Read Tase Naga YOBA 9 Bible Online

YOBA 9 - Tase Naga bible

YOBA 9

¹Rvtueq, kvruex htenc lotlaz kuex kungkhux nuex ngaz rueq tay wvnc tauk. Yuq muinz miq kuex yvmx khoc maq lac Tishox rulc rvlongx vtueq taungx lot shix?

³Ukhaq lac vpiq rulc rv-khawc lvlc lot tvnx? Vpiq rueq uraq muinz tvralc lot muq bomc wiz hingshiz wiz lot yaq.

⁴Tishox kuex phaqjic nuiyc luimc vkawc yunghvlc httax yaq; uraq muinz vpiq kuex khawx lot muq.

⁵Vpiq rueq kanx htenc kuex huingc rvhek maq tvhttot gay ruiux, vpiq thuinkhvy phuk vtueq tvbac gay tueq.

⁶Tishox rueq gaqyung tvmux vtueq ghaq kuex buil tueq; vpiq rueq ghaq vhtuiz shec htung htenc kuex buil tueq.

⁷Vpiq rueq shalx dung yaq kvmuinz, raungyac nuex ruiysuiyq htenc lez yaq kvmuinz tvthauk gay lot yaq.

⁸Tishox rueq raungmungx kuex tvparc ruiux, svmuktvrax yungrex rawx htungx kvyuq vpiq rueq nuiuz yaq nuex[9] uraq muinz romc kuq muq.

⁹Tishox rueq raungx nuex Ruiywuic Poz, Kantux Pawz, Wupic Kung htenc nuiyc ghaqyaz ruiysuiyq htenc kuex pauk gay tueq.

¹⁰Vpiq rueq shuimx yaq yauk shuimc yunghvlc kuex naungshiq rueq tuiuz lot miq, vpiq rueq shuimx yaq vwangc juing kuex vhtumx ngoz tueq vguez.

¹¹Tishox lvy wvnc tueq, yuq muinz ngaz rueq khiz lot mauk.

¹²Vpiq rueq vroc phvnx htenc kuex vpiq rueq lvmz yaq, uraq muinz vpiq muex tvwanc lot muq; uraq muinz vpiq muex, “Mnoz rueq yvmx lac ruez vshuiux?” ngoz tueq wiz khvmc muq.

¹³Tishox thuinkhvy kuex shiz muq. Vpiq rueq vpiq kuex tuingshaung tvkoc svmuktvrax yungrex ngoz yaq Rahab[10] muex romc kuy jix vpiq ralx htenc kuex tvbunx gay tueq.

¹⁴Kvkhoc rvtueq ngaz rueq Tishox muex tvralc juing bomc yvmx wawc lac humc lot shaungx?

¹⁵Ngaz kuex mvrax vguez yuq muinz, ngaz rueq shuimx lot shaungx lotlaz kuex ngvy phoc waz Tishox kox wawc menjenc thoz ngoz tueq dvyx shex httax yaq.

¹⁶Kvkhoc rvtueq vpiq rueq ngaz kuex tvjungc tvbomc ruiux doc muinz, ngvy kvjaz kuex tay kuq phuex ngoz tueq ngaz kvmx lot mauk.

¹⁷Vpiq rueq raunghtiq raungguil tvkaz vtueq ngaz kuex yvmx mvrax muinz vguez rvhvt maq wung tvrul gay phuex.

¹⁸Vpiq rueq ngaz muex thuiuzthuic tvshup muq; vpiq rueq ngvy rullungx kuex vkhuip vkhaq maq tvmvrc kuq phuex.

¹⁹Ngvy hungc tvthauk aungx yaq haz? Tishox rulc hungc vlaungc rvlongx aungx yaq haz? Ngaz rueq vpiq kuex phoc waz rungx nuex shvlc lvy aungx yaq haz? Uraq lac vpiq kuex tvkaz lot shvnx?

²⁰Ngaz kuex mvrax vguez nuiyc tvmtuing rvtauk, yuq muinz ngvy kvjaz htenc rueq ngaz muex mvrax tvgurc phuex, ngaz kvjak taungx ruip rawx kuex ngaz muex htvp htaz kuy ikhoc dvyx yaungx yaq.

²¹Ngaz kuex mvrax kop muq, yuq muinz ngaz nuex yvmx wuez yaungx wvnc tvnx lvmz kuex wvlc guez tvyaungc tauk. Rullungx kuex tselc ngalc vshaungx. Yvmx muinz vkhek rvmuq; mvrax kop ruiux muinz, kop muq ngoz ruiux muinz, Tishox rueq naungshiq kuex tvbac gay phuex.

²³Mvrax kop muq waz kuex vhuingc rvhek laz maq thueyc kaz ruiux yuq, Tishox kuex vnuey rvyaq.

²⁴Tishox rueq mungkawx kuex miqyaq jix muex lekuq tueq. Vpiq rueq phoc waz bix lotlaz kuex muik mawz tvyaungc tueq. Vruex kuex Tishox rueq ruez muq ngoz ruiux uraq lac rvshvnx?

²⁵Ngvy raungnuiyq htenc kuex htat htat dvyx htumx wvnc tueq, nuiyqshiz wuic shiz rueq muinz ngaz muex vhvlx kuq muq.

²⁶Ngvy rullungx kuex yuz hvlc svngphox lix ikhoc, rabit phamx yaq lawx ikhoc htat htat dvyx lvy wvnc yaq.

²⁷Ngvy thuiuz vsac lauk gay tvkoc ngaz nueyx ruiux yuq, ngaz kuilc daz vtaungx lotlaz kuex ngaz muex romzyac tvkhic yek phuex; Tishox rueq ngaz kuex mvrax vhttax miq ngoz tueq ngoz shuex lvmz ngaz rueq tuiuz yaq.

²⁹Ngaz kuex mvrax vhttax rvtauk, yvmx ngoz tueq lac ngaz rvwvl kuilc daz taungx?

³⁰Yvmx khoc phvnx saqponc maq muinz ngvy mvrax htenc kuex tvsawc hoal lot mauk.

³¹Tishox rueq ngaz kuex suingkez phungc nuex tuip gay ruiux, ngvy khoz vkhvy rueq ngaz kuex suirsac phuex.

³²Tishox kuex miqsaz ngoz ruiux yuq, ngaz rueq vpiq muex tvralc lvp shaungx; rvmuq ngoz ruiux nvnueyc rv-ngoc ngac vtix kuex phoc kuy tvkoc rungx nuex kay juing rv-khvmz tueq.

³³Yuq muinz nvnueyc hvlwvl nuex tvraz tsaz kuy jix vguez, Tishox nuiyc ngaz kuex phoc kuy jix vshiz muinz vguez.

³⁴Tishox lex, ngaz muex murx nauk tvgurc vkueq! Mnoz muex kvhiz juing htenc kuex lvmz gay shuiuz!

³⁵Ngaz kuex hiz mauk. Ngvy thuinz vmungx kuex ngaz rueq tuiuz yaq ningkhvnc nuex ngaz kvjak vtaungx.