Read Tase Naga BOMC TVGUIP 11 Bible Online

BOMC TVGUIP 11 - Tase Naga bible

BOMC TVGUIP 11

¹Yehowa rueq tawk vyaq shuimc jix kuex vshuiuc pac rvyaq. Vpiq kuex tawk lung rvkhauk shuimc jix muex vkokez rvyaq.

²Vngamc boq jix kuex vlox nuex dvyx yvlc svy rvhumc tuex. Thuinz tvyomx tv-nyenc jix kuex tharc vhttax rvtueq.

³Mnoz miq hvlx ngoz ruiux kuex, kenrix lvmx nuex mnoz rueq phvnx vshuiux. Tvluimc juing lvp muq miqsaz htenc kuex tsuingshiq tsuingmuq ruxmuq ningkhvnc nuex tvbac gay rvhumc yaq.

⁴Vthueyc nuex mhtvlx tvmuiz shuiux raungnuiyq tsak vnyvmx rueq mnoz muex yvmx muinz rvkuq lot muq, yuq muinz vtsuing vrux rueq mrullungx kuex palc wvnc lot shuex.

⁵Thuinz vtsuing vrux jix htenc rueq miq hvlx waz rullungx kuex tvsvp rvp kuq yaq, yuq muinz layx bac jix waz kuex miqmac sumx juing lvmx dvyx tvyaungc yaq.

⁶Tsuingrux lvmx rueq vtsuing vrux jix waz kuex tvguing yaq, yuq muinz tvluimc juing vguez waz kuex piq kvkax wax yaq bix nuex manz yaq.

⁷Layx bac jix waz thueyc kaz ruiux yuq, piq thuinz tvluimc yaq lvmx kuex piq rulc roc nuex moz wvnc yaq. Tsak vnyvmx muex kvmluimx kuex khuec guez dvyx yaungx yaq.

⁸Tsuingrux jix kuex vkuilc vdaz mungx wawc tvkhup wungx rvhumc yaq; kuilc daz kuex piq kox nuex httuiuc tvraung layx bac waz kox nuex httuiuc tuex.

⁹Tishox vguez miqsaz htenc rueq jungx yaq kvjaz maq nuimshiq bac wvnc vtuinx, yuq muinz tsuingrux jix taksux tharc rueq nuimshiq kuex palc daungc lot yaq.

¹⁰Vtsuing vrux jix miqsaz htenc phoay rungx ruiux yuq wvghaq tuimx kokez wuez yaq, layx bac jix miq thueyc kaz ruiux yuq kuex ghaqyungx kvyuq vkoz vkez guyc sez wuez yaq.

¹¹Tsuingrux jix rueq ruimruimc kuy ningkhvnc nuex ghaqyungx kuex vyungc vloayc rvwvnc yaq; layx bac jix htenc bomc vnyamc rueq ghaqyungx kuex tvbac gay yaq.

¹²Vganc jix muex shummarc ngoc ngac kvjaz kvjak jix kuex miqyaq rvtueq. Mkhoc shoc maq mnoz wvtharc waz ngoz ruiux kuex kuiyqshuik dvyx httax tuex.

¹³Miq jungc svy kvjaz kvjak jix ukhaq muex muinz vpuingc pvy mvy yaq lvmx nuex tvluimc lot miq, yuq muinz tvmtuing thuinz httax yaq waz muex mnoz rueq tvluimc lot shuiux.

¹⁴Mungtan nuex lvmx shvlc jix vguez ngoz ruiux mungx miqsaz htenc kuex vsumx rvwvnc tuex. Honc vtharc jungc kuy jix vpaung httax ruiux kvguing kvwungx juing lvp yaq.

¹⁵Juiuc vwuinz waz htawz htuimc kuex mnoz rueq kuy tvkoc bomkhvmc taq ruiux mnoz vyonz juing rvhumc tuiux. Kvruex yuq mnoz lomx naungx muq ngoz ruiux mnoz muex vhvlx pinhtumc rvtuex.

