Read Tase Naga DUNGWVNC 40 Bible Online

DUNGWVNC 40 - Tase Naga bible

DUNGWVNC 40

¹Yehowa rueq Moshe muex ngoc,

²“Vphaungc yapix, vphaungc raungnuiyq nuex Yehowa httax yaq Tap kvruex tvjvp guirx shuiuz.

³Kvruex yuq Tvrac Rokshiz httax yaq Bomkhvrc Jep kuex htawc taq ruiux, max kox kvyuq vjuinc juing khvymvnz maq tuk shuiuz.

⁴Kvruex mungx kvyuq humpanx kuex htawc vtueq, seng yaq hup vsvmx htenc kuex kvruex htauk nuex tvdaungc taq shuiuz. Wvrkok htung kvmuinz htawc vtueq wvrkok htenc kuex tvdaungc tvluic shuiuz.

⁵Vhomc vshot juiuz juing kuimshawx shomrawx kuex Bomkhvrc Jep max kac kvyuq taq vtueq, Tap kaluix nuex vjuinc juing kuex pauk tvhungx shuiuz.

⁶Wvr maq jauk shomc kuy juing shomrawx kuex Yehowa httax yaq Tap kac nuex taq shuiuz.

⁷Pantuimz kuex Yehowa httax yaq Tap nuiyc shomrawx hvlwvl kvyuq taq vtueq, pantuimz kvyuq yuix htawc taq shuiuz.

⁸Vtvroz kuex ruk vtueq, wangx kaluix nuex vjuinc juing kuex pauk tvhungx shuiuz.

⁹“Tap nuiyc kvyuq httax yaq phvnx htenc kuex ruimruimc puiz tix maq shvy vtueq tvsawc shuiuz, ngoz ruiux yuq kvruex kuex vsawc muex yaungx tuex.

¹⁰Kvruex yimaq lekuy juing shomrawx nuiyc kvyuq seng yaq hup vsvmx lotlaz kuex ruimruimc puiz tix maq shvy vtueq, vsawc tvyaungc shuiuz.

¹¹Kvrulc rv-ngvlc pantuimz nuiyc gaq nuex phawc juing kvmuinz lekuq shuiuz.

¹²“Arun nac sahez kuex Yehowa httax yaq Tap kaluix kvyuq shvlx laq vtueq, yuix rvhoalc tvkoc jungx shuiuz.

¹³Arun muex shomc waz marrarc htenc kuex tvmarc vtueq, ruimruimc puiz tix maq shvy shuiuz, kvruex kuex piq lekuy rvtueq, kvkhoc ngoz ruiux jix piq kuex shomc waz muex yaungx vtueq ngaz muex shuimx kuq lot phuex.

¹⁴Vsaz hez kvmuinz shvlx laq vtueq svmhung kuex tvsvmc shuiuz.

¹⁵Kvruex yimaq vwaz muex ruimruimx kuq toq kvkhoc tsuinghez muex muinz ruimruimc tix maq nyvt shuiuz, kvkhoc ruez ruiux tsuinghez kuex shomc waz muex yaungx vtueq ngaz muex shuimx kuq lot phuex. Tsuinghez muex kvkhoc ruimruimc kuy kuex httuiuc wvnc yaq tsuingshiq suiuz vsaz pat nuex httuiuc laz rvtueq,” ngoz tueq jungx tueq.

¹⁶Moshe rueq muinz Yehowa rueq nvr tueq phvnx ruip saz kuex shuimx tueq.

¹⁷Tsuingshiq kuex Ejip mungx maq waungc wvnc yix, wawc nueyc raungwawc, vphaungc yapix, vphaungc raungnuiyq nuex Yehowa httax yaq Tap kuex tvjvp guirx tueq.

¹⁸Moshe rueq gaq nuex phawc juing htenc kuex tvwoalc taq ruiux, pulx penc htenc kuex tenz vtueq, vtuk juing htenc kvyuq relc ruiux, htung htenc kuex tvjvp tueq.

