Read Tase Naga YOBA 32 Bible Online

YOBA 32 - Tase Naga bible

YOBA 32

¹Yoba piq pumz kuex mvrax kop muq ngoz tueq kvmx ningkhvnc nuex, miq wathuimx rueq piq kvjaz kuex tvralc muq shex.

²Yuq muinz Yoba piq shauk pumz kuex tsuingrux rvtauk ngoz tueq Tishox muex mvrax tvgurc ningkhvnc nuex vhep nuex jvp yaq vmuingc Elihu ngoz yaq waz kuex vthuinz khvy nanx lot muq rvtueq. (Elihu kuex Buza suiuz vsaz, Rama taungx wawc Barakel saz rvtueq.)

³Piq kuex Yoba kungjix wathuimx kvmac muinz vkhaq rvtueq. Tsuingthuimx rueq Yoba kvjaz kuex khawx lot muq ningkhvnc nuex kvruex kuex Tishox kuex vyaq ikhoc muex tvyaungc yaungx tueq.

⁴Kvruex hez wawc Elihu kuex rullungx nosaz ningkhvnc nuex tsuinghez lotlaz rueq jungphvnc lot nuex httuiuc laz bvmc tueq.

⁵Tsuingthuimx rueq Yoba muex tvralc lot muq kuex piq rueq tuiuz vtueq, piq vthuinz khvy thuiuz muex

⁶vkhoc jungx phaungc wvnc tueq. Ngaz kuex rullungx nosaz rvtauk, nuimhez kuex nyuiuz waz rvtuit, kvkhoc rvtueq ngaz rueq tv-maung vshaungx kuex nuimhez muex jungx khvmc mauk.

⁷Nuimhez nyuiuz waz rulx miqmac rueq taksux tharc kuex jungphvnc kuy aungx yaq ningkhvnc nuex, nuimhez rvbomc mvy yaq ngoz tueq ngaz rueq tvmaung wvnc tauk.

⁸Yuq muinz miqsaz muex taksux tharc kuy jix waz kuex Tvphaungc Tvsuip Tishox siyac rvtueq.

⁹Rullungx nyuiuz waz yaungc rueq miq muex taksux tharc tvhttax yaq rvmuq, vlvmz kuex tvtuiuz tay tvkoc muinz htuiz daungx kuq yaq rvmuq.

¹⁰Kvkhoc rvtueq majuiuc ngvy kvjaz kuex tay wuez shuinz; ngaz rueq yvmx lac tvmaung vshaungx kuex nuimhez muex jungx kuq ix.

¹¹Nuimhez rvbomc yaq nuex ngvy thuinz tvluz vtueq tay wvnc tauk, nuimhez rueq tharc vhttax bomc vnyamc htenc kuex thuiyx tuit nuex ngaz rueq bvmc wvnc tauk.

¹²Nuimhez rueq jungx tuit kuex ngaz rueq tay tvtsuingc wvnc tauk; yuq muinz Yoba rueq jungx tueq kuex tvralc lot jix vguez.

¹³Nuimhez rueq taksux tharc kuex humc tiq shex ngoz tueq yvmx khoc lac jungx lot shuinx? Nuimhez rueq Yoba muex tvralc lot muit ningkhvnc nuex Tishox rueq jix mtvralc kuq shueq.

¹⁴Yoba rueq nuimhez muex ngoz yaq, ngaz muex ngoc rvmuq, yuq muinz ngaz rueq kuex nuim-hez rueq kuq shuinx kvkhoc mkaq muinz tvralc shaungx rvmuq.

¹⁵Yoba lex, kvjaz maq tsuinghez kuex tvsumx gay toq; tsuinghez rueq mnoz muex tvralc kuy juing kvjaz vguez shex.

¹⁶Ngaz kuex tsuinghez kuiyqshuik httax yaq nuex tvhttoarc vtueq bvmc juing haz? tsuingshiq rueq vjungc yek juing vguez kvyuq jvp wuez yaq.

¹⁷Rvmuq, majuiuc kuex ngaz rueq tvralc juing rvtueq ngaz rueq tvmaung shaungx kuex nuimhez muex jungx kuq ix.

¹⁸Ngaz kvjak mauk maq dvyx kuex nanx lot mauk. Ngvy nuix maq dung yaq kvjaz htenc kuex tuing gay lot mauk.

¹⁹Ngaz rueq jungc tvkoc lvp mauk ngoz ruiux kuex, svpiq tix vnyalx mvrc laz httax yaq ngvmx khuix tsongbumx juix ikhoc ngaz kuex phuk taungx.

²⁰Ngaz rueq nanx lot shaungx rvmuq; ngaz vkvjaz juing rvtueq.

²¹Ngaz rueq htvlx phawc thvl mauk maq jungx ix; ukhaq muex muinz tvyoq yvmx jungx shaungx rvmuq.

²²Yvmx khoc tvyoq yvmx jungc juing wuez ngaz rueq tuiuz mauk, ngaz rueq kvkhoc ruez ruiux yuq Tishox rueq htat htat ngaz muex murx mtvgurc phueq.