Read Tase Naga ESAIA 11 Bible Online

ESAIA 11 - Tase Naga bible

ESAIA 11

¹Dawid hokhvmx phvnx vmaq kuex vduiuz vruez gay pulx rulc rv-ngvlc yaq; yuq muinz vjungx khuiuq maq vnyalx sung yek yaq ikhoc Dawid suiuz vsaz htenc wawc hokhvmx vnyalx washiz dung tuex.

²Piq rueq miqmac miqsaz htenc kuex guimz lawc tvkoc, Yehowa siyac rueq piq muex taksux tharc, phaqjic nuiyc vthenc vtuiuz kuex kuq shuex. Piq rueq Yehowa thuinroc kuex tuiuz vtueq vpiq muex tvtsanc nganc shuex,

³vpiq lvmx phvnx vtueq thuinz hvlc juing lvp shuex. Piq rueq vshvmx vrvmx maq muinz, bomc thawx tay vtueq muinz phox shuex rvmuq;

⁴piq rueq htemc saz jix muex tvrac vlvmz maq phox kuq ruiux thuinz tvyomx jix muex tvkhup wungx kuq shuex. Piq rueq nvr yaq kvjaz kvmaq miq htenc rueq murx gurx shuex, layx bac jix miq kuex vthueyc rvhumc tuex.

⁵Piq rueq piq miqsaz kuex tvrac vlvmz nuiyc tsuingrux maq guimz lawc shuex.

⁶Shoalx kuex khelbuenx rulc vdvmz nomic maq httax tuex, jaq tuik htenc muinz khelkhix sahez rulc vdvmz nuex woalc tuex. Manx sahez nuiyc hangsic htenc kuex vdvmz nuex phauk saq vtueq nosaz rulx rueq remx lawc shuex.

⁷Manx kuiux htenc nuiyc japbawx htenc kuex vdvmz nuex wvsvy saq shuex, tsuingshiq sahez kuex vdvmz nuex nomic maq httax wuez tuex. Hangsic htenc kuex suiux vmanx rueq ikhoc tsvmkuiz phauk shuex.

⁸Mkhoc shoc maq nox vshiz kuex vyangx vhttax puiuc luix kvlc nuex luemz ruiux yuq vhiz juing rac muq.

⁹Tishox vpiq vsawc kanx, Zion htauk nuex, vguirc vguenc nuiyc tvbac gay httax tuex rvmuq. Svmuktvrax nuex yuix mvrc yaq ikhoc ghaq vraungx kuex Yehowa phaqjic vmvrx maq httax tuex.

¹⁰Dawid phvnx wawc vdung hokhvmx vnyalx kuex miqphvnx htenc tvkoc tvkhic tvtsuingc juing muex yaungc wvnc vkhing httuiuc wvnc yaq. Tsuingshiq kuex piq hokhvmx ghaqyungx nuex rvtuimx kaz vtueq piq muex tvtsanc nganc kuq shuex.

¹¹Kvruex raungnuiyq httuiuc tuex nuex, Taungjix rueq vpiq luimc vkawc kuex shuimx vtueq vpiq miqsaz kuex Asiria nuiyc Ejip wawc, Pathro, Ethiopi, Elam, Babelon nuiyc Hamat mungx htenc, svmuktvrax nuiyc julc lomx htenc nuex httaz jix htenc kuex gvl wvnc shuex.

¹²Taungjix rueq rv-nyanc khuemx wvnc vtuex Israel nuiyc Yuda miqsaz htenc kuex ghaq shuk bvlic wawc shvlx vtueq tvtuimx yek yaq lvmz miq htenc muex tvkhic tvkoc ngoz tueq vyac mal nganc dvmx vshiz tsomz shuex.

¹³Israel mungtan kuex Yuda muex mkaq muinz khunnyerx shuex rvmuq, Yuda mungx jix muinz Israel ralx muex yaungx tuex rvmuq.

¹⁴Tsuingshiq kuex vdvmz nuex kvruiuz vtueq shalx nyuip kox wawc Philistin miqsaz kuex khvt ruiux, shaldungc kox nuex httax yaq jix hup vsvmx kuex nyvlc wvnc shuex. Tsuingshiq rueq Edom nuiyc Moba miqsaz kuex khvt taungx gay ruiux, Ammon miqsaz rueq tsuingshiq kvjaz tay kuq shuex.

¹⁵Yehowa rueq raungguil kalc hvlc tvguil vtueq Su-et noc nuiyc Euphrat ruilx kuex tvruic gay ruiux, uraq muinz yanz lot yaq yuix saz ruilx mvshix dvyx shex httax tuex, kvkaq uraq muinz khuemx shamx lvp tuex.

¹⁶Israel miqsaz htenc Ejip mungx maq kaz wvnc tueq nuex tsuingshiq jix vwaz tamx tvkoc tvtsuingc juing muex yaungx tueq ikhoc, Asiria mungx nuex kvjungx yaq Israel miqsaz htenc muex tvtsuingc juing tvkoc lvmx laungx yungx kvruex baung nuex httax tuex.