Read Tase Naga BOMC TVGUIP 30 Bible Online

BOMC TVGUIP 30 - Tase Naga bible

BOMC TVGUIP 30

¹Vruex kuex Jake saz Agura rueq vjungx kvjaz htenc rvtueq: “Tishox kuex ngaz rulc vdvmz rvmuq, Tishox kuex ngaz rulc vdvmz rvmuq, ngaz kuex kvkhuirc dvndvnz httax vtaungx.

²Ngaz kuex miqsaz htauk nuex ngvmx saz rulc waz rv-ngvlc vtaungx; miqsaz nuex httax yaq kvmungx tharc kuex ngvy htauk nuex vguez.

³Ngaz rueq mkaq muinz taksux tharc tvluing mauk doc, Tishox nuex seng yaq lvmx yvmx muinz ngaz rueq tuiuz mauk.

⁴Raungmungx nuex seng vtueq phaqjic kuex uraq lac shvmhvlx thenc yaq nguinx? Vyauk maq raungguil lvp tvy shec jix kuex ukhaq lac httax yaq nguinx? Khvymvnz nuex yuix htawp jix ukhaq lac httax yaq nguinx? Ghaq ruiy htenc kuex uraq lac tv-phaungx ngaungx taq tvnx? Piq kuex ukhaq lac? Vsaz kuex ukhaq lac? Mnoz rueq tuiuz shuiux haz?

⁵“Tishox kuex vpiq rueq vtaq bomkhvmc htenc nuex tvmtuing httax yaq, vpiq kuex vpiq kox nuex kvguing jix lotlaz tvkoc lak ikhoc rvtueq.

⁶Vpiq rueq mkaq muinz jungx muq phvnx shishiz kuex vpiq rueq jungx tueq ngoz tueq vsuing jungx ruiux yuq, mnoz vrot waz rvtoq kuex vpiq rueq tvkhic vtueq mnoz kuex tvtharc kv-phux.”

⁷Tishox lex, ngaz max thueyc kaz nuex mnoz kox wawc phvnx nueyc thoz vphaungx:

⁸Vrot vkaq kvjaz kvjak tauk wawc ngaz kuex tvgawx tvyal wvnc koq, luiz waungx nuiyc htemc saz muinz ngaz nuex yaungx muq mruez kueq. Kvkhoc rvtueq ngaz muex rax yaq phuiuz vsvy dvyx ngaz muex kuq koq.

⁹Kvruex htauk nuex jvnc vtueq ngaz rueq lvp luz ruiux yuq, ngaz rueq mnoz kuex roc mauk ngoz tueq jungx ikhiq. Yuq muinz ngaz htemrvmz ruiux kuex ngaz rueq vguiuq raz tueq, ngvy Tishox muex yvlc svy juing tvyaungc ishaungx.

¹⁰Jiyungx waz htumc nuex nvrc waz hez kuex mkaq muinz mvrax thuiyc bomc nauk jungx saq kaz. Kvkhoc ngoz ruiux mvnhttonc kuex mnoz rvhumc vtueq vjamz vjaux kuex rvhumc tuiux.

¹¹Miq wvyvmc jix rueq vwaz muex mvnhttonx kuq ruiux, miqmac nyuiuz muex kejux tvyez muq.

¹²Miq wvyvmc kuex pinhtumc miqsuirc vsac httax yaq rvhvt maq, vsawc waq httax vtix ngoz tueq tvmaung jix httax yaq.

¹³Tsuingshiq kuex mtanc lac hvlx yaq nguinx, tsuingshiq kuex pinhtumc hvlx vtix ngoz tueq tvmaung jix miq muinz httax yaq!

¹⁴Htemc saz jix htenc nuiyc lvp muq luz muq rax thuiyc yaq jix htenc kuex menjenc muq maq tuinghtuing vtueq, tvbac jix miq htenc httax yaq; kvkhoc ruez yaq kuex tsuingshiq wuk kvdungc gay yauk shuimc rvtueq.

