Read Tase Naga ESAIA 16 Bible Online

ESAIA 16 - Tase Naga bible

ESAIA 16

¹Moba miqsaz htenc rueq kumtsvy tvnx nuex httax yaq Sela ghaq wawc khelbuenx pung saz vshiz kuex yauk noalc muex Yerusalem guimz jix waz muex tvlaq kuq tueq.

²Tsuingshiq kuex Arnon Ruilx kawx htauk nuex bvmc httax yaq nuex vjez gay shec tueq wushawx htenc ikhoc htvp guez htaz guez vyuing vyix khuemx wuez yaq.

³Tsuinghez rueq Yuda miqsaz muex ngoc, “Yvmx ruec juing lac nuiyshiq muex jungx kuq kuit. Pulx kuex raungnuiyq shalhtungx kalc hvlc baung nuex vkuiyq waq raungx tvbuingc kuq yaq ikhoc nuiyshiq kuex tvwungx kuq kuit. Nuiyshiq kuex mbuingc khung nuex nyec tvkuiyq phix. Nuiyshiq kuex kuilc daz rvhumc jix hez rvtiq; nuiyshiq kuex uraq muinz thuiyx lot muq baung nuex httuiyq taq koq.

⁴M-ghaq mraungx nuex nuiyshiq kuex tvhttax koq. Nuiyshiq tvbac gay jix hez yauk wawc nuiyshiq kuex tvkhup wungx kuq koq,” ngoz tueq jungx tueq. (Htuingtuing gay rvhumc vtueq nuiyc tvbac gay yauk shuimc kuex htumx wvnc tuex, mungtan tvbac jix htenc muinz vmoz rvwvnc tuex.

⁵Kvruex yimaq Dawid suiuz vsaz washiz kuex hokhvmx yaungx tuex, piq rueq mungx miqsaz kuex tvmtuing nuiyc lungwawc thuinz maq guimz lawc shuex. Piq kuex vlvmz yauk shuimc tvkoc lvwvnz tuex, tvrac vlvmz yauk shuimc httax tuex kuex piq rueq khiz shuex.)

⁶Yuda miqsaz rueq, “Moba miqsaz kuex mtanc lac ngamc yungx yaq nguinx nuiyshiq tueq tay tiq. Tsuingc thuinz tvyungc vtueq kvsomc parc yaq kuex naungshiq rueq tuiuz vshix, yuq muinz tsuingshiq laungc jungc kuex khuec guez dvyx,” ngoz tueq jungx tueq.

⁷Moba miqsaz kuex tsuingshiq rvhumc yaq kuilc daz ningkhvnc nuex vkhoarc rvwuez tuex. Tsuingshiq lotlaz rueq Kir Here ghaqyungx maq phauk saq wvnc tueq phuiuz svy vhvlx kuex rvwvl vtueq khoarx wuez tuex. Tsuingshiq kuex tsuingc thuinbac wuez tuex.

⁸Heshbon hep wawc wuik htenc nuiyc Sibma svpiq sunc htenc kuex bac kaz tueq, vruex svpiq sunc wawc dung yaq svpiq tix kuex miqphvnx htenc guimz jix walaungx bix rueq nuingx vtueq juk pawx wuez ruiux tuex. Lauk shiz svpiq ruiuz htenc kuex Jazer ghaqyungx nuiyc shaldungc kox nuex httax yaq kumtsvy tvnx nuex httuiuc laz, shalx nyuip kox Yuix Maungx Jumx kvkox ral nuex httuiuc laz kaz wvnc yaq.

⁹Majuiuc ngaz kuex Jazer tvkoc khoar tauk ikhoc Sibma svpiq ruiuz htenc tvkoc khoar tauk. Miq htenc tvkoz kez tvkoc kvruex baung kvyuq tuiz vtsvmz vguez ningkhvnc nuex ngvy muik phic kuex Heshbon nuiyc Eleale tvkoc svrc yaq.

¹⁰Majuiuc ghaq vbur wuik htenc nuex kokez juing vguez. Ukhaq muinz svpiq sunc htenc nuex shic ngoyc guyc sez jix vguez. Svpiq tix surc yauk shuimc tvkoc uraq muinz svpiq thuey kuex nuiuz wuez muq; vkoz vkez maq guyc sez kuex vguez shex.

¹¹Ngaz kuex Moba tvkoc yonzyec vtueq khoar vtaungx, Kir Here tvkoc yonzyex vtaungx.

¹²Moba miqsaz htenc kuex kankhux wawc tsuingshiq rueq nawk palx juing baung htenc nuex vjux thoz tvkoc tsuingshiq shomc yuimx htenc nuex miqmac pumz tvhunnyex vtueq duiz kaz wuez yaq, yuq muinz tsuingshiq muex vhvlx phvnx tvyaungc kuq lot yaq rvmuq.

¹³Kvruex kuex Moba nuex seng vtueq kungkhux nuex Yehowa rueq vjungx wvnc bomjungc rvtueq.

¹⁴Majuiuc Yehowa rueq, “Moba yungx luz yaq tsak vnyvmx htenc kuex wawc thuimx vyuq vsuing moz wvnc tuex. Kvruex mungx wawc miq paunghvlc rvtueq wawc wvyvmc dvyx rullungx tvraungx httax tuex, tsuingshiq kuex hungc vlaungc nulx wvnc tuex,” ngoz tueq jungx tueq.