Read Tase Naga YOBA 37 Bible Online

YOBA 37 - Tase Naga bible

YOBA 37

¹Raunghtiq raungguil rueq ngvy thuinz vmungx tv-phelez tvkawc yawc yaq.

²Nuimshiq lotlaz lex, Tishox tvruingc ngoz yaq vpiq nuix wawc dung yaq raungx muk kuex tay wuez shuinz.

³Vpiq rueq raungwuilx wanc kuex lvy vtueq ghaqtsec kox maq vganc tsec kox nuex tiq raungx tvlep tv-phez kaz tueq.

⁴Kvruex yimaq raunglep thuiyc yaq baung kvyuq, raungx muk tvruingc yunghvlc maq, vpiq guimx tvruingc kuex tay lvp vshix.

⁵Tishox rueq nvr yaq bomc kuex vkawc yawc juing htenc, naungshiq rueq tuiuz lot miq vwangc juing htenc yaungx wvnc tueq.

⁶Vpiq rueq ghaq htauk nuex buing dvy tvkoc nvr tueq, raungyunc muinz yunc hvlc tvyunc tueq.

⁷Vpiq rueq naungshiq yauk shuimc htenc kuex tvthauk gay tueq; Vpiq rueq shuimx lot wvnc tueq htenc kuex naungshiq muex tvkhic kuq phuex.

⁸Ngvmx saz svl vwvl htenc kuex tsuingshiq luix nuex nyuip wuez yaq.

⁹Ghaqyaz kox maq raunghtiq raungguil waung yaq, ghaqkhux kox maq kuiyq hvlc raungguil guil yaq.

¹⁰Tishox thuiuzthuic maq muy koq tueq yuix htenc kvdaungx wvnc tueq, kvruex kuex tsanc hvlc tv-nguirx yaungx wvnc tueq.

¹¹Raunglep wvr htenc kuex phuemx wawc dung yaq,

¹²kvruex htenc kuex Tishox thuinroc kvmoay khuemx yaq. Kvruex htenc kuex Tishox rueq nvr tueq rulc rv-ngvlc mungkawx baung ruip saz nuex yauk shuimx wuez yaq.

¹³Tishox rueq ghaq nuex yuix tv-hemc tvkoc raungx tvyunc yaq; naungshiq muex murx tvgurc tvkoc rvmuq ngoz ruiux naungshiq muex vpiq kejux kuy tvkoc raungx tvyunc tueq.

¹⁴Yoba lex, vlox thauk vtueq tay shuiuz; Tishox rueq shuimx yaq vwangc juing yauk shuimc htenc kuex rvwvl talx shuiuz.

¹⁵Tishox rueq mkhoc nvr vtueq lac phuemx wawc raungx tvlep tvnx kuex tuiuz vshuiux haz?

¹⁶Tishox vpiq vwangc juing yauk shuimc rvtueq phuemx htenc kuex raungx nuex, yvmx khoc maq lac raungguil rulc pvnx naungx yaq nguinx kuex mnoz rueq tuiuz vshuiux haz?

¹⁷Rvmuq, ghaqyaz raungguil rueq ghaq kuex builx wvnc ruiux yuq, mnoz dvyx vkawc nuex kuilc daz rvhumc tuiux rvtueq.

¹⁸Mnoz rueq raungx kuex tvparc tvlanc ruiux, kvruex tvsvp rvp juing tvyuimx hup svmx ikhoc nyeljet tvhungx yaq Tishox muex romc kuq lot shuiux haz?

¹⁹Tishox muex mkhoc jungc juing lac nuiyshiq muex tvluing kuq koq; nuiyshiq thuinz htenc kuex yvmx muinz vguez ningkhvnc nuex, nuiyshiq rueq yvmx jungc juing muinz vguez.

²⁰Ngaz rueq Tishox kox wawc thoz tvkoc khvmc mauk; ngaz kuex tvbac gay tvkoc yvmx ngoz tueq lac vpiq muex vkhangx kuq shaungx?

²¹Majuiuc raungx nuex raungwuic kuex phelez vtueq, naungshiq tvkoc kvruex lawc muex phelep hvlc rvtueq; raungguil maq raungwuilx wanc tvsawc pex yaq.

²²Ghaqkhux kox nuex kuimshawx ikhoc phelez yaq kuex kv-khic yaq, Tishox ngauz vngax kuex naungshiq nuex kvhiz juing rvtueq.

²³Tishox luimc vkawc kuex yunghvlc ningkhvnc nuex vpiq hep nuex naungshiq kvnvp kaz lot miq; vpiq kuex miqsaz rulc vdvmz nuex rvbomc nyamc yaq kuex tsuingrux nuiyc vsuing vlvmx rvtueq.

²⁴Miq ruip rawx vpiq htumc nuex vhiz vyaz maq jvp wuez yaq vwangc juing rvmuq, taksux tharc vhttax ngoz tueq jungc jix hez kuex vpiq rueq wvlc guez rvyaq.