Read Tase Naga ESAIA 1 Bible Online

ESAIA 1 - Tase Naga bible

ESAIA 1

¹Vruex luik dvp nuex Yuda hokhvmx bix rvtueq Uzia, Jotham, Ahaza nuiyc Hezekia pat nuex Yuda mungx Yerusalem nuex seng vtueq Amoza saz Esaia kox nuex httuiuc kaz tueq Tishox bomjungc rvtueq.

²Yehowa rueq, “Ghaq nuiyc raungx lex, ngaz rueq yvmx lac jungx vshaungx kuex tay shuinz! Ngaz rueq vtvpez luz nosaz rulx rueq ngaz kuex khawx lvlx wuez yaq.

³Suiux vmanx rueq vjiyungx tuiuz yaq, loze htenc rueq muinz tsuingshiq jiyungx rueq vtsvmz kuq yaq pankhuix kuex tuiuz yaq. Yuq muinz ngvy miqsaz Israel rueq kvtanc khvnc doc muinz tuiuz muq. Tsuingshiq rueq raungluingx muinz tuiuz tay wuez muq.”

⁴Nuimshiq kuex vphoc rvhumc tuinx, nuimshiq kuex ngarvyx vhttax phvnx rvtuit, nuimshiq kuex miqsuirc vsac nuiyc layx vbac rvtuit! Nuimshiq mvrax htenc rueq nuimshiq kuex tvrul het wvnc kv-phuinx! Nuimshiq rueq vsawc Israel Tishox kuex khawx lvlx vtueq yix tvnungx shung kuq wuez tuit.

⁵Nuimshiq rueq yvmx ngoz tueq lac khawx lvlx wuez vshuinx? Nuimshiq rueq murx kuex janc vtueq gurc roc haz? Israel lex, mkhux nuex vmac htenc mvrc yaq, mthuinz vmungx nuiyc mthuinz nuex vthuiuz rvyaq.

⁶Mkhux maq m-yaz nuex httuiuc laz vmac vguez mshauk pumz nuex gvnhttuingc ngoz tueq vguez. Mnoz kuex wvgvnz pumz vtsuimx vtsawk mac, vphiz vshuz mac vtsac htenc dvyx yaungx vtuiux. Mmac htenc kuex tvsawc hoalc gay rvhumc tuiux rvmuq, vyop rvhumc tuiux rvmuq. Phumz vwaq maq phemc kuy rvhumc tuiux rvmuq.

⁷Mmungtan kuex kuiyqshuik kuiyq khvmx baung yaungx kaz, m-ghaqyungx htenc kuex ghaq maq kawk huk khamc gay tueq. Mnoz rueq lawc yaq nuex dvyx pungmungx miq rueq m-ghaq vraungx kuex lvp wvnc vtueq phvnx ruip saz kuex tvbac gay tueq.

⁸Yerusalem dvyx shex kvjungx yaq, kvruex ghaqyungx muinz vruk vguez svpiq sunc mungx wawc sunc bvmc jix waz tap, rvmuq ngoz ruiux kumjul wuik wawc tap ikhoc komc wvnc rvhumc yaq.

⁹Mkhoc shoc maq Tvphaungc Tvsuip Yehowa rueq tvjungx taq shec miq wvyvmc kuex vguez ngoz ruiux yuq, Yerusalem kuex Sodom nuiyc Gomorra ikhoc tvsawc ric tvbac gay khvmz tueq.

¹⁰Yerusalem lex, mmungx walaungx bix htenc nuiyc mmiqsaz htenc kuex Sodom nuiyc Gomorra miqsaz ikhoc yaungx yaq. Yehowa rueq mnoz muex jungx yaq kuex tay shuiuz. Naungshiq Tishox rueq mnoz muex tvluing kuq yaq kuex tay tvtsuingc shuiuz.

¹¹Vpiq rueq, “Mnoz rueq ngaz muex shomc nawk kuy shomc kuq vphux lotlaz kuex ngaz rueq raungc raq yaq ngoz tueq haz tvmaung vshuinx? Shomc nawk kuy juing ikhoc mnoz rueq wvr maq jauk vshuiux khelbuenx pung htenc nuiyc vpuiz waq ngvmx saz htenc htauk nuex jvnc vtueq ngaz rueq lvp vshaungx. Ngaz rueq khelbuenx pung htenc, khelbuenx htenc nuiyc khelkhix htenc tvguiy kuex raungc raq mauk.

¹²Nuimshiq rueq ngaz muex nawk palx kay kaz ruinx nuex, vhtenc vruex lotlaz lvmc lvy tvkoc uraq lac thoz phvnx? Ngvy Shomc Yuimx vyuq khuemx shamx vtueq vruex lotlaz shuimc tvkoc nuimshiq kuex uraq lac tvhungx phvnx?

¹³Nuimshiq rueq shomc kuy juing htenc laq ruiux muinz, kvruex kuex khuec guez dvyx. Nuimshiq rueq wvr maq jauk vshuinx vhomc vtumc thuingc kuex ngaz rueq shuiuc vshaungx. Nuimshiq rueq Yac Nyalx phuiuz vsvy moalx, Vguilc Raungnuiyq htenc nuiyc nawk palx htungx moalx kuex ngaz rueq nanx lawc lot mauk; kvhtenc kvruex lotlaz kuex nuimshiq rueq shuimx wvnc tuit mvrax htenc ningkhvnc nuex bac wvnc tueq.

¹⁴Ngaz rueq nuimshiq wawc nyalx moalx htenc nuiyc vsawc raungnuiyq htenc kuex ngaz rueq shuiuc vshaungx; kvruex kuex tvgvrc tsvrc lvmz kuex ngaz rueq nanx vtueq hunnyex vtaungx.

