Read Tase Naga DUNGWVNC 38 Bible Online

DUNGWVNC 38 - Tase Naga bible

DUNGWVNC 38

¹Piq rueq wvr maq jauk shomc kuy tvkoc shomrawx vshiz kuex akasia pulx maq tvhungx guirx tueq. Kvruex kuex samx rv-ngvlc vloayc kox meter 2.2, vyungc kox meter 2.2, vjoz kox meter 1.3 maq guirx tueq.

²Piq rueq raungx kox wawc vshuk bvlic, vrungx htenc kuex shomrawx rulc vshiz dvyx tvhungx tueq. Shomrawx wvpumz tuimx nuex nvyrvyx khuix maq tvkop shec tueq.

³Piq rueq shomrawx tvkoc hup svmx htenc tvhungx tueq kuex: tvp, vpuiz tix jungc juing tuik, phawc tsawk, pantuimz, khuiyq, wvr kuinx jungc juing tuik htenc kuex nvyrvyx maq tvhungx guirx tueq.

⁴Piq rueq nvyrvyx phec kuex shomrawx vkawx khung ngvlc rv-ngvlc baung kvyuq tvkop taq tueq.

⁵Piq rueq vshuk bvlic kvyuq kantaung relc tvkoc vkamz bvlic kuex tvhungx taq tueq.

⁶Kantaung htenc kuex akasia pulx maq tvhungx guirx ruiux, nvyrvyx phux tvkop taq vtueq,

⁷shomrawx samx nueyc nuex httax yaq vkamz htenc kvyuq relc taq shec tueq. Shomrawx kuex sawc riric hvlc yaungc tvkoc pulx penc maq tvhungx guirx tueq.

⁸Piq rueq Yehowa httax yaq Tap kaluix daungx nuex yauk shuimc jix yalxjuik rulx rueq shuimx yaq jamnac htenc kuex lvmz vtueq, nvyrvyx pantuimz nuiyc gaq kox nuex thap juing kuex tvhungx guirx tueq.

⁹Yehowa httax yaq Tap kvruex tuk tvkoc piq rueq vjuinc juing htenc kuex khvymvnz vnyel maq tvhungx tueq. Ghaqyaz kox nuex tuk tvkoc juinc juing kuex vloayc kox meter 44 rvtueq,

¹⁰vjuinc juing kuex bvt tvkoc htung roknueyc nuiyc htungyaz yop roknueyc kuex nvyrvyx maq, khuiyq htenc nuiyc vbic juing htenc kuex kuimphox maq raz tueq tvhungx guirx tueq.

¹¹Ghaqkhux kox nuex juinc juing muinz, ghaqyaz kox nuex juinc juing rulc rv-ngvlc dvyx rvtueq.

¹²Shalx nyuip kox nuex tuk tvkoc juinc juing kuex vloayc kox meter 22 raz tueq, htung rokshiz, htungyaz yop muinz rokshiz, khuiyq nuiyc vbic juing kawz htenc kuex kuimphox maq tvhungx guirx tueq.

¹³Tap shaldungc kox wawc kaluix puc kvmuinz vyungc kox meter 22 yungx yaq.

¹⁴Tap kaluix puc tek nuex juinc juing kuex vyungc kox meter 6.6 httax yaq rulc vdvmz htung vthuimx, htungyaz yop vthuimx phok httax yaq.

¹⁶Tap wangx tvroz nuex juinc juing lotlaz kuex khvymvnz vnyel maq tvhungx tueq.

¹⁷Htungyaz yop htenc kuex nvyrvyx maq tvhungx vtueq, htung bvt juing htenc, htung rvrenc htenc nuiyc htungkhux htenc muinz kuimphox maq tvhungx taq tueq. Wangx htung lotlaz kuex kuimphox tvnz htenc maq tvjuy shec tueq.

¹⁸Tap kaluix puc nuex juinc juing kuex khuingc wuil nvm-yaz, pasic nvm-yaz, khelbuenx ruiyshawx nuiyc khvymvnz vnyel maq tauk vtueq, vpuic wuiyq tvhungx taq tueq. Tap tvroz nuex juinc juing khvymvnz htenc ikhoc kaluix puc nuex juinc juing muinz vloayc kox meter 9, vjoz kox meter 2 httax yaq.

¹⁹Kvruex vjuinc juing khvymvnz kuex nvyrvyx yaz yop bvlic maq vyop taq htung bvlic kvyuq bvt taq tueq. Khuiyq htenc, vkhux nuex puingc juing htenc nuiyc vbic juing kawz htenc kuex kuimphox maq tvhungx guirx tueq.

²⁰Tap nuiyc wangx tvkoc wuythvmc htenc kuex nvyrvyx maq tvhungx tueq.

²¹Tvrac rokshiz vwuiyq shec lungdvmx nueyc tvy juing Yehowa httax yaq Tap tvkoc shuimc lvmc juing ghaqdungc hup vsvmx vtvtsuingc wvl taq rvtueq. Kvruex wvlc tvy kuex Moshe rueq nvr vtueq shomc waz Arun saz Ethamar rueq shunshvlx yaq kuex Lewi miqsaz htenc rueq shuimc juing rvtueq.

²²Yuda phvnx Hur suiuz, Uri saz Bezalel kuex Yehowa rueq nvr tueq phvnx ruip saz kuex shuimx tueq.

²³Piq muex romc naungc kuy jix Dan phvnx wawc Ahisamak saz Oholiab kuex jek waz thamx waz yauk shuimc thenc tuiuz jix, vromkomz tvhungx thenc jix, khelbuenx ruiyshawx, khuingc wuil nvm-yaz, pasic nvm-yaz nuiyc khvymvnz vnyel maq tauk thenc jix rvtueq.

²⁴Yehowa muex yauk noalc vkuq vsawc Tap tvkoc kuimshawx lotlaz kuex kilogram 1,000 rvtueq, kvruex kuex tawk rvkhauk maq vshenc rvtueq.

²⁵Miq muingc wvlc lvmz tueq jauz, Israel miqsaz yauk wawc vlvp kuimphox kuex kilogram 3,430 rvtueq, kvruex kuex tawk rvkhauk maq vshenc rvtueq.

²⁶Kvruex kuimphox kuex muingc wvlc nuex nyuip jix miq tek rueq tawk rvkhauk maq shenc vtueq vkuq kuimphox shenc rvtueq. Rullungx wawc roknueyc maq htauk kox, muingc wvlc nuex lomx jix miqwaz rulx kuex 603,550 waz rvtueq.

²⁷Vsawc Tap nuiyc vjuinc juing tvkoc gaq kox sap vshiz nuex kuimphox kilogram 34 phok maq, gaq kox sap shashiz kuex kuimphox kilogram 3,400 maq tvhungx tueq.

²⁸Kvjungx yaq kuimphox kilogram 30 maq, htung htenc, htung nuex bvt juing khuiyq htenc, htung khux htenc kuex tvhungx tueq.

²⁹Yehowa muex vshomc kuq nvyrvyx shenc lotlaz kuex kilogram 2,425 rvtueq.

³⁰Yehowa httax yaq Tap kaluix tvkoc vyaz kop htenc, nvyrvyx shomrawx, nvyrvyx phec, shomrawx nuex seng yaq hup vsvmx lotlaz,

³¹Tap wangx nuiyc kaluix tvkoc vyaz kop htenc, Tap nuiyc wangx ruk tvkoc wuythvmc htenc kuex nvyrvyx kvmaq tvhungx guirx tueq.