¹⁶Kenrix rix yalxjuik nyuiuz kuex miq rueq tvtsanc nganc rvhumc yaq, yuq muinz htoksuiuz pawxsaz nyuiuz kuex yvlc svy rvhumc yaq. Vduimz vlemz miqsaz rueq kuex mkaq muinz kuimphox httax tuex rvmuq, yuq muinz yauk shuimc hunglaungc jix miq kuex luiz waungx yaungx tuex.[1]

¹⁷Miq muex menjenc kuy thenc jix waz kuex miqmac shauk pumz muex menjenc rvhumc lvmz shuimc dvyx rvtueq. Mkhoc shoc maq mnoz menjenc vguez ngoz ruiux, mshauk pumz kuex tvthuiuz sac vshuiux.

¹⁸Layx bac jix miqsaz htenc rueq vsuing yvmx muinz lvp luz rvmuq, yuq muinz vlvmx yauk shuimc mnoz rueq shuimx ruiux kuex somraungc yauk noalc lvp wvnc shuiux.

¹⁹Vlvmx yauk shuimc tvkoc thuinz httaz jix waz kuex rullungx tvraungx httax tuex, yuq muinz vyaq yauk shuimc shuimc jix waz kuex vthueyc rvwvnc tuex.

²⁰Yehowa rueq honc vbac thuinz httaz jix miq htenc kuex vshuiuc rvyaq, yuq muinz vlvmx yauk shuimc jix htenc kuex vlungwawc rvyaq.

²¹Honc vbac jix miqsaz htenc murx tvgurc rvhumc tuex kuex mnoz rueq rvwvl lvp hvt ruez vshuiux, yuq muinz tsuingrux miqsaz htenc kuex dung wvnc wuez tuex.

²²Vhvlx phoc thamc thuinz vguez nyuiuz kuex vshvmx svp ruiux muinz wauk kuiux khuiz kuimx nuex kuimshawx tumx vbvt kuq rulc rv-ngvlc yaq.

²³Miq hvlx jix htenc rueq vhvlx phvnx htenc kuex mkaq muinz rvnphvnx wuez yaq; layx bac jix htenc tsuingshiq rueq roc yaq phvnx kuex lvp luz wvnc ruiux yuq, miq ruip rawx thuinkhaq wuez yaq.

²⁴Miq wvyvmc rueq miqmac kuimphox kuex wuinc httaungc wuinc httix shuimx ruiux muinz rungwanx wvnc ruq dvyx rvyaq. Wvyvmc kuex pejic khaq maq shuimx ruiux muinz htemrvmz wvnc ruq dvyx rvyaq.

²⁵Vkuy vnoalc roc thuinz maq kuy jix waz kuex vrungx wanx rvwvnc tuex. Miq muex romc kuy jix waz kuex vromc kuy rvhumc tuex.

²⁶Tsvmz kuex yaolc taq vtueq vhtawz duic yaq nuex jix shaungc jix waz kuex miq rueq vhttonc rvyaq, yuq muinz taq muq maq shaungc kuy jix waz kuex tvtsvmc kvmc rvyaq.

²⁷Mnoz rueq kvmungx vshuiux lvmz vhvlx ngoz ruiux kuex mnoz muex tvtsanc nganc rvhumc tuiux, vkuilc vdaz kuex mnoz rueq thuiyx ruiux yuq, kvruex mnoz rvhumc tuiux.

²⁸Miqmac tsak vnyvmx nuex rvwak jix waz kuex raungluimc yac nuex pulx yauk htenc ruk yaq ikhoc yaungx tuex, yuq muinz tsuingrux jix htenc kuex raunglawc yac wawc pulx yauk htenc ikhoc wuil wvnc tuex.

²⁹Miqmac yuimx taungx nuex kuilc daz lvmc wvnc jix waz kuex vtvsuip nuex sawkumx rvtuex. Miqyaq jix htenc kuex wvtharc jix nvrc waz muex mkaq muinz yaungx tuex.

³⁰Tsuingrux lvmx rueq rullungx thuiuzthuic kuex kuq yaq, yuq muinz yauk laungc yalawx yauk shuimc rueq kvruex lvmz gay yaq.

³¹Miq hvlx jix htenc rueq ghaq htauk vmaq yauk noalc lvp wuez yaq, layx bac jix htenc nuiyc mvrax vhttax jix htenc rueq murx gurc lvmz mnoz rueq rvkhauk laz tuiuz wvnc shuiux.