¹⁵Tvwvt nuex vsaz vnueyc httax yaq, kvruex nueyc muingc kuex “Kuq kuit!” ngoz tueq muingc tueq. Mkaq muinz thuinroc lvmx mvrc lot muq phvnx bvlic httax yaq kuex:

¹⁶wulumx mungx, saguez adum nyuiuz, raungyunx muq httuiz rawk yaq ghaq, tvmut mvy muq wvr htenc rvtueq.

¹⁷Vwaz muex nueykuic jix waz, rullungx wikuiux shex vnyuiuz rueq nvr yaq kvjaz kuex wvlc guez tvyaungc jix ukhaq yuq muinz, tsvy hvlc wu-khax htenc rueq vmuik kuex htuiuc tv-phuk gay ruiux lawx tawx htenc rueq piq maungx kuex phuiuz gay aungx yaq.

¹⁸Ngvy tvkoc vtuiuz lot mauk juing tanc khvnc vwangc juing phvnx bvlic httax yaq kuex:

¹⁹raungx nuex baz yaq lawx, lung rauk htauk nuex khuemx yaq puiuc, svmuktvrax htauk nuex vlvmx tv-phvnc khuemx yaq svngpholix, rvlungwawc yaq miqwaz nuiyc yalxjuik htenc rvtueq.

²⁰Vruex kuex tvmtuing httax muq miqjuik nyuiuz honc vyaungc rvtueq: piq kuex miq taungx waz rulc htokpawx vtueq, yuix rvhoalc lot yix, “Ngaz yvmx muinz yaq mauk!” ngoz tueq jungx yaq.

²¹Ghaq rueq nanx lot muq phvnx bvlic httax yaq kvruex kuex:

²²hokhvmx yaungx wvnc tueq dax waz, phoay laz phuiuz svy jix vngaz waz,

²³miq shuiuc vsac rvhvt maq vtaungx waz lvp tueq, jiyungx nyuiuz yelx lvy jix nvrc nyuiuz hez rvtueq.

²⁴Mungkawx nuex vruinx pinhtumc yuq muinz, tharc httaz hvlc ngvmx saz phvnx bvlic httax yaq.

²⁵Sisawx: kvruex kuex hungc vlaungc vnulx, yuq muinz raungluimc yac tvkoc phuiuz vsvy yoalc taq yaq.

²⁶Waukpot: kvruex kuex hungc vlaungc vkomc dvyx, yuq muinz lungshaung hvl nuex tsuingshiq httaz juing tvhungx taq yaq.

²⁷Kup jawrawx: tsuingshiq nuex hokhvmx vguez, yuq muinz vdaungx maq rvtul khuemx yaq.

²⁸Tsaungkhuiux: m-yauk nuex khunc gay lot shuiux, yuq muinz hokhvmx hoc nuex httax yaq kuex khiz lvp vshix.

²⁹Lvmx khuemx ruiux yuq vkix tvjauz vtueq khuemc jix phvnx bvlic httax yaq kvruex kuex:

³⁰hangsic, ngvmx saz lotlaz htauk nuex hungc vlaungc httaz hvlc rvtueq ukhaq muex muinz hiz muq;

³¹khelkhix, vkvmx juing ikhoc khuemx yaq wupung waz, nuiyc mungx miqsaz htumc nuex jvp yaq hokhvmx bix htenc rvtueq.

³²Tuluimc thuinz httax vtueq miqyaq yaungx ruiux honc vbac yauk shuimc kuex mnoz rueq kvmungx ruiux yuq, kvruex htenc kuex tvthauk gay ruiux, tvmaung shuiuz!

³³Mnoz rueq puix kuex tvshot ruiux yuq, kiauc lvp shuiux. Miq washiz khuiz kuex mnoz rueq yauk htuimx maq htuiuz ruiux, tvguiy dung yaq. Mnoz rueq thuinkhvy kuex tvdung ruiux yuq kuilc daz rvhumc tuiux.