Read Tase Naga YOBA 2 Bible Online

YOBA 2 - Tase Naga bible

YOBA 2

¹Raungsaz hez kuex Yehowa khaungkac nuex kvkhic kay raungnuiyq httuiuc wvnc yek koq tueq, Satan muinz tsuinghez rulc kvnvp lomx tueq.

²Yehowa rueq piq muex, “Mnoz mmaq vkaz lac?” ngoz tueq wiz tueq. Satan rueq, “Ngaz kuex vyuq, nuex kvyuq khuemx shamx vtueq ghaq nuex kvroz khuemc vtaungx,” ngoz tueq tvralc tueq.

³Yehowa rueq, “Ngvy nvrc waz Yoba kuex mnoz rueq tvtsuingc vshuiux haz? Piq kuex kvmluimx jix miq hvlx waz rvtueq, piq kvkhoc ghaq htauk nuex washiz muinz vguez. Piq rueq ngaz muex nawk palx kuq vtueq honc lvmz hvt maq layx bac yauk shuimc kuex yvmx muinz shuimx muq. Mnoz rueq khuec vlvmz vguez maq piq kuex tvbac gay tvkoc ngaz muex laulawc vphux, yuq muinz Yoba kuex tvmtuing httax hvt dvyx httax yaq waz rvtueq,” ngoz tueq jungx tueq.

⁴Satan rueq, “Miq kuex thuiuzthuic tvraungx laung nuex phvnx ruip saz kuex kuy gay juing rvtuex.

⁵Yuq muinz majuiuc piq shauk pumz kuex mnoz rueq tvthuiuz sac vshuiux ngoz ix, piq kuex mkhaungkac kvyuq dvyx mnoz muex mvnhttonx kv-phux!” ngoz tueq tvralc tueq.

⁶Kvkaq Yehowa rueq Satan muex ngoc, “Vhvlx, piq kuex m-yauk nuex httax yaq, yuq muinz piq kuex thvy gay mvy muq,” ngoz tueq jungx tueq.

⁷Kvruex yimaq Satan kuex Yehowa khaungkac wawc kaz wvnc vtueq, Yoba gvnz pumz nuex vtsuimx htenc tvwaungc tueq.

⁸Yoba rueq piq vtsuimx htenc kuex kv-phuit tvkoc tuik phux vshiz kuex lvmz vtueq, tvp khux nuex ngaungc kaz tueq.

⁹Vtaungx nyuiuz rueq piq muex ngoc, “Mnoz kuex tvmtuing httax ruq dvyx doc haz? Tishox muex httonx tvmx vtueq thueyc kaz kuiuz nauz?” ngoz tueq ngoz kuq tueq.

¹⁰Yoba rueq, “Mnoz kuex khuec guez kvjaz kvjak vtuiux! Tishox rueq naungshiq muex vhvlx phvnx phvnx shishiz kuq shuex nuex kvruex naungshiq rueq lvp wvnc wuez vshix; vpiq rueq naungshiq muex kuilc daz tvrvhumc phuex nuex naungshiq rueq yvmx khoc lac ngoz ngax lot shix?” ngoz tueq tvralc tueq. Kvkhoc rvtueq vkhoc kuilc daz rvhumc ruiux muinz Yoba kuex Tishox muex khawc lvlc kvjaz kvjak muq.

¹¹Yoba kungjix waz thuimx kuex Teman ghaqyungx wawc Eliphaza, Shua mungx jix Bildad, Naama mungx jix Zophar hez rvtueq. Yoba kuex mtanc khvnc lac kuilc daz rvhumc yaq nguinx lvmz tsuinghez rueq tay vtueq, tsuinghez kuex piq kox nuex kaz ruiux thuinz tvhvlc kuy kay tvkoc htvp htaz wuez tueq.

¹²Tsuinghez rueq vluz maq dvyx Yoba kuex khiz tueq, yuq muinz piq kuex tvtsuingc muq. Tsuinghez rueq khiz vtueq, vhtaq maq vkhoar miqmac khvy htenc kuex juir gay ruiux, bokkhuyx kuex raungx nuex wuinc wuez vtueq miqmac khux htauk nuex tvpvnc wuez tueq.

¹³Kvruex yimaq piq rvhumc yaq kuilc daz mtanc khvnc lac yungx yaq nguinx kuex tsuinghez rueq khiz wuez vtueq, tsuinghez kuex kvyuq vnuiyq nuiyq mvshix vwvrx wvrx mvshix tup kvjak muq maq piq rulc vdvmz ghaq nuex ngaungc wuez tueq.