¹⁵“Nuimshiq rueq yauk phac tv-phop vtueq vjux thoz shuinx nuex, ngaz rueq nuimshiq kuex lawc phaungx rvmuq. Nuimshiq rueq mtanc dvyx thoz ruiux muinz, ngaz rueq tay kuq phaungx rvmuq, yvmx khoc lac ngoz ruiux lec nuimshiq yauk htenc nuex tvguiy kawp yaq.

¹⁶Nuimshiq gvnz kuex tvsawc hoal shuinz. Ngvy rueq khiz yaq nuex nuimshiq rueq shuimx vshuinx layx vbac phvnx lotlaz kuex httvr shuinz. Rvtueq, layx bac yauk shuimc kuex httvr gay ruiux

¹⁷vlvmx yauk shuimc kuex tvluing shuinz. Tvrac vlvmz kuex shuimx vtueq, vtuing vhtuing rvhumc yaq jix muex romc kuq shuiuz, nojix saz tamx muex vlvmx kuex kuq ruiux, mvntix nyuiuz tamx kuex tvwungx shuinz.”

¹⁸Yehowa rueq, “Majuiuc, naunghez rvjungc ix. Nuimshiq mvrax kuex tvguiy ikhoc shawx ruiux muinz, tsuik hek ikhoc ngaz rueq tvsawc hoal kuq phaungx. Nuimshiq mvrax kuex shawc hvlc, yuq muinz khelbuenx mul ikhoc luiz wvnc tuinx.

¹⁹Nuimshiq rueq ngvy kvjaz phvnx ruiux yuq, ghaq wawc pulx thuey waqthuimx vhvlx htenc kuex nuimshiq rueq phauk saq lvp shuinx.

²⁰Yuq muinz nuimshiq rueq ngaz muex tvlvlc ruiux yuq, nuimshiq vthueyc rvhumc tuinx. Ngaz, Yehowa rueq jungx vshaungx,” ngoz tueq jungx tueq.

²¹Laukshiz tvmtuing httaz wvnc tueq ghaqyungx kuex mephex nyuiuz ikhoc shex khuemx shamx httax yaq nyix! Kvruex ghaqyungx kuex vkhing vshiz nuex tsuingrux miqsaz htenc mvrx wvnc tueq, yuq muinz majuiuc kuex miq thvy jix dvyx shex kvjungx yaq.

²²Yerusalem lex, mnoz kuex lauk shiz kuimphox ikhoc yaungx toq, yuq muinz majuiuc kuex mnoz htawz guez shex; mnoz kuex vhvlx svpiq ikhoc rvtoq, yuq muinz majuiuc kuex yuix dvyx shex.

²³M-walaungx bix kuex vlauc vlawc jix nuiyc vguiuq vrot jix hez kungjix muex yaungx yaq; tsuingshiq rueq yauk noalc htenc nuiyc khauloayc yauk noalc htenc kuex mkaq muinz lvmz wuez yaq. Tsuingshiq rueq phoc waz rungx maq nojix saz tamx kuex mkaq muinz tvguing muq, nuiyc mvntix nyuiuz tamx khuec vkhac kuex tay vtueq wisoz kuq muit.

²⁴Kvkhoc rvtueq majuiuc kuex, Tvphaungc Tvsuip Yehowa Israel luimc vkawc mvrc yaq Tishox rueq jungx yaq kuex tay shuinz: “Ngaz ralx hez lex, ngaz rueq nuimshiq muex murx tvyez shaungx, nuimshiq rueq ngaz muex kuilc daz raungluingx saz muinz tvyaungc kuq phuinx rvmuq.

²⁵Ngaz rueq nuimshiq kuex phox phaungx. Ngaz rueq nuimshiq kuex jungdungc diq tvyuimx lvmz gay yaq ikhoc, tvsawc gay shaungx, nuimshiq nuex sawc muq phvnx lotlaz kuex tvsawc gay phaungx.

²⁶Ngaz rueq nuimshiq kuex mvnnuex nuimshiq nuex httax wvnc tueq ikhoc guimz lawc jix bix nuiyc tharc rvjungc walaungx bix kuex kuq phaungx. Kvruex yimaq Yerusalem kuex tsuingrux, tvmtuing vhttax ghaqyungx ngoz tueq ngoz shuex.”

²⁷Yehowa kuex tsuingrux ningkhvnc nuex, vpiq rueq Yerusalem nuiyc kvruex wawc tharc humc wvnc jix miq ruip rawx kuex palc wvnc shuex.

²⁸Yuq muinz mvrax yaq jix nuiyc vpiq muex khawc lvlc jix kuex vpiq rueq tvbunx jek gay shuex; vpiq tuip gay shec jix miq tek vtueq vthvy rvgay shuex.

²⁹Nuimshiq rueq mkaq muinz nawk palx ruiux shuinx pulx jungx htenc nuiyc vsawc sunc[1] htenc nuex pulx htenc khic yuingc wvnc tuit ningkhvnc nuex thuinbac rvhumc wuez tuinx.

³⁰Nuimshiq kuex vshanc rvwvnc yaq khauk rauk jungx nuiyc yuix shvy muq sunc ikhoc yuiuq shanx wvnc tuinx.

³¹Tsvmkuiz kuex wvr dung vtueq khvmc gay yaq ikhoc, luimc vkawc yunghvlc jix miq muinz tsuingshiq layx bac honc vyaungc nuex bac wvnc wuez tuex, kvkhoc bac wvnc yaq kuex uraq muinz tvthauk lot shuex rvmuq.