Read Tase Naga ESAIA 17 Bible Online

ESAIA 17 - Tase Naga bible

ESAIA 17

¹Yehowa rueq, “Damasku kuex ghaqyungx vshiz muex yaungx lot muq shex; kvruex kuex rvthuip rv-khvt dvyx shex kv-phungc tuex.

²Siria mungx wawc ghaqyungx htenc kuex pattup kuiyqshuik kuiyq khvmx yaungx wvnc tuex. Kvruex yuq khelbuenx nuiyc suiux vngac guilc juing yaungx vtueq, uraq muinz tsuingshiq kuex yurc gay shuex rvmuq.

³Israel mungx kuex kvgawx juing vguez baung muex yaungx wvnc tuex, Damasku kuex piq mungx lvp vkhangx dvy sumx wvnc tuex. Kvjungx yaq Siria miqsaz htenc kuex Israel miqsaz htenc ikhoc yvlc svy rvhumc tuex. Ngaz kuex Tvphaungc Tvsuip Yehowa rvtauk,” ngoz tueq jungx tueq.

⁴Yehowa rueq, “Israel yungc vloayc kuex htumx wvnc vtueq, piq rungx vwanx kuex miq menjenc vsac maq layc gay rvhumc juing raungnuiyq httuiuc wvnc yaq.

⁵Israel kuex tuiz tsvmz yut lot yix wawc wuik vshiz rulc rv-ngvlc tuex, kvruex kuex Rephaim Warc tvnx wawc tsvmtul tvjomx yoalx wuik ikhoc sawc riric hvlc baung muex yaungx tuex.

⁶Israel kuex olip jungx wawc vthuey htenc puinc lot yix, vjungx thawx nuex vnueyc vthuimx dvyx nuiyc vnoz htenc khung nuex raungluingx luingx saz kvjungx yaq ikhoc, raungluingx saz dvyx shex rullungx tvraungx httax tuex. Ngaz, Yehowa Israel Tishox rueq jungx vshaungx,” ngoz tueq jungx tueq.

⁷Kvruex raungnuiyq httuiuc wvnc tuex nuex, miq htenc kuex tsuingshiq Tvdungc Sungc jix Israel vsawc Tishox kox wawc romc kuy tvkoc kvyez wuez yek tuex.

⁸Tsuingshiq kuex miqmac yauk maq vtvhungx shomrawx htenc nuex mkaq muinz kvguing kvnvp wuez tuex rvmuq shex, tsuingshiq yauk maq vguirx Ashera tishox nyuiuz yac htung htenc nuiyc vhomc vtumc juiuz juing shomrawx htenc muex kvmx wuez muq shuex.

⁹Kvruex raungnuiyq httuiuc wvnc tuex nuex, Israel miqsaz kox wawc yuz wvnc vtueq tuip gay shex tueq Hiwi nuiyc Amori ghaqyungx htenc ikhoc, phaungx duingduing hvlc ghaqyungx htenc kuex kuiyqshuik kuiyq khvmx baung muex yaungx vtueq kvhttak bac wvnc tuex.

¹⁰Israel lex, mnoz kuex mnoz palc wvnc vtueq lung kuiux yungx ikhoc tvguing kuq yaq Tishox kuex vlauk shex rvgay toq. Kvkhoc ruec tvraung, mnoz rueq pungnuk phvnx tishox muex nawk palx kuy tvkoc ngoz tueq vsawc sunc htenc khic yuingc taq toq.

¹¹Yuq muinz mnoz rueq khic yuingc toq htenc kuex vkoz dung vtueq raungnvp nuex vpuic puic ruiux muinz, kvruex wawc vthuey kuex mnoz rueq puinz lvp shuiux rvmuq. Kvruex yuq kuilc daz jamjaux nuiyc tvhvlc lot muq vthuiuz vsac dvyx shex httax tuex.

¹²Luimc vkawc yunghvlc miqphvnx htenc kuex svmuktvrax yuix tvruingc ikhoc, yuix daungx rueq wung tvruingx yaq ikhoc thuirx tvruingx wuez yaq.

¹³Kvruex miqphvnx htenc kuex yuix daungx kvtenc waung yaq ikhoc kv-phungc suk waung yaq, yuq muinz Tishox rueq tsuingshiq kuex murx koq tueq tsuingshiq kuex rauk phawc nuex kop yaq bokkhuyx ikhoc muinz, raungguil rueq pvnc yaq wekkhix ikhoc muinz rv-nyuik yuz wvnc wuez tueq.

¹⁴Tsuingshiq rueq raungwvrx nuex kvhiz juing tvyaungc tueq, yuq muinz raungnvp nuex tsuingshiq moz kaz wuez tueq. Kvruex kuex naungshiq ghaq vraungx yauk laungc yalawx jix miq ruip rawx muex vtvsuip lvmz shex rvtueq.