Read Tase Naga Tvtsvmc 96 Bible Online

Tvtsvmc 96 - Tase Naga bible

Tvtsvmc 96

¹Yehowa muex shic vnyalx maq shix ngoyx wuez kuinz! Mungkawx lotlaz rueq Yehowa muex shix ngoyx wuez kuinz!

²Yehowa muex shix wuez kuinz, vpiq muex tvtsvmc wuez shuinz! Vpiq rueq naungshiq palc wvnc phuex lvmx thuix thaungx vhvlx kuex wvraungx nuiyq jungx tvtay kuq shuinz.

³Miq phvnx htenc muex vpiq ngauz vngax lvmx, miqsaz lotlaz muex vpiq raungc hvlc yauk shuimc htenc kuex jungphvnx wuez shuinz.

⁴Yehowa kuex yunghvlc ningkhvnc nuex pinhtumc tvtsvmc aungx yaq waz rvtueq; tishox htenc lotlaz rueq vpiq muex tvtsanc nganc kuy aungx yaq waz rvtueq.

⁵Vganc miqphvnx lotlaz tishox htenc kuex yac yuimx htenc dvyx rvtueq, yuq muinz Yehowa kuex raungx tvdungc sungc jix waz rvtueq.

⁶Ngauz vngax nuiyc yunghvlc ngauz vngax rueq vpiq tvroz tuimz nuex httax ruiux; luimc vkawc nuiyc svp rvp hvlc kuex vpiq Shomc Yuimx nuex mvrc yaq.

⁷Ghaq ruiykhuix wawc miqsaz lotlaz lex, Yehowa muex tvtsvmc wuez shuinz; vpiq ngauz vngax nuiyc hungc vlaungc kuex tvtsvmc wuez shuinz.

⁸Yehowa ngauz vngax muingc jungc kuex tvtsvmc wuez shuinz; vshomc kuy juing kuex lvmz wvnc vtueq vpiq Shomc Yuimx mungx nuex nyuip wuez kuinz.

⁹Vpiq dung kvkhic tuex nuex Vsawc Waz htumc nuex bumx wuez kuinz;[96] ghaq wvtaungx vpiq khaungkac nuex kvkhuirc kawc yawc wuez kuinz!

¹⁰“Yehowa kuex hokhvmx rvtueq! ghaq kuex phaungx duingduing vpiq rueq tvhungx taq ruiux, kvruex kuex kvmoay rvyaq rvmuq; vpiq rueq miqsaz htenc kuex tvrac vlvmz maq phox kuq shuex,” ngoz tueq miqphvnx lotlaz muex jungx shuinz.

¹¹Ghaq nuiyc raungx lex, vshuenc vruenc httax wuez kuinz! svmuktvrax nuiyc kvyuq httax yaq vtvraungx phvnx ruip rawx lex, vpiq muex yunghvlc maq guyc wuez kuinz;

¹²yaruix tvnx htenc nuiyc kvyuq httax yaq phvnx ruip saz lex, shuenruenz wuez kuinz! Yaruix wawc pulx jungx htenc vkoz vkez maq guyc sez wuez tuex nuex,

¹³Yehowa kuex ghaq guimz tvkoc httuiuc kaz tuex. Vpiq rueq mungkawx miqsaz htenc kuex tvrac vlvmz nuiyc vsawc maq guimz lawc shuex.