Read Tase Naga DUNGWVNC 16 Bible Online

DUNGWVNC 16 - Tase Naga bible

DUNGWVNC 16

¹Israel miqsaz htenc kuex Elim maq kaz wvnc tueq, Ejip mungx maq kay wvnc yix, lex nueyc yapix raungx rokshiz rac raungx bv-ngac nuex Elim nuiyc Sinai hvl wawc Sin ngoz yaq kumtsvy tvnx kvyuq httuiuc kaz tueq.

²Kumtsvy tvnx kvmaq tsuingshiq lotlaz rueq Moshe nuiyc Arun muex,

³kvbot ngoz wuez tueq kuex, “Yehowa rueq nuiyshiq kuex Ejip mungx nuex thvt gay shec ruiux vhvlx ruec juing. Kvruex mungx maq nuiyshiq rueq ngvmx nuiyc vganc phuiuz vsvy kuex nuiyshiq rueq vroc phauk saq ruiux shix. Yuq muinz mnoz rueq nuiyshiq kuex kumtsvy tvnx vyuq shvlx laq vtueq, nuiyshiq lotlaz kuex rvmc muex tvthueyc khvmc muex haz shvlx laq phux,” ngoz tueq jungx tueq.

⁴Yehowa rueq Moshe muex ngoc, “Ngaz rueq nuimshiq lotlaz tvkoc raungx maq phuiuz vsvy kuex tvdvy kuq phaungx. Tsuinghez rueq wvraungx nuiyq tek kaz vtueq, raungnuiyq shiz laung humc laz dvyx mtvjomx kaz kueq. Ngaz rueq jungx shaungx kvkhoc tsuingshiq rueq phvnx yaq shuex phvnx muq lac kuex ngaz rueq taruiyx lawc shaungx.

⁵Raungx tvruk raungnuiyq kuex vganc raungnuiyq htauk nuex mvnshiz vjvnc mtvjomx taq shueq,” ngoz tueq jungx tueq.

⁶Kvkhoc rvtueq Moshe nuiyc Arun rueq Israel miqsaz lotlaz muex ngoc, “Nuimshiq kuex Ejip mungx wawc tvdungc shvlc lvy jix waz kuex Yehowa rvtueq lvmz nuimshiq rueq majuiuc raungyac tuiuz shuinx.

⁷Invp raungnvp nuex nuimshiq rueq Yehowa vpiq phelez lep yaq kuex khiz shuinx. Vpiq muex nuimshiq rueq mvrax tvgurc kvbot vtuinx kuex vpiq rueq tay tueq shex, yvmx khoc lac ngoz ruiux lec nvnueyc kuex vpiq rueq tvkhic yaq kvkhoc dvyx shuimx vshix,” ngoz tueq jungx tueq.

⁸Kvruex yimaq Moshe rueq, “Nuimshiq rueq ngoz vshuinx htenc kuex Yehowa rueq tay vtueq, nuimshiq rueq phuiuz svy tvkoc raungyac nuex ngvmx nuiyc raungnvp kox nuex nuimshiq muex rax tuex tanc khvnc wanx kuex kuq kv-phuinx. Nuimshiq rueq nvnueyc ngoz vphuinx kuex, nuimshiq rueq Yehowa muex ngoc ngac rvtueq,” ngoz tueq jungx tueq.

⁹Moshe rueq Arun muex ngoc, “Israel miqsaz rvtuimx yaq kuex Yehowa khaungkac nuex kaz vtueq jvp kay tvkoc jungx shuiuz, tsuingshiq rueq ngoz yaq kuex vpiq rueq tay tueq shex,” ngoz tueq jungx tueq.

¹⁰Arun rueq Israel miqsaz rvtuimx yaq kvyuq jungx kuq yaq nuex, tsuinghez rueq kumtsvy tvnx kox nuex nyez lawc koq tueq, Yehowa phelez lep yaq kuex phuemx daungx nuex vhuingc rvhek laz dung kaz tueq.

¹¹Yehowa rueq Moshe muex ngoc,

¹²“Israel miqsaz rueq ngoz yaq kuex ngaz rueq tay tauk. Tsuingshiq rueq raungyac kox nuex ngvmx kuex phauk wuez shuex, raungnvp nuex wanx kuex roc shuex tanc khvnc lvp shuex. Kvkaq tsuingshiq rueq ngaz Yehowa tsuingshiq Tishox rvtauk lvmz tuiuz wuez shuex,” ngoz tueq jungx tueq.

¹³Raungyac kox nuex jerak baung ruip saz nuex wupic kung htenc kuex ghaq guimz laz htamc kaz tueq, raungnvp nuex kuex jerak tvroz nuex buing dvy tueq.

¹⁴Buing httuiz tueq nuex kumtsvy tvnx htauk kvyuq warx tsitsiz phux sahez kvjungx kaz tueq. Kvruex phux sahez kuex tsuik hek thuey ikhoc nyenz taungtaung rvtueq.

¹⁵Israel miqsaz rueq vphux sahez kuex khiz vtueq yvmx lac rvtvnx kuex tuiuz muq ningkhvnc nuex, “Vruex yvmx lac,” ngoz tueq vdvmz dvmz rvwiz soz wuez tueq. Moshe rueq tsuingshiq muex ngoc, “Vruex kuex nuimshiq rueq phuiuz tvkoc Yehowa rueq vkuq phuiuz vsvy rvtueq.

¹⁶Lotlaz rueq miqmac muex rax tuex tanc khvnc tvjomx shuinz, miq pumz tek vtueq miqmac yuimx nuex httax yaq miq lotlaz tvkoc washiz rueq liter nueyc phok tvjomx tvy tvkoc Yehowa rueq nvr yaq,” ngoz tueq jungx tueq.

