuimx taungx waz rulx ruip rawx kuex miqmac yuimx taungjix muex yaungx vtueq vtvsuip vrangx vpangx maq jungphvnc kuy tvkoc mungx hong vshiz maq vshiz kvjak yaq kvjaz nuiyc mungx hong nuex wuiyq tueq bomjungc kuex hokhvmx mungx hong baung ruip saz nuex phvlx tueq.