Read Tase Naga DUNGWVNC 31 Bible Online

DUNGWVNC 31 - Tase Naga bible

DUNGWVNC 31

¹Yehowa rueq Moshe muex ngoc,

²“Ngaz rueq Yuda phvnx wawc Hur suiuz, Uri saz Bezalel kuex thvl vtueq,

³ngaz rueq piq muex ngvy luimc vkawc[22] tvmvrc kuq tauk. Ngaz rueq piq muex vtuiuz vtay tharc, vthenc vtuiuz phaqjic, yauk maq shuimc juing phvnx ruip saz shuimc thenc juing,

⁴kuimshawx, kuimphox, nvyrvyx htenc maq phvnx ruip saz tvhungx thenc juing,

⁵lungsex phvnx ruip saz wawc guirx vtueq tvkop tvrvhtec thenc juing, pulx wawc phvnx ruip saz tvhungx wvt guirc thenc juing tharc kuex kuq tauk.

⁶Piq rulc vdvmz yauk shuimc tvkoc Dan phvnx wawc Ahisamak saz Oholiab kuex ngaz rueq thvl taq shec tauk. Vganc tuiuz thenc yaq thamtharc lotlaz muinz vyungx khvmc juing ngaz rueq kuq shec tauk, kvkhoc rvtueq tsuingshiq rueq shuimc tvkoc nvr tauk:

⁷tsuingshiq rueq ngaz httax taungx Tap, Bomkhvrc Jep nuiyc vguip, Tap mungx wawc vshuimc vlvmc juing hup svmx lotlaz,

⁸humpanx nuiyc kvruex yuq seng vtueq hup svmx htenc, kuimshawx wvr htung nuiyc kvruex yuq seng vtueq hup svmx lotlaz, vhomc vtumc juiuz juing shomrawx,

⁹wvr maq jauk shomc kuy juing shomrawx nuiyc kvyuq seng yaq hup vsvmx lotlaz, pantuimz nuiyc gaq kox nuex sap juing,

¹⁰Arun nac sahez rueq shomc waz yauk shuimx shuex nuex svmc tvkoc ngauz ngax svp rvp hvlc shomc waz khoz vkhvy,

¹¹ruimruimc puiz tix nuiyc Vsawc Baung tvkoc vhomc vtumc vshot kuex tvhungx shuimx kaz lot shuex. Ngaz rueq mnoz muex jungx kuq phaungx rulc rv-ngvlc tsuingshiq rueq vhtenc vruex rvkhauk laz tvhungx rax,” ngoz tueq jungx tueq.

¹²Yehowa rueq Israel miqsaz htenc muex

¹³jungc kuy tvkoc Moshe muex, “Vguilc Raungnuiyq ngoz yaq ngvy nyec tvkuiyq raungnuiyq kuex phvnx shuiuz, yvmx khoc lac ngoz ruiux lec kvruex kuex nuimshiq nuiyc ngvy hvlwvl nuex patshiz maq patshiz hakhix yaungx vtueq, Ngaz Yehowa rueq nuimshiq kuex ngvy miqsaz muex tvyaungc phaungx kuex tvkhic tvkoc muinz rvtueq.

¹⁴Kvruex raungnuiyq kuex nyec tvkuiyq guilc raungnuiyq rvtueq, yvmx rvtueq lac ngoz ruiux lec kvruex raungnuiyq kuex vsawc rvtueq. Uwaz rueq muinz yauk shuimc mvy muq, kvruex raungnuiyq yauk shuimx ruiux kuex vthueyc murx tvgurc rvhumc tuex.

¹⁵Nuimshiq rueq raungx tvruk nuex httuiuc laz miqmac yauk shuimc kuex shuimc mvy yaq, yuq muinz raungx mvshix raungnuiyq kuex Yehowa muex vlekuq nyec tvkuiyq juing raungnuiyq rvtueq, kvruex raungnuiyq yauk shuimc jix waz kuex vthueyc rulc rvhumc tuex.

¹⁶Israel miqsaz rueq kvruex raungnuiyq kuex bomkhvrc hakhix tvtsuingc juing muex tvyaungc vtueq phvnc rax.

¹⁷Ngaz, Yehowa rueq raungx tvruk lvmvnx nuex raungx nuiyc ghaq kuex tvdung sung ruiux, raungx mvshix raungnuiyq kuex yauk shuimx mauk maq nyec tvkuiyq guilc tauk ningkhvnc nuex, kvruex raungnuiyq kuex ngaz nuiyc Israel miqsaz hvlwvl wawc pattup bomkhvrc hakhix tvtsuingc tvy juing rvtueq,” ngoz tueq jungx tueq.

¹⁸Tishox rueq Sinai Kanx maq Moshe muex jungc kuy lot yix, Tishox vpiq rueq bomkhvrc htenc vwuiyq taq lungdvmx nueyc kuex piq muex kuq tueq.