Read Tase Naga Tvtsvmc 116 Bible Online

Tvtsvmc 116 - Tase Naga bible

Tvtsvmc 116

¹Yehowa rueq ngaz muex tay kuy ningkhvnc nuex, ngaz rueq vpiq lungwawx vshaungx; vpiq rueq ngvy vjux thoz bomc kuex tay kuq yaq.

²Ngaz rueq vpiq gvl shaungx ruip rawx vpiq rueq ngaz muex tay kuq yaq.

³Vthueyc jak rueq ngaz kuex khup wvnc vtueq; vthueyc rueq ngaz kuex tvroz tuimz yaq; kvkhoc rvtueq ngaz kuex hisungx vtueq rvwvlc thuinz phez yaq.

⁴Kvkaq ngaz rueq, “Yehowa lex, ngaz rueq mnoz kox wawc thoz vphaungx ngaz kuex palc wvnc koq,” ngoz tueq Yehowa kuex gvl tauk.

⁵Yehowa kuex menjenc vhttax nuiyc vhvlx waz rvtueq; naungshiq Tishox kuex menjenc thuinz vhttax waz rvtueq.

⁶Yehowa rueq menjenc vsac miq htenc kuex tvguing tvwungx vtueq; ngaz vhiz vsungx rvhumc taungx nuex vpiq rueq ngaz palc wvnc phuex.

⁷Ngvy thuinz vmungx lex, Yehowa rueq ngaz muex vhvlx kejux tvkhic kuy ningkhvnc nuex kvmluimx kuiuz.

⁸Yehowa rueq ngaz kuex vthueyc wawc muinz, ngvy muik phic svrc yaq wawc muinz, ngaz kuix jel yaq wawc muinz palc wvnc phuex.

⁹Kvkhoc rvtueq tvraungx httax yaq jix htenc mungkawx nuex Yehowa khaungkac nuex ngaz khuemx taungx.

¹⁰“Ngaz kuex tvsawc ric nut gay rvhumc vtaungx,” ngoz tueq ngoz shaungx nuex doc muinz, ngaz kvmluimx hvt dvyx httax vtaungx.

¹¹Ngaz hisungx taungx nuex doc muinz “Ukhaq muex muinz tvluimc mauk,” ngoz tueq jungx tueq.

¹²Yehowa rueq ngaz muex kuq phuex kejux wvtaungx kuex yvmx maq lac shomc kuq shaungx?

¹³Ngaz muex palc kuy ningkhvnc nuex Yehowa muex kejux vyungx ngoc tvkoc vpiq muex svpiq tix shomc kuq vshaungx.

¹⁴Ngaz rueq vpiq muex bomkhvmc taq tauk rulc rv-ngvlc vpiq miqsaz lotlaz rvtuimx yaq phungc nuex ngaz rueq kvruex phvnx shaungx.

¹⁵Vpiq miqsaz htenc wawc vshiz shiz thueyc kaz ruiux yuq Yehowa kuex mtanc lac thuiuz yaq nguinx!

¹⁶Yehowa lex, ngaz kuex mnvrc waz rvtauk; inyuiuz rueq shuimx kuq wvnc tueq ikhoc ngaz rueq mnoz muex shuimx kuq phaungx. Mnoz rueq ngaz kuex vthueyc wawc palc wvnc phux.

¹⁷Kejux vyungx ngoz tueq shomc nawk juing htenc kuex ngaz rueq mnoz muex kuq phaungx, ngvy vjux thoz bomc maq mnoz muex shomc kuq vphaungx.

¹⁸Ngaz rueq mnoz muex bomkhvmc taq tauk rulc rv-ngvlc mmiqsaz lotlaz rvtuimx yaq phungc nuex muinz, Yerusalem wawc mnoz vsawc Shomc Yuimx nuex muinz, kvruex bomkhvmc kuex ngaz rueq phvnx shaungx. Yehowa muex tvtsvmc wuez shuinz!