Read Tase Naga YOBA 12 Bible Online

YOBA 12 - Tase Naga bible

YOBA 12

¹Rvtueq, nuimshiq kuex miqsaz tvruingc dvyx rvtauk. Nuimshiq thueyc kaz ruiux yuq, taksux tharc kuex mnoz rulc vdvmz thueyc wvnc tuex.

³Yuq muinz ngaz muinz nuimshiq kv-khoc ngaz nuex muinz vtuiuz thenc tharc httax yaq; nuimshiq khung nuex yaungx vtaungx rvmuq; nuimshiq rueq jungx vshuinx lotlaz kuex miq ruip rawx rueq tuiuz yaq.

⁴Majuiuc kuex ngvy kungjix hez doc muinz ngaz muex nueyx wuez yaq; ngaz kuex tsuingrux miq nuiyc mvrax vguez rvtauk rvyruiux, tsuinghez nueyx wuez yaq; yuq muinz Tishox rueq ngvy vjux thoz kuex tay kuq wvnc phuex jauz httax wvnc tueq.

⁵Nuimshiq kuex kuilc daz rvhumc muit, yuq muinz ngaz muex nueykuic wuez phuinx; nuimshiq rueq vrulc wvnc dvnc yaq waz kuex tvrul laz lak gay tuit.

⁶Yuq muinz vguiuq vpawx jix htenc nuiyc tishox vguez miq htenc kuex miqmac hungc vlaungc kuex tsuingshiq tishox muex yaungx ruiux, tsuingshiq kuex nomic maq httax wuez yaq.

⁷Wushawx htenc nuiyc ngvmx saz nyvmx saz htenc rueq nuimshiq muex tvluing kuq lot yaq;

⁸ghaq nuiyc svmuktvrax wawc yungsuiuz yawxsaz htenc muex tsuingshiq taksux tharc kuex wiz shuinz.

⁹Tsuingshiq lotlaz kuex Yehowa yauk maq vtvdung sung rv-tueq lvmz kuex tuiuz wuez yaq.

¹⁰Yungsuiuz yawxsaz htenc rullungx kuex Tishox yauk nuex httax yaq; miqsaz ruip rawx rullungx muinz vpiq yauk nuex httax yaq.

¹¹Yuq muinz mtvlix kuex phuiuz vsvy talc muex kokez ruiux, mnac kuex tay lvp yaq bomc htenc kvmac kokez yaq.

¹²Rullungx nyuiuz waz jix nuex taksux tharc mvrc yaq, yuq muinz Tishox kuex taksux tharc nuiyc luimc vkawc kuex mvrc yaq. Rullungx nyuiuz waz jix nuex tvmaung tharc mvrc yaq; Tishox kuex tvmaung tharc nuiyc luimc vkawc httax yaq.

¹⁴Tishox rueq httak gay ruiux yuq, uraq lac tvjvp guirx lot shvnx? Tishox rueq vkhvrc taq miq kuex uraq lac dawc lot shvnx?

¹⁵Tishox rueq raungx tvyunc muq nuex raungx ranx yaungx yaq; yuix kuex daz koq tueq yuix puingc httuiuc wvnc yaq.

¹⁶Tishox kuex hungc vlaungc httaz ningkhvnc nuex mkaq muinz taungx wvnc tueq; vlauc lawc jix waz nuiyc vlauc lawc rvhumc jix waz muinz vpiq luimc vkawc nuex httax yaq.

¹⁷Vpiq rueq guimz lawc jix bix tak- sux tharc kuex lvmz gay ruiux, mungx walaungx bix kuex vngaz ikhoc tvyaungc gay tueq.

¹⁸Vpiq rueq hokhvmx bix kuex hoc wawc tvdvy vtueq khoktep nuex shauk gay ruiux;

¹⁹vpiq rueq shomc waz bix nuiyc luimc vkawc httax yaq hez kuex tvyomx gay tueq.

²⁰Vpiq rueq vtvluimc juing miqsaz htenc kuex tuing gay ruiux, rullungx nyuiuz waz shex hez taksux tharc kuex lvmz gay tueq.

²¹Vpiq rueq luimc vkawc httax yaq jix hez kuex yvlc svy tvhumc ruiux, guimz lawc jix hez hungc vlaungc kuex tvnulx gay tueq.

²²Vpiq rueq raungnyauk wulumx mungx nuex vwuic tvkaz tueq.

²³Vpiq rueq miqphvnx htenc kuex tvhungc laungc vtueq tvyungx luz yaq, yuq muinz tsuingshiq kuex taungx gay ruiux tvbac gay tueq.

²⁴Vpiq rueq tsuingshiq walaungx bix kuex tv-ngaz gay ruiux, ruinglez raunglez tvyaungc vtueq lvmx tvyaq kuq ruiux tvkhuemc gay tueq;

²⁵tsuingshiq raungnyauk mungx nuex pemz vtueq joal pawc jix ikhoc phuinglez phamlez rullez ngaklez khuemx wuez yaq.