Read Tase Naga DUNGWVNC 14 Bible Online

DUNGWVNC 14 - Tase Naga bible

DUNGWVNC 14

¹Kvruex yimaq Yehowa rueq Moshe muex ngoc,

²“Israel miqsaz htenc kuex yix kox nuex kvroz yek vtueq, Bala Zephon hep wawc Migdol ghaq nuiyc Yuix Shawx Jumx hvl wawc Pi Hahirot ghaq khaungkac kvyuq jerak tec tvkoc jungx shuiuz.

³Hokhvmx waz rueq Israel miqsaz kuex kumtsvy tvnx rueq tvroz komc yaq hong nuex kvroz rix khuemx vtuex shvmx ngoz tueq tvmaung shuex.

⁴Ngaz rueq piq khux tvtsanc kuy ningkhvnc nuex, piq rueq Israel miqsaz kuex yurc khvt shuex, kvkaq hokhvmx waz nuiyc piq nolaungx bix lotlaz kuex ngaz rueq taungx gay tauk kuex tvtsanc nganc wuez shuex. Kvkaq ngaz kuex Yehowa rvtauk kuex Ejip miqsaz rueq tuiuz wuez shuex,” ngoz tueq jungx tueq. Israel miqsaz rueq muinz vpiq rueq jungx tueq rulc rv-ngvlc kvkhoc rvwuez tueq.

⁵Ejip hokhvmx waz rueq miq htenc yuz wvnc vtuex lvmz tay vtueq, piq nuiyc piq miq vyungx vlaungx bix kuex thuinz kvlayc wvnc yek vtueq, “Naunghez rueq yvmx lac rvgay tiq nguinx! Naungshiq dax Israel miqsaz kuex tvkaz gay tiq shex vnauz!” ngoz tueq rv-ngoc wuez tueq.

⁶Hokhvmx waz rueq piq ralx khvt renc nuiyc piq nolaungx bix htenc kuex tvyoalc tueq.

⁷Piq kuex vyungx vlaungx bix rulc vdvmz vhvlx pinhtumc renc shac tvruk kvrac ralx khvt renc httax yaq lotlaz raz tueq kaz wvnc tueq.

⁸Yehowa rueq hokhvmx waz khux tvtsanc kuy ningkhvnc nuex piq rueq Israel miqsaz yix nuex yurc tueq, Israel miqsaz muinz hungc yungx laungc saz kaz wvnc wuez tueq.

⁹Ejip nolaungx bix kuex mvre lotlaz, nolaungx renc htenc nuiyc vruip jix htenc rulc vdvmz lotlaz rueq Israel miqsaz yix nuex yurc vtueq, Yuix Shawx Jumx hep wawc Bala Zephon nuiyc Pi Hahirot nuex jerak tec vtueq httax yaq kvwawc lauz laq tueq.

¹⁰Israel miqsaz rueq hokhvmx waz nuiyc piq nolaungx bix kaz yaq kuex khiz vtueq, tsuingshiq kuex pinhtumc hiyaz ningkhvnc nuex vromc kuy tvkoc Yehowa kox wawc guyc sez thoz wuez tueq.

¹¹Tsuingshiq rueq Moshe muex ngoc, “Ejip mungx nuex luip ruiuz khux vguez rvtueq haz? Mnoz rueq nuiyhez kumtsvy tvnx vyuq tvthueyc gay muex haz shvlx laq phux? Lawc shuiuz mnoz rueq nuiyshiq kuex Ejip mungx wawc tvdung shvlx wvnc vtueq yvmx lac ruez vphux!

¹²Nuiyshiq rueq max kaz nuex phuex vkhoc yaungx tuex ngoz tueq jungx phix rvmuq haz? Nuiyshiq rueq Ejip miqsaz kox nuex dax muex yaungx hvt dvyx yaungx tix, ngoz tueq jungx phix. Vruex kumtsvy tvnx vyuq thueyc tix ngoc mvnx, dax muex yaungx ruiux waz kuex vhvlx,” ngoz wuez tueq.

¹³Moshe rueq, “Nauk hiyaz kaz! Phaungx duing rvwuez kuinz, majuiuc raungnuiyq Yehowa rueq nuimshiq yvmx khoc lac palc wvnc kv-phuinx kuex khiz wuez shuinx; nuimshiq rueq vruex Ejip nuk htenc kuex yix maq mkaq muinz khiz yek shuinx rvmuq shex.

¹⁴Yehowa rueq nuimshiq tvkoc khvt gay shuex, nuimshiq kuex kuiyqshuik dvyx rvkuinz,” ngoz tueq.

¹⁵Yehowa rueq Moshe muex ngoc, “Nuimhez kuex yvmx ngoz tueq lac guyc sez kaz wuez tuinx? Miq htenc kuex max kox kvyuq vkay ngoz laz mruez kueq.

¹⁶M-yauk wawc ngvlhtulc kvruex svmuktvrax yuix htauk nuex tenz shuiuz. Kvkaq svmuktvrax yuix kuex rv-phvlc khoz wvnc vtueq, Israel miqsaz kuex ghaq shanx rek htauk maq yanz wvnc shuex.

