Read Tase Naga Tvtsvmc 16 Bible Online

Tvtsvmc 16 - Tase Naga bible

Tvtsvmc 16

¹[14] O Tishox lex, ngaz kuex mnoz kox nuex kvwungx vtaungx; kvwungx httaz tvkoc ngaz mnoz muex tvluimc vphaungx.

²Ngaz rueq Yehowa muex, “Mnoz kuex ngvy Yehowa rvtoq; vhvlx phvnx htenc lotlaz kuex mnoz kox wawc jvnc rvtueq,” ngoz tueq jungx tauk.

³Yehowa muex tvmtuing httaz jix miqsaz htenc kuex mtanc lac hvlx rix yaq nguinx! Tsuingshiq rulc vdvmz httaz kuex ngaz muex vpiauc pinhtumc rvtueq.

⁴Vganc tishox htenc kvnvp naungc jix htenc kuex tsuingshiq shauk pumz nuex kuilc daz lvmx paunghvlc rvhumc wvnc tuex. Tsuingshiq rueq shomc nawk kuq yaq kvyuq ngaz kuex lomx mauk; tsuingshiq tishox htenc kuex ngaz rueq nawk palx mauk.

⁵Yehowa lex, ngaz nuex httax yaq lotlaz kuex mnoz taungx wawx jvnc rvtueq, mnoz rueq ngaz muex rax yaq phvnx lotlaz kuex kuq phux; max kox wawc ngvy pat kvmuinz m-yauk nuex httax yaq.

⁶Ngaz muex mnoz rueq kuq phux yauk noalc htenc kuex vwangc juing rvtueq; kvruex kuex mtanc lac hvlx yaq nguinx!

⁷Yehowa rueq ngaz muex lvmx shvlc kuy ningkhvnc nuex ngaz rueq vpiq muex tvtsvmc vshaungx, vhvlx vbac thvl httauk thuinz rueq raungwvrx nuex ngaz muex honc tvsvmz kuq yaq.

⁸Yehowa kuex ngaz rulc vdvmz httax yaq kuex ngaz rueq mkaq muinz tuiuz vshaungx; vpiq kuex ngvy hep nuex httax yaq ningkhvnc nuex yvmx rueq muinz ngaz kuex tvhiz sungx lot phuex rvmuq.

⁹Kvkhoc rvtueq ngaz rueq kejux tvtsvmc ruiux kokez vtaungx, ngaz kuex vhiz rac muq kvwungx vtaungx,

¹⁰yvmx khoc lac ngoz ruiux lec vpiq rueq ngaz kuex ngarvyx mungx nuex kay tvkoc vkhangx kuq phuex rvmuq, ngaz rueq yauk shuimc kuex tvmtuing maq shuimx wvnc tauk, wulumx mungx nuex ngaz kuex tuip gay phuex rvmuq.

¹¹Mnoz rueq ngaz kuex rullungx tvraungx lvmx tvkhic kuq phux; mnoz ngauz vngax rueq ngaz muex vkoz vkez thuinz tvmvrc kuq vtueq, vraungc raq juing lvmx pattup kuq vphux.