Read Tase Naga Tvtsvmc 56 Bible Online

Tvtsvmc 56 - Tase Naga bible

Tvtsvmc 56

¹[56] O Tishox lex, ngaz kuex vkhvt vlungc rvhumc vtaungx, ngaz muex menjenc kuq koq; ngvy rax htenc rueq ngaz kuex vkhing ruip rawx guirguenz yaq.

²Ngvy ralx htenc rueq ngaz kuex nuiyqtuimc khvt yaq. Ngvy khvt jix kuex paunghvlc paung yaq.

³Tvphaungc Tvsuip Yehowa lex, ngaz hisungx vtaungx nuex mnoz muex ngaz rueq tvluimc vphaungx.

⁴Ngaz kuex Tishox muex tvluimc ningkhvnc nuex hiz mauk; vpiq rueq vkuq bomkhvmc ningkhvnc nuex ngaz rueq vpiq muex tvtsvmc shaungx. Miq rueq ngaz kuex yvmx khoc lac rvlot phvnx?

⁵Ngvy ralx htenc rueq ngaz kuex nuiyqtuimc tvkuilc daz yaq; ngaz kuex lvmx shishiz maq tvthuiuz sac tvkoc tsuingshiq rueq mkaq muinz kvmungx wuez yaq!

⁶Tsuingshiq kuex kvhttuiyq juing baung nuex rvtuimx vtueq, ngaz rueq shuimx shaungx phvnx ruip saz kuex si-khvyx lawc yaq.

⁷O Tishox lex, tsuingshiq honc bac ningkhvnc nuex tsuingshiq muex murx tvgurc shuiuz; mthuinz khvy kvmaq kvruex miq htenc kuex taungx gay shuiuz!

⁸Ngaz kuilc daz rvhumc vtaungx kuex mnoz rueq tuiuz yaq; ngvy muik phic htenc kuex mnoz wuiyq tvtsuingc taq shuiuz. Mluik dvp nuex wvl tvtsuingc taq shec toq rvmuq haz?

⁹Ngaz rueq mnoz gvl phaungx raungnuiyq nuex, ngvy ralx htenc kuex yix kox nuex yek wvnc rvhumc tuex. Tishox kuex ngvy kox nuex httax yaq ngaz rueq tuiuz vshaungx,

¹⁰Yehowa bomkhvmc htenc kuex ngaz rueq tvtsvmc vshaungx.

¹¹Vpiq muex ngaz rueq tvluimc vshaungx ningkhvnc nuex ngaz hiyaz taungx rvmuq. Miqsaz rueq ngaz kuex yvmx khoc lac ruez lot phvnx?

¹²O Tishox lex, ngaz rueq mnoz muex bomkhvmc kuq phaungx rulc rv-ngvlc tvmtuing maq tvralc phaungx; kejux vyungx shomc kuy kuex mnoz muex kuq phaungx,

¹³yvmx khoc lac ngoz ruiux lec mnoz rueq ngaz kuex vthueyc juing wawc palc wvnc vtueq tvsumx rumx muq ningkhvnc nuex rvtueq. Kvkhoc rvtueq ngaz kuex rullungx tvraungx httax yaq jix htauk nuex wuix yaq raungwuic ngoz yaq, Tishox khaungkac nuex ngaz khuemx shamx vtaungx.