Read Tase Naga DUNGWVNC 1 Bible Online

DUNGWVNC 1 - Tase Naga bible

DUNGWVNC 1

¹Ejip mungx nuex Yaku rulc vdvmz kay naungc jix vsaz hez kuex,

²Ruben, Simeon, Lewi, Yuda,

³Issakar, Zebulun, Benjamin,

⁴Dan, Naphtali, Gad nuiyc Asher rvtueq. Tsuingshiq yuimx wuinz htenc muinz kaz wvnc naungx tueq.

⁵Vruex hez htenc kuex Yaku suiuz vsaz shauk wawc miq warok mvshix rvtueq. Yosep kuex Ejip mungx nuex vhttuiuc wuez shex rvtueq.

⁶Vraungx wuic httuiuc wvnc koq tueq Yosep nuiyc vphuz vnox hez nuiyc kvruex panc wawc miq lotlaz thueyc wvnc wuez tueq,

⁷yuq muinz Israel miqsaz tsuingshiq suiuz vsaz paunghvlc pux wvnc vtueq, Ejip mungx baung ruip saz nuex rv-nyanc httax wuez tueq.

⁸Kvruex yimaq Yosep lvmz raungluingx muinz tuiuz muq, hokhvmx nyalx washiz, Ejip mungx nuex duiz tueq.

⁹Piq rueq vphvnx vmaq muex jungx tueq kuex, “Israel miqsaz vruex paunghvlc paung wvnc vtueq, hungc vlaungc yungx wvnc ruiux yuq, naungshiq muex kvhiz juing yaungx tuex.

¹⁰Mkhoc shoc maq ralx dung ruiux yuq tsuingshiq kuex naungshiq muex ralx yaungc jix nuk kox nuex kvromc vtueq, naungshiq kuex khvt gay ruiux mungtan wawc kaz wvnc wuez tuex. Tsuingshiq miq kuex vruex htauk vyuq lvy vtueq paung wvnc muq juing, vhvlx lvmx maq naungshiq rueq lvmx shishiz maq tuingshaung wuez ix,” ngoz tueq jungx tueq.

¹¹Kvkhoc rvtueq Ejip miqsaz rueq tsuingshiq htauk nuex dax yauk shuimc lawc jix kuex thvl taq vtueq, vgvrx vtsvrx yauk shuimc nuiyc tsuingshiq thuinz htenc kuex tvnulx tawk gay tueq. Israel miqsaz htenc rueq hokhvmx tvkoc taungx vwawx tvy juing baung Pithom nuiyc Ramese ghaqyungx kuex Israel miqsaz muex tvguirc tueq.

¹²Yuq muinz Ejip miqsaz rueq Israel miqsaz kuex guirguenz koq jix, Israel miqsaz kuex paung yaung wvnc vtueq, wvmungx tuimx nuex rv-nyanc httax wvnc tueq. Ejip miqsaz kuex Israel miqsaz muex hiyaz wvnc wuez tueq,

¹³kvkhoc rvtueq Israel miqsaz kuex dax muex tvyaungc ruiux, lawc hvt maq yauk tvshuimc vtueq guirguenz tueq. Yuimx guirc yauk shuimc nuex nuiyc wuik vnax yauk shuimc nuex muinz menjenc muq maq hunnyec hvlc tvshuimc tueq.

¹⁵Kvruex yimaq Ejip hokhvmx waz rueq Hebre nox tvjawc kuy jix nyuiuz nueyc, Shiphra nuiyc Pua muex jungx tueq kuex,

¹⁶“Hebre nyuiuz tamx muex nox tvjawc kuq ruiux yuq, miqwaz saz jawx ruiux kuex vthvy rvgay shuinz; yuq muinz yalxjuik saz ngoz ruiux kuex vtvraungx taq shuinz,” ngoz tueq jungx tueq.

¹⁷Yuq muinz nox tvjawc jix nyuiuz nueyc kuex Tishox muex hiyaz jix ningkhvnc nuex Ejip hokhvmx waz kvjaz kuex phvnx muq maq, miqwaz sahez muinz vtvraungx taq tueq.

¹⁸Kvkhoc rvtueq hokhvmx waz rueq nox tvjawc jix nyuiuz nueyc kuex gvl vtueq, “Nuimnueyc rueq ngvy kvjaz tay muit maq yvmx ngoz tueq lac miqwaz sahez kuex tvraungx taq vshuinx?” ngoz tueq wiz tueq.

¹⁹Kvkaq nox tvjawc jix nyuiuz nueyc rueq, “Hebre nyuiuz tamx kuex Ejip nyuiuz tamx ikhoc rvmuq, tsuingshiq kuex saz jawc yoalc hvlc ningkhvnc nuex nox tvjawc jix max httuiuc nuex dvyx jawx gay wuez yaq,” ngoz tueq jungx tueq.

²⁰Nox tvjawc jix hez kuex Tishox muex hiyaz jix ningkhvnc nuex, vpiq rueq tsuingnueyc muex vhvlx shungc vngaungc tvyaungc kuq tueq. Israel miqsaz htenc muinz pux paung wvnc tueq.

²²Kvkhoc ningkhvnc nuex hokhvmx rueq, “Hebre nyuiuz tamx rueq vjawx miqwaz saz vngoz htenc kuex Sinai yuix yungx kvyuq tuip gay rax, yalxjuik sahez kvdvyx vtvraungx tvy rax,” ngoz tueq piq miq muex bomc tvdvy kuq tueq.