Read Tase Naga SOLOMON SHIC 3 Bible Online

SOLOMON SHIC 3 - Tase Naga bible

SOLOMON SHIC 3

¹Ngaz kuex ngvy woalchuing nuex kvtsoalx yaq nuex, wvraungx wvrx wvrx ngaz rueq lungwawx vshaungx waz kuex maung vshaungx; ngaz rueq piq kuex thuiyx koq muinz humc mauk.

²Ngaz kuex kvtenc ruiux ghaq yungx nuex khuemx kaz vtueq, lvmx yungx lvmx saz htenc nuex ngaz rueq lungwawx vshaungx waz kuex thuiyx tauk, yuq muinz humc mauk.

³Ghaqyungx bvmc jix hez rueq ngaz kuex khiz phuex. Tsuinghez muex, “Ngaz rueq lungwawx vshaungx waz humc muit haz?” ngoz tueq wiz tauk.

⁴Ngaz kuex tsuinghez kox maq kay wvnc rac, piq kuex humc tauk. Ngaz rueq piq kuex tvkaz mauk maq got shuimx vtueq, inyuiuz yuimx nuex shvlx laq ruiux, ngvy jawc juing khok nuex shvlx wvnc tauk.

⁵Yerusalem shvlx rulx lex, nvnueyc rvlungwawc lvmx kuex, tvwanc miq ngoz tueq bomkhvmc kuq kuit; lvwvnz hvlc khiyix muingc kuex jungx vtueq kvtuemc wuez kuinz.

⁶Murra, Loban nuiyc pvkac pvylvyc jix rueq vshaung kuq, vhomc vtumc phvnx ruip saz kuex wvr khuiuq tuz ikhoc, kumtsvy tvnx maq dung yaq kuex yvmx lac rvtvnx?

⁷Lawc shuinz, miq htenc rueq Solomon kuex kankoz htauk nuex pix wvnc yaq; Israel mungx wawc vthvl taq nolaungx bix rok tvruk rueq muinz, bvmc hvt maq kaz naungx yaq.

⁸Tsuinghez lotlaz rueq yaung soalc thenc wuez yaq; tsuinghez kuex ralx khvt thenc hvlc nolaungx bix rvtueq. Tsuinghez kuex raungwvrx nuex ralx rueq khvt muq laz juing, yaung vphuq shuimx rauk raz tueq bvmc wuez yaq.

⁹Hokhvmx Solomon kuex vhvlx pinhtumc pulx maq vtvhungx daungraungc nuex pix tueq.

¹⁰Kvruex kankoz kuex kuimphox maq tvmarc khak tueq; ngaungchuing nuex kuimshawx khvy kuex phawc tueq. Ngaungchuing kankoz puingc htenc kuex Yerusalem shvlx rulx rueq, lungwawc thuinz maq nvm-yaz wuiyq tvhungx taq tueq.

¹¹Zion shvlx rulx lex, Solomon Hokhvmx waz kuex lawc kaz luit. Piq kuex piq miqlvmc moalx raungnuiyq, piq kokez juing raungnuiyq nuex, vnyuiuz rueq vtv-phuk kuq khushec kuex buz tueq.