Read Tase Naga ESAIA 27 Bible Online

ESAIA 27 - Tase Naga bible

ESAIA 27

¹Kvruex raungnuiyq Yehowa rueq rvhtuic rvnungx kvgot bumx yaq yungrex Lewithan muex murx tvgurc tvkoc muinz, svmuktvrax mungx nuex httax yaq pvren kuex thvy gay tvkoc muinz vpiq luimc vkawc maq tvthueyc lot yaq yaung kuex shuimx shuex.

²Kvruex raungnuiyq Yehowa rueq raungc raq yaq vpiq svpiq sunc kuex,

³“Ngaz rueq sunc kuex tvkhvlc mauk maq bvmc lawc vtueq yuix shvy kuq vshaungx. Ngaz rueq raungnuiyq raungwvrx bvmc lawc vshaungx, kvkhoc rvtueq uraq muinz kvruex tvbac lot shuex rvmuq.

⁴Ngaz kuex svpiq sunc muex khaq mauk shex. Kvruex sunc kvyuq shuiuq jungx htenc nuiyc httuingx htenc kemz ruiux yuq, kvruex htenc kuex ngaz rueq tvsawc ric jauk gay shaungx.

⁵Yuq muinz ngvy miqsaz htenc muex ralx hez kuex ngaz rueq tvkhup wungx kuy roc wuez ruiux yuq, tsuingshiq kuex ngaz rulc nomic mrvyaungc wuez kueq. Rvtueq, tsuingshiq kuex ngaz rulc nomic mrvyaungc wuez kueq,” ngoz tueq jungx shuex.

⁶Kvruex raungnuiyq httuiuc tuex nuex Yaku suiuz vsaz htenc ngoz yaq Israel miqsaz htenc kuex pulx jungx ikhoc vruingx waungc vtueq, vthuey thuey tvkoc vyur vpuic rvtuex. Ghaq kuex tsuingshiq rueq tvdung yaq vthuey vngoz maq tvmvrc shuex.

⁷Yehowa rueq tsuingshiq ralx htenc muex henghvlc murx tvgurc vtueq thvt gay tueq tanc khvnc Israel miqsaz htenc muex murx tvgurc ruiux thvt gay tueq rvmuq.

⁸Yehowa rueq vpiq miqsaz htenc kuex pungmungx nuex yurc gay murx tvgurc tueq. Vpiq rueq tsuingshiq kuex shaldungc raungguil maq tvpvnc gay tueq.

⁹Yuq muinz pungmungx htungx vlayx phvnc jix hez lung shomrawx htenc kuex lunghtunc kawz ikhoc tv-ngawk gay ruiux, Ashera tishox nyuiuz tvtsuingc juing htung yac, rvmuq ngoz ruiux vhomc vtumc tvy juing shomrawx htenc, yix maq mkaq muinz httax muq laz juing tuip gay shuex kvkaq jix, Israel miqsaz htenc mvrax kuex dawc kuy rvhumc wuez tuex.

¹⁰Palx ruk phaungc hvlc ghaqyungx kuex kuiyqshuik kuiyqkhvmx bac kvhttak kaz tueq. Kvruex kuex yvmx muinz kemz muq kumtsvy tvnx ikhoc vtuip gay ghaqyungx rvtueq. Kvruex ghaqyungx kuex suiux vmanx kung htenc bumx vtueq, httuingx phauk yaq wvsvy juing baung muex yaungx kaz tueq.

¹¹Pulx jungx noz vphak htenc shanx wvnc ruiux yuq vtawk gay rvhumc yaq, yalxjuik rulx rueq kvruex janx muex htuimx kaz yaq. Miq htenc kuex yvmx muinz vtuiuz vtay vguez ningkhvnc nuex, tsuingshiq Tvdungc Sungc jix Tishox rueq tsuingshiq muex menjenc shuex rvmuq, tsuingshiq muex yvmx menjenc lvmz muinz tvkhic shuex rvmuq.

¹²Kvruex raungnuiyq, Euphrat ruilx maq Ejip ghaqruiy nuex httuiuc laz Yehowa rueq vpiq miqsaz vshiz maq vshiz kuex nyensaz tsvmz vshauk vphex thvl gay shix ikhoc thvl gay shuex.

¹³Kvruex raungnuiyq httuiuc tuex nuex, Asiria nuiyc Ejip mungx nuex thuq wvnc rvhumc jix Israel miqsaz lotlaz kuex tvyez gvlc tvkoc bolic tuimz shuex. Tsuingshiq kuex Yehowa vsawc ghaq luimx htauk wawc Yerusalem nuex vpiq muex nawk palx kaz wuez tuex.[8]