¹⁷Ngaz rueq Ejip miqsaz khux pinhtumc tvtsanc kuy ningkhvnc nuex tsuingshiq rueq muinz Israel miqsaz yix kvyuq yurc shuex, ngaz rueq hokhvmx waz maq phaungc vtueq piq nolaungx bix, piq renc htenc nuiyc vruip jix htenc kuex taungx gay ningkhvnc nuex ngvy ngauz vngax dung wvnc tuex.

¹⁸Ngaz rueq tsuingshiq kuex taungx gay ningkhvnc nuex, ngaz kuex Yehowa ngoz tueq Ejip miqsaz rueq tuiuz wuez shuex,” ngoz tueq jungx tueq.

¹⁹Kvkaq Israel miqsaz max nuex kaz yaq Tishox raungkamx waz kuex tsuinghez yix tvsuip kox nuex kvhttot vtueq kaz naungx tueq. Phuemx tul muinz

²⁰Ejip miqsaz nuiyc Israel miqsaz hvlwvl nuex kvhttot kaz tueq. Phuemx tul rueq Ejip miqsaz kox nuex kuex raungx tv-nyauk ruiux, Israel miqsaz kox nuex kuex raungx tvwuic kuq tueq. Kvkhoc rvtueq ralx daungx nukshiz nuiyc nukshiz kuex wvrx taungx rvnvp lot muq.

²¹Moshe rueq svmuktvrax htauk nuex yauk kuex tenz koq tueq, Yehowa rueq shaldungc raungguil hungc hvlc kuex tvguil vtueq svmuktvrax yuix kuex tvyek tueq. Wvrx taungx svmuktvrax yuix kuex tvyek gay koq tueq, ghaq kuex wulthawk yaungx tueq. Yuix kuex rv-phvlc wvnc vtueq,

²²Israel miqsaz kuex yuix daungx nueyc hvlwvl ghaq wulthawk htauk maq khuemx wvnc vtueq svmuktvrax kuex yanz wvnc wuez tueq.

²³Ejip nolaungx bix htenc rueq tsuingshiq mvre htenc, renc htenc nuiyc vruip jix htenc maq tauk Israel miqsaz yix nuex svmuktvrax kvyuq svt vtueq yurc laq tueq.

²⁴Raungnvp raungx max wuix nuex Yehowa kuex wvrluic tul nuiyc phuemx tul kvmaq lawc tvtsuingc vtueq, Ejip nolaungx bix kuex tvpenc tvyanc rvgay tueq.

²⁵Yehowa rueq tsuingshiq renc huk htenc kuex tvbac gay koq tueq vkhuemc tvkoc gvrc hvlc yaungx tueq. Kvkhoc rvtueq Ejip miqsaz rueq, “Yehowa kuex Israel miqsaz kox nuex raz tueq naungshiq kuex khvt yaq, vruex maq dung wuez ix,” ngoz tueq.

²⁶Yehowa rueq Moshe muex ngoc, “M-yauk kuex svmuktvrax yuix htauk nuex tenz shuiuz, yuix kuex Ejip miqsaz nuiyc tsuingshiq renc htenc, vruip jix htenc htauk kvyuq m-yek kueq,” ngoz tueq jungx tueq.

²⁷Kvkhoc rvtueq Moshe rueq svmuktvrax htauk nuex yauk kuex tenz koq tueq, raungnvp raungwuic nuex yuix kuex kungkhux wawc ikhoc hulawx yaungx kaz yek tueq. Yuix puingx wvnc yek koq tueq Ejip miqsaz kuex yuz wuez tueq, yuq muinz Yehowa rueq tsuinghez kuex svmuktvrax nuex dvyx tvhtuip gay tueq.

²⁸Yuix kuex kvyez wvnc yek vtueq, svmuktvrax yuix nuex Israel miqsaz yurc lvy jix renc htenc, vruip jix htenc nuiyc Ejip nolaungx bix lotlaz kuex washiz muinz dung lvp muq, yuix nuex htuip wvnc wuez tueq.

²⁹Yuq muinz Israel miqsaz kuex yuix daungx nueyc hvlwvl nuex ghaq wulthawk htauk maq khuemx wvnc vtueq svmuktvrax kuex yanz wvnc tueq.

³⁰Kvruex raungnuiyq Yehowa rueq Israel miqsaz kuex Ejip miqsaz yauk wawc palc wvnc tueq, Israel miqsaz rueq Ejip miqsaz maungx htenc kuex svmuktvrax kawx nuex rv-phungc rvrungc khiz wuez tueq.

³¹Israel miqsaz kuex Yehowa rueq luimc vkawc yunghvlc maq Ejip miqsaz htenc khvt gay tueq kuex khiz vtueq, Yehowa muex hiyaz tvtsanc nganc wvnc wuez tueq; tsuingshiq kuex Yehowa muex nuiyc vpiq nvrc waz Moshe muex kvmluimx wvnc wuez tueq.