Read Tase Naga DUNGWVNC 13 Bible Online

DUNGWVNC 13 - Tase Naga bible

DUNGWVNC 13

¹Yehowa rueq Moshe muex ngoc,

²“Israel miqsaz wawc jawc phaungc miqwaz nuiyc nyvmx saz nyuiuz phaungc vpung htenc kuex ngaz rueq guimz yaq ningkhvnc nuex, jawc phaungc miqwaz nuiyc nyvmx saz nyuiuz phaungc vpung lotlaz kuex ngaz muex lekuy rax,” ngoz tueq jungx tueq.

³Moshe rueq mungx miqsaz htenc muex ngoc, “Vruex raungnuiyq kuex nauk lauk kaz; nuimshiq Ejip mungx maq dax wawc dungc wvnc raungnuiyq rvtueq. Vruex raungnuiyq kuex Yehowa piq luimc vkawc yunghvlc maq nuimshiq tvdung wvnc tueq. Wisiz lomx yaq wanx kuex phuiuz mvy muq.

⁴Nuimshiq kuex Abib yapix ngoz yaq vphaungc yapix vruex raungnuiyq nuex Ejip mungx maq dung wvnc tuit.

⁵Yehowa rueq nuimshiq jix vwaz tamx muex kvtuemc khvmc kuq tueq Kanaan, Hitti, Amori, Hiwi nuiyc Jebusi miqsaz htenc httax yaq mungx kuex nuimshiq muex kuq phaungx ngoz tueq. Vpiq rueq tvkaz vtueq puix nuiyc nyaq ngurx dung yaq mungx nuex nuimshiq httuiuc kaz ruiux yuq, wawc tek vphaungc yapix nuex vkhoc moalx kuex moalx wuez shuinz.

⁶Nuimshiq rueq raungx mvshix tup wisiz lomx muq wanx kuex phauk vtueq, raungx mvshix vngoz raungnuiyq kuex Yehowa muex tvtsanc nganc moalx moalx wuez rax.

⁷Raungx mvshix tup wisiz lomx muq wanx dvyx phuiuz rax; kvruex baunglaung nuimshiq mungtan baung ruip saz nuex wisiz, rvmuq ngoz ruiux wisiz lomx yaq wanx nauk taq kaz.

⁸Moalx kvruex phaungc shuinx raungnuiyq kvkaq msaz tamx muex, Ejip mungx maq dung wvnc toq nuex Yehowa rueq shuimx wvnc tueq kejux kuex tvmaung tvkoc moalx vshix rvtueq, ngoz tueq mnoz rueq jungx kuq shuiuz.

⁹Yehowa vpiq luimc vkawc yunghvlc maq nuimshiq kuex Ejip mungx wawc tvdung wvnc phuinx ningkhvnc nuex, nuimshiq rueq Yehowa Tvrac kuex mkaq muinz wvlc lawc tvkoc, moalx vruex kuex nuimshiq yauk nuex, rvmuq ngoz ruiux khaungkuimx nuex menc taq vshuinx tvtsuingc juing hakhix ikhoc nuimshiq muex honc tvsvmz kuq kv-phuinx.

¹⁰Moalx vruex moalx jauz shex httuiuc ruiux yuq wawc tek moalx wuez shuinz.

¹¹“Yehowa rueq Kanaan miqsaz httax yaq mungx kvyuq nuimshiq kuex shvlc wvnc tvkoc nuimshiq nuiyc nuimshiq jix vwaz tamx muex vpiq rueq daungdaungx bomkhvmc taq tueq. Kvruex mungx kuex nuimshiq muex kuq ruiux yuq,

¹²nuimshiq rueq miqwaz pekhux htenc kuex Yehowa muex lekuy rax. Nuimshiq nyvmx saz nyuiuz khux vpung htenc kuex Yehowa rueq guimx yaq.

¹³Yuq muinz mvre nyuiuz khux vpung saz kuex khelbuenx saz maq layc vtueq daungc wvnc rax, kvkhoc layc vtueq daungc wvnc muit ngoz ruiux yuq mvre saz kuex vduingx maq tv-ngawk gay rax. Miqwaz pekhux htenc kuex nuimshiq rueq tvyez daungc wvnc yek rax.

¹⁴Yimaq msaz rueq, yvmx ngoz tueq lac vkhoc ruez vshix ngoz tueq wiz ruiux yuq, mnoz rueq piq muex, ‘Yehowa luimc vkawc yunghvlc maq naungshiq kuex dax muex yaungx tiq Ejip mungx kvwawc tvdung shvlx wvnc phuex.

¹⁵Ejip hokhvmx waz khux tvtsanz vtueq naungshiq tvkaz muq tvlvlc lvy ningkhvnc nuex Yehowa rueq Ejip mungx wawc miqsaz nuiyc nyvmx saz pekhux htenc kuex thvt gay tueq. Kvkhoc rvtueq naungshiq rueq nyvmx saz vphaungc vnyuiuz vpung maq Yehowa muex shomc kuq vshix, yuq muinz naungshiq miq pekhux waz htenc kuex tvyez daungc yek vshix.

¹⁶Vkhoc ruez vshix kuex m-yauk nuex tvtsuingc juing hakhix nuiyc mkhaungx nuex vmenc taq tvtsuingc juing hakhix ikhoc, Yehowa luimc vkawc yunghvlc maq naungshiq Ejip mungx wawc tvdung shvlx wvnc phuex kuex honc tvsvmc tvkoc rvtueq,’ ngoz tueq jungx shuiux,” ngoz tueq.

¹⁷Ejip hokhvmx waz rueq miq htenc kuex tvkaz koq tueq, Tishox rueq tsuingshiq kuex Philistin nuex kay juing lvmx vnyek maq shvlx laq muq. Tishox rueq, “Tsuingshiq ralx khvt lvy juing kuex khiz vtueq, tsuingshiq thuinz kv-phelc ruiux Ejip nuex yek waungc kuex ngaz rueq roc mauk,” ngoz tueq tvmaung tueq.

¹⁸Kvkhoc rvtueq vpiq rueq tsuingshiq kuex Yuix Shawx Jumx kox nuex kumtsvy tvnx rumz lvmx maq tvroz shvlx wvnc tueq. Israel miqsaz yauk nuex koz vlaq phvnx ruip lomx wuez tueq.

¹⁹Yosep rueq Israel miqsaz muex kvtuemc khvmc kuq tueq rulc rv-ngvlc Moshe rueq Yosep ruk vrawz htenc kuex piq rulc vdvmz nuex lvmz wvnc tueq. Yosep rueq, “Nuimshiq kuex Tishox rueq palc wvnc ruiux yuq, ngvy ruk vrawz htenc kuex vruex wawc nuimshiq rulc vdvmz lvmz wvnc shuinz,” ngoz tueq jungx shec tueq.

²⁰Israel miqsaz kuex Sukkot maq kaz wvnc vtueq, kumtsvy tvnx httoarc wawc Etham nuex jerak tec tueq.

²¹Yehowa rueq raungnuiyq nuex tsuingshiq muex lvmx shvlc kuy tvkoc phuemx tul nuiyc raungwvrx nuex vwuic tvlez kuy tvkoc wvr tul maq, raungnuiyq raungwvrx tsuingshiq muex lvmx shvlx kuq tueq.

²²Raungnuiyq nuex phuemx tul maq, raungwvrx nuex wvrluic tul maq miq htenc khaungx tvmax nuex mkaq muinz lvmx tvkhic tueq.