Read Tase Naga DUNGWVNC 29 Bible Online

DUNGWVNC 29 - Tase Naga bible

DUNGWVNC 29

¹“Ngvy yauk shuimc jix shomc waz hez muex yaungc tvkoc Arun nuiyc vsaz hez kuex vkhoc lekuq shuiuz. Vmac vtsac vguez manx roalc pung vshiz rac khelbuenx pung vnueyc kuex lvmz laq loq.

²Olip puiz maq vnyvt wanx, wisiz lomx muq wanx, vpuiz maq vnyvt wanx phux htenc kuex tvhungx shuiuz, kvhtenc kvruex kuex vhvlx pinhtumc nyensaz wungwanx maq tvhungx shuinz.

³Kvruex wanx htenc kuex boarx vshiz nuex htawc shuinz, wanx htenc kuex ngaz muex shomc kuq ruiux yuq, manx nuiyc khelbuenx pung nueyc kvtauk shomc kuq koq.

⁴“Arun nuiyc vsaz hez htenc kuex ngaz httax taungx Tap kaluix daungx kvyuq shvlx laq vtueq, nawk palx htungx maq yuix rvhoalc tvkoc tsuinghez muex jungx shuiuz.

⁵Kvruex yimaq shomc waz khoz vkhvy htenc rvtueq, svmhung hungluz nuiyc hungtuingx nuex seng yaq vhtauk wawc svmhung, hungtuingx phauk tut nuiyc khuiuq puingc htenc kuex svmx ruiux kheshuit shuit juing rvtueq.

⁶Piq htauk nuex khux phop kuex tvdaungc kuq ruiux, ‘Yehowa muex vlekuq,’ ngoz tueq vwvt wuiyq taq shec kuimshawx phux kuex khux phop htauk kvyuq khvrc tvy rax.

⁷Kvruex yimaq piq khux kvyuq vpuiz tix maq shvy kuq vtueq, ruimruimx kuq shuiuz.

⁸“Vsaz hez kvmuinz gvl vtueq svmhung htenc kuex tvsvmc kuq shuiuz;

⁹kheshuit kuex shuit kuq ruiux, khux phop muinz tv-phop kuq shuiuz. Arun nac sahez muex kvkhoc mnoz rueq tvkvp kuq shuiuz. Tsuinghez nuiyc tsuingshiq suiuz vsaz htenc kuex shomc waz muex yaungx vtueq, ngvy yauk shuimc kuex pattup shuimx shuex.

¹⁰“Manx roalc pung waz kuex ngaz httax taungx Tap kvlc kvyuq tulx laq vtueq, Arun nac sahez rueq manx khux poz htauk kvyuq yauk tvdaungc tvkoc jungx shuiuz.

¹¹Manx kvruex vsawc ngaz httax taungx Tap kaluix daungx kvyuq thvy rax.

¹²Manx tvguiy raungluingx lvmz vtueq m-yauk shix kvmaq shomrawx shuk rungx htenc kvyuq nyvt shuiuz. Kvmaq kvjungx yek yaq manx tvguiy htenc kuex shomrawx jungx yaz kvyuq ruiuc gay shuiuz.

¹³Kvruex yimaq vwuk mungx wawc vpuiz htenc, vthuinz wawc vyox, vkvl poz nueyc rulc nongx vpuiz kuex shomrawx htauk nuex wvr maq jauk vtueq ngaz muex shomc kuq koq.

¹⁴Yuq muinz manx vngvmx, vkhuix nuiyc vpuk vyiz htenc kuex ke-phic kvyuq wvr maq juiuz gay rax. Vkhoc shomc kuy lvmz vruex kuex shomc waz bix mvrax kvdawc rvtueq.

¹⁵“Arun nuiyc vsaz hez rueq khelbuenx pungshiz khux poz htauk kvyuq, tsuinghez yauk kuex tvdaungc tvkoc jungx shuiuz.

¹⁶Khelbuenx pung kuex thvt vtueq, tvguiy kuex shomrawx samx bvlic rac kvyuq buit shuiuz.

¹⁷Khelbuenx kuex tvhtaq tvruk jumx shuiuz; vpuk vyiz nuiyc vhuk htenc kuex yuix maq hoal ruiux, khux poz nuiyc vngvmx htenc kvruex htauk kvyuq tvdaungc shuiuz.