¹⁷Israel miqsaz rueq muinz kvkhoc rvwuez tueq, kvkaq vbez rueq jvnc vtueq tvjomx, vbez rueq vkomc dvy tvjomx tsenz wuez tueq.

¹⁸Yuq muinz htvp lawc koq tueq, vjvnc tsenc jix waz muinz jvnc muq, vkomc tsenc jix waz muinz yomx muq, lvp wuez tueq. Lotlaz laz rueq miqmac muex rax yaq tanc khvnc tvjomx wuez tueq.

¹⁹Moshe rueq tsuingshiq muex ngoc, “Uraq muinz invp tvkoc tvjungx tvy mvy muq,” ngoz tueq.

²⁰Yuq muinz wvyvmc rueq Moshe kvjaz kuex tay muq maq, nvp yix raungnuiyq tvkoc muinz tvjungx taq wuez tueq. Nvp yix raungnvp nuex wanx kvyuq vyung raz tueq nvmx kaz koq tueq, Moshe kuex kvruex hez kvmac khaq tueq.

²¹Wvraungx nvp tsuingshiq rueq miqmac muex rax yaq tanc khvnc wanx kuex tvjomx wuez tueq; raungkawc wvnc ruiux ghaq nuex kvjungx yaq wanx htenc kuex vyuimx rvkaz yaq.

²²Raungx tvruk raungnuiyq tsuingshiq rueq lvmx svy miq washiz muex liter bvlic phok tvjomx wuez ruiux shuex. Walaungx bix lotlaz rueq kvruex lvmz kuex Moshe muex jungx koq tueq,

²³piq rueq, “Yehowa rueq ngoc invp raungnuiyq kuex vsawc nyec tvkuiyq raungnuiyq, vpiq muex lekuy rax ngoz tueq. Majuiuc raungnuiyq wanx shoay juing httax ruiux muinz shuz shuinz, vshungc vlumc juing httax ruiux muinz shunglumc shuinz. Phuiuz svy lot yix kvjungx yaq kuex invp raungnuiyq tvkoc taq shuinz, kvkhoc ruec tvkoc Yehowa rueq nvr yaq,” ngoz tueq.

²⁴Tsuingshiq muex Moshe rueq nvr tueq phuiuz vsvy juing kuex nvp yix raungnuiyq nuex httuiuc laz taq koq tueq vyung rueq phauk muq, nvmx muq rvtueq.

²⁵Moshe rueq, “Vruex kuex majuiuc raungnuiyq phauk saq shuinz, yvmx khoc lac ngoz ruiux lec majuiuc raungnuiyq kuex Yehowa tvkoc vlekuq nyec tvkuiyq Guilc raungnuiyq ningkhvnc nuex jerak phic wawc phuiuz vsvy juing humc shuinx rvmuq.

²⁶Nuimshiq rueq raungx tvruk nuex httuiuc laz phuiuz vsvy kuex tvjomx wuez shuinz, yuq muinz raungx mvshix raungnuiyq kuex nyec tvkuiyq raungnuiyq ningkhvnc nuex nuimshiq rueq phuiuz vsvy juing humc lot shuinx rvmuq,” ngoz tueq.

²⁷Raungx mvshix raungnuiyq nuex miq wvyvmc rueq phuiuz vsvy juing thuiyx kaz tueq, yuq muinz tsuingshiq rueq humc muq.

²⁸Kvruex yimaq Yehowa rueq Moshe muex ngoc, “Ngaz rueq nvr shaungx kvjaz kuex miq htenc rueq mtanc nuex httuiuc laz tvlvlc lac?

²⁹Ngaz, Yehowa rueq nuimshiq muex nyec tvkuiyq raungnuiyq muinz kuq phaungx, kvkhoc rvtueq raungx tvruk raungnuiyq kuex nuiyq nueyc laung wanx kuex kuq phaungx. Raungx mvshix raungnuiyq kuex miq lotlaz miqmac baung nuex httaz vtueq, miqmac yuimx maq dungc kay mvy muq,” ngoz tueq.

³⁰Kvkhoc rvtueq miq htenc rueq raungx mvshix raungnuiyq kuex yvmx yauk muinz shuimx muq.

³¹Israel miqsaz rueq kvruex phuiuz vsvy kv-ngoc manna[6] wanx ngoz tueq muingc tueq. Wanx kvruex kuex pvnchic lix ikhoc raz tueq vluiz rvtueq, nyaq ngurx maq vtvhungx wanx ikhoc sumx yaq.

³²Moshe rueq, “Naungshiq kuex vpiq rueq Ejip mungx maq tvdung shvlx wvnc vtueq, kumtsvy tvnx maq vpiq rueq naungshiq muex kuq phauk saq wvnc phuex manna wanx kuex, naungshiq suiuz vsaz tamx muex tvkhic muex raungluingx phok tvy tvkoc Yehowa rueq nvr yaq,” ngoz tueq jungx tueq.

³³Kvruex yimaq Moshe rueq Arun muex ngoc, “Manna wanx liter nueyc kuex tuik vshiz nuex htawc vtueq naungshiq suiuz vsaz tamx tvkoc Yehowa khaungkac nuex taq shuiuz,” ngoz tueq.

³⁴Yehowa rueq Moshe muex nvr tueq kvkhoc Arun rueq tuik kvruex Bomkhvrc Jep khaungkac nuex taq tueq.

³⁵Israel miqsaz kuex tsuingshiq httaz waungc juing Kanaan mungx ghaqruiy nuex httuiuc laz, manna wanx kuex wawc rok bvlic phauk saq tueq.

³⁶(Shenc juing tawk maq liter 20 kuex khayshiz rvtueq.)