Read Tase Naga Esta 7 Bible Online

Esta 7 - Tase Naga bible

Esta 7

¹Kvkhoc rvtueq hokhvmx waz nuiyc Haman kuex Esther rulc vdvmz,

²lauk nueyc ngoz yaungc phauk saq kaz tueq. Hokhvmx waz rueq svpiq tix nuingx yaq lvmx maq Esther muex ngoc, “Hokhvmx nyuiuz Esther lex, mnoz rueq yvmx lac roc shuiux? Kvruex mnoz rueq lvp shuiux ningkhvnc nuex ngaz muex jungx koq. Honoc mungtan kholak doc muinz kuq phaungx,” ngoz tueq jungx yek tueq.

³Hokhvmx nyuiuz Esther rueq, “Taungjix hokhvmx waz lex, ngaz rueq kvmenc jenc thoz phaungx kuex tay kuq phux ngoz ruiux kuex, ngaz nuiyc ngvy miqsaz htenc rullungx tvraungx lvp lvmx kuex ngaz rueq raungc raq vshaungx lvmx rvtueq.

⁴Ngaz nuiyc ngvy miqsaz htenc kuex vthvy gay tvkoc nuimshiq kuex vshaungx gay rvhumc vtix. Dax rullungx muex yaungc tvkoc shaungc gay rvhumc dvyx ngoz ruiux kuex ngaz rueq mnoz muex tv-nyez raung mauk maq nanx khvmx tauk; yuq muinz nuiyshiq kuex vphvnx tvsuimz nuex httuiuc laz tvbac gay rvhumc shex dvnc vshix!” ngoz tueq tvralc tueq.

⁵Kvkaq Hokhvmx Ahasuru rueq Hokhvmx nyuiuz Esther muex, “Kvkhoc kuex uraq lac ruez khvmc shvnx? Kvruex waz kuex m-yuq lac httax yaq nguinx?” ngoz tueq wiz tueq.

⁶Esther rueq, “Nuiyshiq ralx, nuiyshiq guirguenc jix waz kuex vruex layx bac waz Haman rvtueq!” ngoz tueq tvralc tueq. Kvkaq Haman kuex hokhvmx waz nuiyc hokhvmx nyuiuz mvnz nuex hiyaz kvkhuirc tueq.

⁷Hokhvmx waz kuex thuinkhvy lez kvtenc vtueq, khok maq dung kaz ruiux, hoc wawc sunc nuex kaz wvnc tueq. Haman kuex kvruex lvmz ningkhvnc nuex piq muex murx tvgurc tvkoc dvnc yaq kuex piq rueq khiz vtueq, piq rullungx laung nuex Hokhvmx nyuiuz Esther muex kvmenc jenc thoz tvkoc ngoz tueq yix nuex kvjungx kaz tueq.

⁸Hokhvmx waz kuex sunc maq khok nuex yek waung yek koq tueq, Haman kuex Esther chuing htauk nuex bumx vtueq menjenc kuy tvkoc thoz yaq kuex khiz waung tueq. Hokhvmx waz rueq, “Vruex waz vraq hokhvmx nyuiuz kuex ngvy hoc vyuq ngvy khaungkac nuex dvyx yomnamc dvnc yaq nyix?” ngoz tueq ramc tueq. Hokhvmx waz rueq kvkhoc ngoz yaq nuex dvyx miq tonx (unuk) hez rueq Haman khux poz kuex puingc gay tueq.

⁹Kvruex yimaq vmuingc Harbona ngoz yaq waz rueq, “Taungjix hokhvmx waz rullungx palc kuq wvnc tueq waz Mordekai kuex tvshuirc pauk gay muex ngoz tueq, Haman rueq vyuimx nuex miq thvy juing baungshiz tvhungx shec tueq. Kvruex kuex meter 22 joz yaq!” ngoz tueq jungx tueq. Rvkoq tueq hokhvmx waz rueq, “Kvyuq Haman kuex tvshuirc pauk gay shuinz!” ngoz tueq nvr tueq.

¹⁰Kvkhoc rvtueq Haman kuex Mordekai tvkoc piq rueq vtvhungx shex buq tvshuirc pauk juing nuex thvy gay rvhumc tueq. Kvkaq jix hokhvmx waz thuinkhvy kuex shiz tueq.