¹⁸Khelbuenx wvpumz tuimx kuex shomrawx htauk nuex wvr maq jauk shomc kuy rax. Vruex kuex Yehowa muex jauk vtueq shomc kuy rvtueq, vkhoc vhomc vtumc maq shomc kuy kuex ngaz rueq raungc raq shaungx.

¹⁹“Mnoz rueq vganc khelbuenx pungshiz kuex tulx laq vtueq, Arun nuiyc vsahez yauk kuex kvruex khux htauk kvyuq tvdaungc tvkoc jungx shuiuz.

²⁰Khelbuenx kuex thvt ruiux, vtvguiy raungluingx lvmz vtueq Arun nuiyc vsaz hez nac keq kox nac sawx kvyuq nyvt shuiuz, vkeq kox yashix kuiux kvyuq nuiyc vkeq kox yaukshix kuiux kvyuq tauk nyvt shuiuz. Kvjungx yaq tvguiy kuex shomrawx kawx bvlic htauk kvyuq buit wuinc shuiuz.

²¹Shomrawx htauk nuex httax yaq tvguiy raungluingx nuiyc ruimruimc puiz tix raungluingx kuex lvmz vtueq, Arun nuiyc piq khoz vkhvy htauk kvyuq muinz, vsaz hez nuiyc tsuinghez khoz vkhvy htauk kvyuq muinz buit shuiuz. Piq nuiyc vsaz hez tsuinghez khoz vkhvy htenc kuex ngaz muex lez kuy rvtueq.

²²“Khelbuenx puiz, vpuiz vhttax vmiz, vwuk wawc vpuiz vyox, vthuinz wawc vhvlx pinhtumc phux, vkvl nueyc nuex kvyop yaq puiz nuiyc vkeq kox wex kuex lvmz taq shuiuz.

²³Ngaz muex vshomc kuq wanx boarx kvwawc wisiz lomx muq wanx poshiz, olip puiz maq vtvhungx wanx poshiz nuiyc wanx khonshiz kuex lvmz shuiuz.

²⁴Phuiuz vsvy lotlaz kuex Arun nac sahez yauk kvyuq kuq vtueq, ngvy tvkoc yauk noalc htep ikhoc maq kvruex mkuq phueq, tsuinghez muex jungx shuiuz.

²⁵Kvruex yimaq tsuinghez yauk wawc lvmz vtueq, ngaz muex phuiuz vsvy shomc kuq yaq ikhoc, shomrawx htauk wawc wvr maq jauk shomc kuy juing htauk kvyuq mjauk shueq. Ngaz rueq vkhoc vshomc kuq wawc vhomc vtumc kuex raungc raq vshaungx.

²⁶“Khelbuenx pung vkhuiuq kuex lvmz vtueq, yauk noalc htep vshiz ikhoc ngvy tvkoc mshomc kuq phueq. Kvruex ngvmx phuinz phux kuex mnoz tvkoc m-yaungx kueq.

²⁷“Shomc waz vshiz ruimruimx shuex nuex, khelbuenx pung vkhuiuq nuiyc vwex kuex yauk noalc htep ikhoc ngvy tvkoc lvmz vtueq shomc waz bix tvkoc lvmc tvy rax.

²⁸Ngvy miqsaz rueq lux rvyaungc shomc kuq ruiux yuq, ngvmx kvwawc vkhuiuq nuiyc vwex kuex shomc waz bix mvnjuz rvtueq, kvruex kuex kvlayc kay juing vguez vhtvp htaz taq rvtueq. Vruex kuex miq htenc rueq Ngaz, Yehowa muex yauk noalc kuy rvtueq.

²⁹“Arun shomc waz marrarc kuex piq thueyc kaz ruiux yuq, vsahez muex shomc waz ruimruimx shuex nuex svmx lvp shuex rvtueq.

³⁰Arun kvhttungx vsaz hez wawc shomc waz muex yaungc jix waz kuex Vsawc Baung nuex yauk shuimc tvkoc, ngaz httax taungx Tap mungx kvyuq nyuip ruiux yuq, shomc waz marrarc kuex raungx mvshix svmc rax.

³¹“Arun nac sahez kuex ruimruimx shuex nuex shuimx yaq khelbuenx pung ngvmx kuex lvmz vtueq, vsawc baung nuex tvbuit lumc shuinz.

