Read Tase Naga SOLOMON SHIC 2 Bible Online

SOLOMON SHIC 2 - Tase Naga bible

SOLOMON SHIC 2

¹Ngaz kuex Sharon warc tvnx nuex kemz yaq yaruix pulx puic, kuz tvnx nuex kemz yaq yaruix pulx puic dvyx rvtauk.

²Ngaz rueq lungwawc vshaungx yunx nyuiuz kuex yalxjuik rulx phungc nuex shuiuq rumz mungx nuex yaruix pulx puic jungx ikhoc rvtueq.

³Ngaz rueq lungwawc hvlc sanx waz kuex, vganc miqwaz rulx rulc tv-ngvlc lawc ruiux yuq, piq kuex pulx rox wawc pulx jungx htenc mungx nuex kemz yaq apple jungx ikhoc rvtueq. Ngaz kuex piq luimc khung nuex httaz tvkoc raungc raq vshaungx, kvruex thuey saq ruiux ruimc hvlc rvtueq.

⁴Sanx waz rueq piq phuiuz svy moalx tvhungx yaq kvyuq ngaz kuex shvlx wvnc vtueq, ngvy htauk nuex lungwawc thuinz maq puingc wvnc phuex.

⁵Ngaz kuex lungwawc thuinz ningkhvnc nuex rvyuiuq wak httaz vtaungx, Piq rueq svpiq thuey shanx htenc maq hunglaungc tvmvrc kuq koq, apple thuey htenc maq hunglaungc tvlvp kuq koq!

⁶Piq yauk phvrx kox kuex ngvy khux khung nuex taq ruiux, piq yauk keq kox maq ngaz kuex got yaq.

⁷Yerusalem shvlx rulx lex, nvnueyc rvlungwawc lvmx kuex, tuingshaung miq ngoz tueq bomkhvmc kuq kuit; lvwvnz hvlc khiyix muingc kuex jungx vtueq kvtuemc wuez kuinz.

⁸Ngaz rueq lungwawx vshaungx waz tvruingc kuex ngaz rueq tay tauk. Piq rueq kuz vkanx htenc yanz yuz wvnc vtueq ngaz kox nuex kaz yaq.

⁹Ngaz rueq lungwawx vshaungx waz kuex khiyix ikhoc muinz, juk pung ikhoc rvtueq. Piq kuex khoalx tuk hep nuex jvp yaq. Katvnc puc maq lawc vtueq khoalx puc maq ngaz kuex siz lawc yaq.

¹⁰Ngaz rueq lungwawx vshaungx waz rueq ngaz muex jungx phuex. Lungwawc vphaungx yunx nyuiuz lex, kaz loq; ngaz rueq lungwawc hvlc nyuiuz lex, ngaz rulc vdvmz kaz ix.

¹¹Raunglawc yac vhtumx kay wuez; raungx muinz yunx muq shex;

¹²yaruix rumz htenc nuex pulx puic htenc puic wuez yaq. Vruex jauz kuex wushawx thuic jauz shex; wuik vnax htenc nuex muinz hituiuc htenc thuiz yaq.

¹³Phuiuq muiuq thuey muinx phaungx yaq shex; svpiq thuey puic thuingc homc htenc raungguil rulc lomx yaq. Lungwawc vphaungx yunx nyuiuz lex, kaz loq; ngaz rueq lungwawc hvlc nyuiuz lex, ngaz rulc vdvmz kaz ix.

¹⁴Mnoz kuex lungshuk lunghvl nuex kvhttuiyq yaq hituiuc ikhoc rvtoq. Vlungwawc svy juing mhtvlx kuex tvkhic koq, piauc hvlc mthuic mbomc kuex tay roc.

¹⁵Svpiq ruiuz htenc tvbac yaq shoalx htenc nuiyc shoalx sahez htenc kuex lvp shuiuz, naungnueyc svpiq ruiuz htenc muinz vpuic shex rvwuez yaq.

¹⁶Ngaz rueq lungwawx vshaungx waz kuex ngaz muex, ngaz muinz piq muex rvtauk. Piq rueq yaruix pulx puic roz nuex khelbuenx htenc muex tv-phauk yaq.

¹⁷Ngaz rueq lungwawx vphaungx waz lex, raungnvp raungwuic max httuiuc raungnyauk max lawz wvnc nuex kvroz vtueq, Bethera kankhux nuex httax yaq, khiyix nuiyc juk pung ikhoc yaungx kuiuz.[2]