Read Tase Naga YOBA 40 Bible Online

YOBA 40 - Tase Naga bible

YOBA 40

¹Yoba lex, mnoz rueq Tvphaungc Tvsuip Tishox muex ramc wvnc toq; majuiuc kuex vsumx lvmz haz kuq shuiuz, shuex tvralc lac rvshuiux?

³Yehowa lex, ngaz kuex miqyaq rvtueq kvjak itauk. Ngaz rueq yvmx lac tvralc lot shaungx? Ngaz rueq yvmx yuq muinz hung-laungx kvjak taungx rvmuq.

⁵Ngaz rueq jungc aungx yaq maq lvy vtueq vjvnc kvjak gay tauk.

⁶Kvruex yimaq Yehowa rueq raunghtiq raungguil mungx maq Yoba muex jungx yek tueq.

⁷Majuiuc lanx juit jvp vtueq, ngaz rueq wiz phaungx htenc kuex tvralc shuiuz.

⁸Ngaz kuex vyaq nuiyc tvrac mauk, mshauk pumz kuex vlvmz ngoz tueq ngaz muex mvrax tvgurc roc haz?

⁹Mnoz kuex ngaz vkhoc hungc vlaungc httax yaq haz? Mnoz tvruingc kuex raungx muk yaq ngvy tvruingc ikhoc tsanz yaq haz?

¹⁰Kvkhoc ngoz ruiux kuex, mnoz tvtsanc nganc nuiyc ngamc boq vtueq jvp kuiuz; m-gvnz kvyuq ngauz vngax nuiyc muingjungc khushec kuex kvsvmx shuiuz.

¹¹Mthuinz khvy kuex ruiuc gay ruiux; ngamc boq jix hez kuex lawc tvtsuingc vtueq thuinz tvyomx shuiux.

¹²Rvtueq, kvruex hez kuex lawc tvtsuingc vtueq tvyomx shuiuz; layx bac jix hez kuex tsuingshiq jvp yaq kvyuq rop nuiuz gay shuiuz.

¹³Tsuingshiq lotlaz kuex ghaq mungx nuex luip gay shuiuz; wulumx mungx nuex tsuinghez kuex khvrc taq shuiuz.

¹⁴Kvruex yimaq ngaz rueq mnoz kuex vphaungc shauk shauk tvtsvmc kvmc jix waz yaungx vtueq, mnoz rueq taungx wvnc toq kuex ngaz kvjungc taungx.

¹⁵Yungrex kuiux Behemot[35] kuex lawc shuiuz; piq kuex ngaz rueq tvdung sung tauk, mnoz muinz ngaz rueq tvdung sung phaungx. Piq kuex manx kuiux ikhoc namx phauk yaq,

¹⁶yuq muinz hungc vlaungc kuex piq gvnz nuex httax yaq, luimc vkawc htenc kuex vwuk thaq htenc nuex httax yaq!

¹⁷Vmiz kuex ruenx jungx ikhoc jvp ruiux, vwex thaq htenc kuex hungc hvlc httax yaq.

¹⁸Piq ruk vrawz htenc kuex nvyrvyx ikhoc tsanz yaq, piq yaz htenc kuex yanx pumz rulc rv-ngvlc yaq.

¹⁹Ngaz rueq tvdung sung tauk yung vyawx lotlaz wawc pinhtumc vwangc juing rvtueq! Piq tvdungc sungc jix Waz rueq dvyx piq kuex taungx lot yaq.

²⁰Yaruix ngvmx saz rvthaungx juing kuz htenc nuex piq tvkoc phuiuz vsvy juing namx tvkemz kuq yaq.

²¹Piq kuex shuiuq rumz htenc khung nuex bumx yaq, piq kuex bok htvmx nuex httax yaq may-o jungx htenc hvl nuex kvhttuiyq yaq.

²²Yuix ruilx kawx wawc shuiuq rumz htenc nuiyc phawx namx jungx htenc rueq piq kvwungx juing tvbuingc kuq yaq.

²³Piq kuex kuk laungx kaz yaq yuix ruilx muex muinz hiz muq; Yodan yuix rueq vhtvlx nuex htuiuz koq muinz kuiyqshuik dvyx rvyaq.

²⁴Vmuik kuex uraq tvmawz vtueq lac uraq lac lvp lot shvnx? Rvmuq ngoz ruiux bix tsvnc vtueq vkhuiz puc maq uraq lac lvp lot shvnx?