³²Khelbuenx pung waz ngvmx nuiyc boarx wawc wanx kuex ngaz httax taungx Tap kaluix daungx nuex mphauk shueq.

³³Tsuinghez kuex ruimruimx shuex nuex, mvrax kvdawc shomc kuq yaq phuiuz vsvy htenc kuex phauk saq shuex rvtueq. Kvruex kuex vsawc phuiuz svy ningkhvnc nuex shomc waz bix rueq dvyx phuiuz svy mvy yaq.

³⁴Ngvmx nuiyc wanx kuex raungnvp nuex httuiuc laz kvjungx kaz ruiux yuq, wvr nuex jauk gay shuiuz; phuiuz vsvy kvruex kuex vsawc ningkhvnc nuex uraq muinz phuiuz svy mvy muq.

³⁵“Ngaz rueq jungx nvr vphaungx rulc rv-ngvlc Arun nac sahez kuex raungx mvshix tup ruimruimc yauk shuimc tvhungx shuiuz.

³⁶Mnoz rueq wvraungx nuiyq tek shomc nawk kuy juing manx pung vshiz shiz maq shomc kuq shuiuz, kvkaq mvrax tvsawc kuy rvhumc tuex. Kvruex kuex shomrawx pentsawc rvtueq. Kvruex yimaq kvruex tvsawc nawc tvkoc olip puiz maq nyvt tvy juing rvtueq.

³⁷Wvraungx nuiyq tek raungx mvshix tup tvhungx shuinz. Shomrawx kuex vsawc waq muex yaungx wvnc vtueq, kvruex yuq kvheq kvtungc jix nuiyc kvtungc tec yaq hup vsvmx yvmx yuq muinz, kvruex vsawc luimc vkawc ningkhvnc nuex vthuiuz vsac rvhumc tuex.

³⁸“Shomrawx htauk kvyuq wvraungx nuiyq tek tvkhvlc muq maq wawc shiz khelbuenx vnueyc nueyc maq shomc kuy rax.

³⁹Raungx nvp nuex vshiz, raungyac nuex vshiz maq shomc kuy rax.

⁴⁰Vphaungc wawc khelbuenx kvrulc vdvmz olip puiz kilogram vshiz maq vshot khaqmvnc wanx tawk shiz muinz shomc kuy rax. Svpiq tix guip shiz kvmuinz shomc shvy kuq shuiuz.

⁴¹Raungyac kox nuex vnueyc ngoc yaungc khelbuenx kuex shomc nawk kuq shuiuz, raungnvp kox nuex shomc kuq toq kvrulc rv-ngvlc khaqmvnc wanx, olip puiz nuiyc svpiq tix kvmaq muinz shomc kuq shuiuz. Kvruex kuex Ngaz, Yehowa tvkoc phuiuz vsvy shomc kuy yaungx vtueq vhomc vtumc kuex ngaz rueq raungc raq vshaungx.

⁴²Vruex jauk vtueq shomc kuy kuex ngaz httax taungx Tap kaluix daungx ngvy khaungkac nuex pattup shomc kuq shuinx rvtueq. Ngvy miqsaz htenc rulc ngaz rvhumc taungx baung kvyuq mnoz rulc rvbomc taungx.

⁴³Kvruex baung kvyuq Israel miqsaz rulc ngaz rvhumc vtueq, ngaz phelez vtaungx ngauz vngax maq tvsawc nawc shaungx.

⁴⁴Ngaz rueq Tap nuiyc shomrawx kuex tvsawc nawc ruiux, Arun nac sahez kuex ngvy yauk shuimc tvkoc shomc waz muex thvl taq shaungx.

⁴⁵Ngaz kuex Israel miqsaz rulc vdvmz httax vtueq, tsuingshiq Tishox muex yaungx taungx.

⁴⁶Ngaz kuex Ejip mungx wawc tsuingshiq tvdungc shvlc wvnc jix tsuingshiq Yehowa Tishox rvtauk lvmz kuex, tsuinghez rueq tuiuz wvnc shuex ningkhvnc nuex ngaz kuex tsuingshiq rulc httax taungx. Ngaz kuex tsuingshiq Yehowa Tishox rvtauk.