Read Tase Naga YOBA 28 Bible Online

YOBA 28 - Tase Naga bible

YOBA 28

¹[28] Kuimphox htoay juing khurx htenc httax yaq; kuimshawx jenc juing baung htenc muinz httax yaq.

²Miq htenc rueq ghaq mungx wawc yanx htuz lvmz yaq, lung htenc wawc nvyrvyx tvyuimx lvmz yaq.

³Tsuingshiq rueq thuiuz hvlc raungnyauk kuex thuiyx wuez yaq. Tsuingshiq rueq ghaq mungx thuiuz hvlc baung kuex thuiyx lawc vtueq, nyauk hvlc mungx wawc lung rauk htenc kuex htuz wuez yaq.

⁴Miq httaz juing yuimx vguez baung htenc nuiyc Miq httuiuc muq hong htenc nuex Miq htenc rueq sex khurx htenc kuex htuz wuez yaq. Kvyuq tsuingshiq lauk lauk dvyx yauk shuimx wuez vtueq, Ruiuz htenc nuex rvwak shuimx vtueq yauk shuimx wuez yaq.

⁵Ghaq rueq pulx thuey waqthuimx phuiuz vsvy tvkemz kuq yaq, Yuq muinz ghaq kvruex khung nuex kuex Vkhamc vruez gay ikhoc tvhuyx wuinc gay tueq.

⁶Ghaq mungx wawc lung htenc nuex lungsex httax yaq, Kvruex ghaq khuyx nuex kuimshawx httax yaq.

⁷Lawx rueq ghaqluix nuex kay lvmx kuex khiz yaq rvmuq, Lawx tawx muinz kvruex htauk kvmaq baz wvnc tueq rvmuq.

⁸Hangsic nuiyc vganc svl vwvl htenc kuex Kuiyq shuik kuiyq shix kvruex lvmx kvmaq mkaq muinz khuemx lvy muq.

⁹Ghaqluix htoay jix rueq tsanc hvlc lung rauk htenc kuex htuz vtueq, Kanx htenc kuex kanx yaz nuex httuiuc laz htuz gay tueq.

¹⁰Tsuingshiq rueq lung rauk htenc tvpuc wvt vtueq, Raunghvlc lungsex htenc kuex humc tueq.

¹¹Tsuingshiq rueq yuix ruilx htenc kvruex kuiuq htenc kuex htuz tvtuingc gay ruiux, Vhttuiyq tvy vruez baung nuex vwuic tvhttuiuc tueq.

¹²Yuq muinz taksux tharc kuex mbaung wawc lac humc lot shvnx? Tuiuz tay wvnc laz juing naungshiq rueq m-yuq tvluingc juing lac?

¹³Taksux tharc kuex miqsaz kox wawc thuiyx ruiux humc muq; Uraq muinz tsuingrux vhtawz vrawz kuex tuiuz lot muq.

¹⁴Svmuktvrax yuix nyuiuz jumx thuiuz hvlc baung htenc rueq naungshiq nuex taksux tharc vguez ngoz tueq tvkhic wuez yaq.

¹⁵Kvruex kuex kuimphox nuiyc kuimshawx maq ruiyx lot yaq rvmuq.

¹⁶Kuimshawx muik shauk nuiyc raungc hvlc lungsex htenc Kvruex vhtawz kuex tv-ngvlc lot yaq rvmuq.

¹⁷Kvruex kuex kuimshawx htauk nuex muinz, kuimshawx tuik vshiz htauk nuex muinz, Rvmuq ngoz ruiux vhvlx pinhtumc lung shuirx htauk nuex muinz vhtawz vtsanz rvtueq.

¹⁸Taksux tharc htawz vrawz kuex koral, khistal, lungshawx htenc Htauk nuex muinz vhtawz vtsanz rvtueq.

¹⁹Raungc hvlc topaza nuiyc kuimshawx muik shauk kuex Taksuk tharc htawz vrawz rulc tv-ngvlc lot juing rvmuq.

²⁰Kvkhoc ngoz ruiux, taksux tharc vjungx kuex m-yuq lac httax yaq nguinx? Tuiuz tay wvnc laz juing naungshiq rueq m-yuq tvluingc lvp juing lac?

²¹Kvruex kuex vtvraungx yungsuiuz yawxsaz htenc rueq khiz lot muq, Vbaz rvyaq wushawx rueq doc muinz khiz muq.

²²Wulumx mungx nuiyc tvbac gay rueq doc muinz Bomc httoarx kuex tay tiq doc ngoz tueq kvjungc wuez tueq.

²³Tishox rueq dvyx kvruex lvmx kuex tuiuz yaq, taksux tharc humc juing baung kuex tuiuz yaq.

²⁴Yvmx khoc lac ngoz ruiux lec vpiq rueq ghaq tvsuip kuex khiz vtueq, Raungwuilx wanc khung nuex httax yaq phvnx ruip saz kuex khiz yaq.

²⁵Tishox rueq raungguil muex luimc vkawc hungc kuex kuq vtueq Svmuktvrax yungc vloayc htvp htaz kuq tueq nuex muinz;

²⁶Raungyunc juing baung nuex Raunglep phuemx htenc khuemc juing lvmx tvhungx tueq nuex muinz,

²⁷Taksux tharc kuex khiz vtueq kvruex htawz vrawz kuex wisoz ruiux, Vpiq rueq kvruex tvtsuir tv-phaungx taq tueq.

²⁸Tishox rueq miq htenc muex ngoc, “Nuimshiq kuex taksux tharc httaz tvkoc Taungjix muex hiyaz tvtsanc nganc rax. Nuimshiq rueq tuiuz tay wvnc tvkoc layx vbac wawc kvroz wvnc yek tuinx rvtueq,” ngoz tueq jungx tueq.