Read Tase Naga YOBA 29 Bible Online

YOBA 29 - Tase Naga bible

YOBA 29

¹Yoba kvjak phaungc wvnc yek tueq.

²Ngvy rullungx kuex Tishox rueq ngaz tvkhup wungx wvnc phuex jauz wawc ikhoc lauk shiz hulawx yaungc wvnc yek roc shaungx.

³Tishox kuex ngaz rulc vdvmz mkaq muinz httax vtueq, raungnyauk nuex ngaz khuemx lvy wvnc ruiux muinz vpiq rueq ngaz muex vwuic kuq yaq.

⁴Kvruex raungnuiyq htenc kuex ngaz rungwanx wvnc tauk baunglaung nuex, Tishox kungjix muex yaungx vtueq ngvy yuimx kuex tvkhup wungx kuq yaq.

⁵Kvkaq Tvphaungc Tvsuip Tishox kuex ngaz rulc vdvmz httax yaq, ngaz kuex isaz hez lotlaz rueq komc tuimz komc shix rvhumc vtaungx.

⁶Ngvy manx htenc nuiyc khelkhix htenc rueq puix paunghvlc kuq yaq, ngvy olip jungx htenc kuex lungrungc ghaq nuex kemz yaq.

⁷Ghaqyungx walaungx bix rvtuimx ngaungc tuex tek ngaz ngaungc kaz naungx ruiux taungx nuex,

⁸yalxrox bix rueq ngaz kuex khiz vtueq lvmx lez kuq yaq, nyuiuz waz rulx htenc kuex jvp vtueq ngaz muex tvtsanc nganc wuez yaq.

⁹Mungx miqsaz walaungx bix htenc kvjak khvmc wuez muq;

¹⁰vkhek miq hez doc muinz kuiyqshuik maq httax yaq.

¹¹Ngaz kuex khiz vtueq ngvy lvmz tay yaq jix ukhaq yuq muinz ngaz rueq shuimx wvnc tauk vhvlx lvmx kuex jungx wuez yaq.

¹²Htemc saz jix htenc guyc sez ruiux muinz, ngaz rueq tsuingshiq muex romc kuq tauk; vkay juing vguez nojix sahez muex muinz ngaz rueq romc kuq wvnc tauk.

¹³Jvnc vtueq kuilc daz rvhumc jix htenc rueq ngaz muex tvtsvmc wuez yaq, ngaz rueq mvntix nyuiuz tamx muex kvwungx juing humc kuq laz juing romc kuq tauk.

¹⁴Ngaz rueq mkaq muinz tvrac vlvmz maq yauk shuimx wvnc tauk.

¹⁵Ngaz kuex muik mawz jix tvkoc muik, yaz kuix jix tvkoc yaz rvtauk.

¹⁶Ngaz kuex htemsuiuz rvmsaz jix muex vwaz vshiz ikhoc yaungx tauk, kuilc daz rvhumc yaq wuinz waz htenc khuec vkhac kuex ngaz rueq romc kuq tauk.

¹⁷Ngaz rueq batac hvlc jix luimc vkawc kuex tvbac gay ruiux, tsuingshiq khung nuex kuilc daz rvhumc yaq miqsaz htenc kuex palc wvnc tauk.

¹⁸Ngaz kuex rullungx vluz tvraungx httax vtueq yuimx nuex vpiauc maq thueyc wvnc kuex mkaq muinz tvluimc vshaungx.

¹⁹Ngaz kuex yuix lvp nuingx yaq pulx ruingx htenc ikhoc muinz, buing rueq hemx yaq pulx jungx noz vkanx htenc ikhoc muinz rvtauk.

²⁰Miq ruip rawx rueq ngaz muex mkaq muinz tvtsvmc kvmc wuez yaq, ngvy hungc vlaungc kuex mkaq muinz htumx kaz yomx kaz tuex rvmuq.

²¹Ngaz rueq kvmungx kuq koq yuq, miq htenc kuiyqshuik httax vtueq, ngaz rueq yvmx lac jungx shaungx kuex vhvlx maq tay tvtsuingc wuez yaq.

²²Ngaz rueq jungx lot shaungx nuex httuiuc laz tsuingshiq rueq yvmx muinz tvrvp jungx muq. Ngvy kvjaz htenc kuex raungyunc yaq ikhoc nyuip wvnc wuez vtueq;

²³wuik vnax shuimc jix rueq raungyunc phaungc kuex bvmc wuez yaq ikhoc, miq ruip rawx rueq kvruex kvjaz htenc kuex malc wvnc wuez tueq.

²⁴Tsuingshiq thuinz tvluimc juing vguez nuex tsuingshiq muex ngaz nueyyuimz yumc maq thuinz tvhvlc kuq vtueq; ngvy htvlx shalc rueq tsuingshiq muex hungc vlaungc tvlvp kuq yaq.

²⁵Tsuingshiq kuex ngaz rueq shun-shvlx vtueq yauk shuimc htvp htaz kuq tauk; hokhvmx waz rueq piq nolaungx daungx kuex shunshvlc yaq ikhoc, ngaz rueq tsuingshiq kuex shun-shvlx vshaungx, tsuingshiq thuinbac yaq nuex ngaz rueq sitenc yatenc kuq tauk.