¹⁹Yehowa rueq piq muex nvr tueq rulc rv-ngvlc, Tap shuip kuex tvparc shuip ruiux, wux khux htauk wawc lap kvruex muinz shuip yek tueq.

²⁰Kvruex yimaq piq rueq lungdvmx nueyc kuex lvmz vtueq Bomkhvrc Jep nuex htawc taq tueq. Jep kamz htenc kvyuq kantaung htenc kuex relc ruiux, kvruex htauk nuex vguip maq puingc tueq.

²¹Kvruex yimaq piq rueq jep kvruex Tap mungx nuex htawc taq ruiux, vjuinc juing maq tuk tueq. Vruex kuex piq muex Yehowa rueq nvr tueq rulc rv-ngvlc Bomkhvrc Jep kuex tvwungx rvtueq.

²²Piq rueq humpanx kuex Tap mungx kox nuex juinx tueq yix kox kvyuq tvwoalc taq ruiux,

²³Yehowa muex shomc kuy juing wanx kuex kvruex htauk nuex taq tueq, kvruex kuex Yehowa rueq vnvr rvtueq.

²⁴Piq rueq wvrkok htung kuex Tap mungx kaq kox nuex taq tueq, humpanx rulc kuex pungx samx rvsamx yaungx ruiux,

²⁵Yehowa khaungkac nuex piq rueq wvrkok htenc kuex tvluic tueq, kvruex kuex Yehowa rueq vnvr rvtueq.

²⁶Piq rueq kuimshawx shomrawx kuex Tap mungx nuex taq tueq, vjuinc vruez max kox kvyuq taq ruiux,

²⁷shomrawx htauk kvyuq vhomc vshot kuex jauk tueq, kvruex kuex Yehowa rueq vnvr rvtueq.

²⁸Piq rueq Tap kaluix kvyuq vjuinc juing kuex juinx taq ruiux,

²⁹kvruex juinx tueq max kvyuq jauk vtueq shomc kuy tvkoc shomrawx kuex tvhungx taq tueq. Kvruex htauk kvyuq jauk vtueq shomc kuy nuiyc vruiy vwungx shomc kuy juing kuex piq rueq shomc kuq tueq, kvruex kuex Yehowa rueq vnvr rvtueq.

³⁰Piq rueq pantuimz kuex Tap nuiyc shomrawx hvlwvl nuex taq vtueq yuix htawc taq tueq.

³¹Kvruex yuq Moshe, Arun nuiyc vsaz hez htenc rueq yauk vyaz hoal yaq,

³²kvkhoc raz tueq jix tsuinghez kuex Tap mungx nuex, rvmuq ngoz ruiux shomrawx nuex nyuip yaq, kvruex kuex Yehowa rueq vnvr rvtueq.

³³Moshe rueq Tap nuiyc shomrawx tvroz htenc kuex ruk ruiux, wangx kaluix nuex juinc juing muinz tvhungx tueq. Kvkhoc raz tueq piq rueq yauk shuimc lotlaz tvlot tueq.

³⁴Kvkaq Tap kvyuq phuemx rueq puingc wvnc koq tueq Yehowa ngauz vngax phelez kuex tap mungx nuex lez kaz tueq.

³⁵Kvkhoc rvkoq tueq, Moshe kuex Tap kvyuq nyuip waung khvmc muq.

³⁶Tap wawc phuemx tul kvtenc waungc yix jix, Israel miqsaz kuex jerak vganc nuex kvhttot kaz yaq.

³⁷Tap kvruex phuemx tul rueq puingc yaq wawwawx, tsuingshiq kuex jerak kvmaq kvhttot mvy muq.

³⁸Israel miqsaz kvroz khuemx wvnc tueq lvmx wvlex kuex Tap htauk kvyuq raungnuiyq nuex Yehowa httax yaq phuemx tul maq puingc yaq kvmuinz, raungwvrx nuex wvrluic yaq kvmuinz khiz lvp wuez tueq.