Read Tase Naga Tvtsvmc 115 Bible Online

Tvtsvmc 115 - Tase Naga bible

Tvtsvmc 115

¹O Yehowa lex, mnoz phaungx ngaungx yaq lungwawc nuiyc tvmtuing ningkhvnc nuex, mnoz ngauz vngax kuex mnoz nuex dvyx, mnoz nuex dvyx mhttax kueq, nuiyshiq nuex kvruex ngauz vngax kuex httax muq.

²“Nuimshiq Tishox kuex m-yuq lac httax yaq nguinx?” Ngoz tueq miqphvnx htenc rueq nuiyshiq muex yvmx ngoz tueq lac wiz yaq nguinx?

³Naungshiq Tishox kuex raungmungx nuex httax yaq; vpiq thuinroc yvmx yuq muinz vpiq rueq shuimx kaz yaq.

⁴Tsuingshiq tishox htenc kuimphox maq tvhungx ruiux, kvruex htenc kuex miq yauk maq tvhungx wvt taq tueq.

⁵Tsuingshiq kuex vnuix vhttax rvhvt maq kvjak lot muq, vmuik vhttax, yuq muinz khiz lot muq.

⁶Tsuingshiq nuex vnac httax yaq, yuq muinz tay lot muq, vkhuiz httax yaq, yuq muinz vthuingc shec lot muq.

⁷Tsuingshiq nuex yauk htenc httax yaq, yuq muinz shuimx lot muq, vyaz httax yaq, yuq muinz khuemx lot muq; tsuingshiq rueq thuic bomc kuex tvdung lot muq.

⁸Kvruex yac yuimx htenc kuex wvt tvhungx guirc jix htenc nuiyc tsuingshiq muex tvluimc jix htenc kuex tsuingshiq shuimx wvnc tueq yac yuimx htenc ikhoc m-yaungx wvnc kueq.

⁹Israel miqsaz htenc lex, Yehowa muex tvluimc wuez kuinz. Piq rueq nuimshiq muex romc kuq ruiux tvguing tvwungx kuq yaq.

¹⁰Tishox shomc waz bix lex, Yehowa muex tvluimc wuez shuinz. Nuimshiq muex romc kuq ruiux tvguing tvwungx kuq yaq.

¹¹Yehowa muex nawk palx jix lotlaz lex, vpiq muex tvluimc wuez shuinz. Vpiq rueq nuimshiq muex romc kuq ruiux tvguing tvwungx kuq yaq.

¹²Yehowa rueq nuimshiq kuex tvmaung lvp vtueq ruimruimx kuq kv-phuinx; vpiq rueq Israel miqsaz htenc muex nuiyc Tishox shomc waz bix muex ruimruimx kuq shuex.

¹³Vpiq muex tvtsanc nganc jix miq ruip rawx wawc, vyungx vruinx ngoz muq lotlaz muex ruimruimx kuq shuex.

¹⁴Yehowa rueq nuimshiq nuiyc nuimshiq suiuz vsaz htenc muex nuingc vnox mkuq kv-phuinx!

¹⁵Raungx nuiyc ghaq tvdungc sungc jix Yehowa rueq nuimshiq muex ruimrix mkuq shueq!

¹⁶Raungmungx kuex Yehowa rueq dvyx guimz yaq, yuq muinz ghaq kuex miqsaz muex kuq tueq.

¹⁷Vthueyc kay wuez jix htenc nuiyc kuiyqshuik kuiyqshix baung nuex kay wvnc jix htenc rueq Yehowa muex tvtsvmc lvp wuez yaq rvmuq.

¹⁸Yuq muinz rullungx tvraungx httax vtix naungshiq htenc kuex majuiuc vmaq phaungc vtueq, pattup pat-sac nuex httuiuc laz vpiq muex kejux vyungx ngoz vshix. Yehowa muex tvtsvmc wuez shuinz!