Read Tase Naga Tvtsvmc 118 Bible Online

Tvtsvmc 118 - Tase Naga bible

Tvtsvmc 118

¹Yehowa kuex vhvlx ningkhvnc nuex vpiq muex kejux vyungx ngoz shuinz, vpiq lungwawc pattup pat-sac phaungx ngaungx yaq.

²“Vpiq lungwawc kuex pattup phaungx ngaungx yaq,” ngoz tueq Israel miqsaz htenc rueq mjungx wuez shueq.

³“Vpiq lungwawc kuex pattup phaungx ngaungx yaq,” ngoz tueq Tishox shomc waz hez rueq mjungx wuez shueq.

⁴“Vpiq lungwawc kuex pattup phaungx ngaungx yaq,” ngoz tueq vpiq muex jix lotlaz rueq mjungx wuez shueq.

⁵Ngaz jamjaux rvhumc vtaungx nuex Yehowa kuex ngaz rueq gvl tauk; vpiq rueq ngaz muex tvralc kuq ruiux tvdung wvnc phuex.

⁶Yehowa kuex ngaz rulc roc nuex httax yaq ningkhvnc nuex ngaz yvmx muex muinz hiz mauk; uraq lac ngaz kuex yvmx khoc lac rvlot phvnx?

⁷Yehowa kuex ngaz muex romc kuy jix waz ningkhvnc nuex, ngvy ralx htenc sumrumx wvnc tuex kuex ngaz rueq khiz shaungx.

⁸Miqsaz nuex kvguing kvgawx tix htauk nuex Yehowa muex tvluimc shix kuex vhvlx pinhtumc rvtueq.

⁹Miqsaz walaungx bix muex kv-guing kvgawx tix htauk nuex Yehowa muex tvluimc shix kuex vhvlx pinhtumc rvtueq.

¹⁰Ralx paunghvlc rueq ngaz kuex tuimx wvnc ruiux muinz; Yehowa luimc vkawc maq ngaz rueq tsuingshiq kuex tvbac lot vshaungx!

¹¹Tsuingshiq rueq ngaz kuex baung ruip saz maq tvroz tuimx wvnc ruiux muinz, Yehowa luimc vkawc maq tsuingshiq kuex ngaz rueq tvbac gay lot vshaungx!

¹²Tsuingshiq kuex nyaq ikhoc ngaz kox nuex kvtuimx wvnc ruiux muinz, shuiuq jungx khamc gay yaq ikhoc tsuingshiq kuex htat htat khamc gay yaq; Yehowa luimc vkawc maq ngaz rueq tsuingshiq kuex tvbac gay tauk.

¹³Ngaz kuex songhvlc khvt wvnc rvhumc vtueq sumrumx wvnc dvnc vshaungx, yuq muinz Yehowa rueq ngaz muex romc kuq phuex.

¹⁴Yehowa rueq ngaz muex luimc vkawc yunghvlc nuiyc hungc vlaungc tvmvrc kuq vtueq; vpiq rueq ngaz palc wvnc phuex.

¹⁵Tishox miqsaz tap htenc nuex kokez juing nuiyc palc daungc wvnc juing thuic bomc dung yaq: “Yehowa rueq luimc vkawc hungc maq vwangc juing kuex shuimc wvnc tueq!

¹⁶Vpiq luimc vkawc maq naungshiq muex tvtaungx wvnc lvmx kuq phuex, vpiq luimc vkawc maq ralx kuex khvt taungx gay tueq!”

¹⁷Ngaz kuex thueyc wvnc taungx rvmuq, kvkhoc tvraung, ngaz tvraungx httax vtueq, Yehowa rueq shuimx wvnc tueq yauk shuimc htenc kuex jungx tvkhic kuq shaungx.

¹⁸Vpiq rueq ngaz kuex songhvlc maq murx tvgurc phuex, yuq muinz vpiq rueq ngaz kuex tvthueyc gay muq.

¹⁹Ngvy tvkoc Shomc Yuimx kaluix kuex daz kuq koq; ngaz nyuip wvnc vtueq Yehowa kejux kuex tvtsvmc shaungx!

²⁰Vruex kaluix kuex Yehowa kaluix khuec nuex tsuingrux jix bix dvyx nyuip lvp tuex.

²¹Yehowa lex, mnoz rueq ngaz muex tvralc kuq vtueq, ngaz muex tvtaungx kuy ning-khvnc nuex ngaz rueq mnoz muex tvtsvmc vphaungx.

²²Yuimx guirc jix htenc rueq vtvdux gay lung kuex lotlaz muex vkhek pinhtumc vshuk htung muex yaungx wvnc tueq.

²³Vruex kuex Yehowa rueq vshuimx yauk shuimc rvtueq; kvruex kuex naungshiq khaung-kac nuex vwangc juing yaungx kaz nyix!

²⁴Vruex raungnuiyq kuex Yehowa rueq taungx wvnc tueq raungnuiyq rvtueq; naungshiq vkoz vkez maq tv-tsuingc tvy moalx tvhungx wuez ix!

²⁵Yehowa lex, nuiyshiq kuex palc wvnc koq, nuiyshiq kuex palc wvnc koq! O Yehowa lex, nuiyshiq muex tvtaungx wvnc kuq koq!

²⁶Yehowa muingc maq httuiuc kay jix waz muex Tishox rueq ruimc mruimx kuq shueq! Yehowa Shomc Yuimx maq nuiyshiq rueq mnoz muex tvtsvmc vshix.

²⁷Yehowa kuex Tishox rvtueq; vpiq rueq naungshiq muex kejux kuq yaq. Nuimshiq yauk htenc nuex namtuz kuex shuimx wuez vtueq moalx phaungc wvnc yaq nuex shomrawx kuex tvroz khuemx kuinz.

²⁸Mnoz kuex ngvy Tishox rvtoq ngaz rueq mnoz muex kejux vyungx ngoz vphaungx; Mnoz yungx luz vtuiux lvmx kuex ngaz rueq jungphvnx vshaungx.

²⁹Vpiq vhvlx ningkhvnc nuex Yehowa muex kejux vyungx ngoz shuinz; vpiq lungwawc kuex pattup phaungx ngaungx yaq.