Read Tase Naga ESAIA 36 Bible Online

ESAIA 36 - Tase Naga bible

ESAIA 36

¹Yuda hokhvmx Hezekia kuex hokhvmx yaungc wawc rokshiz rac wawc bvlic nuex, Asiria honoc Sennacherib rueq Yuda mungx wawc lung palx ruk tueq ghaqyungx htenc kuex khvt vtueq lvp wvnc tueq.

²Kvruex yimaq piq rueq piq nolaungx yungx waz kuex Lakhish maq Yerusalem nuex nolaungx daungx yungx maq kaz vtueq, Hokhvmx Hezekia muex koz vlaq tvdvy tvkoc ngoz tueq. Kvruex nolaungx yungx waz rueq khoz vkhvy huy jix ghaq baung, htauk yuix jumx wawc vdoalc laq yuix warc hep wawc lvmx laungx kuex lvp gay tueq.

³Yuda miqsaz waz thuimx kuex piq rulc rvhumc kay dung kaz tueq: kvruex hez kuex hokhvmx hoc nuex shunshvlc jix vyungx vlaungx ngoz yaq Hilkia saz Eliakim; yauk shuimc jungx waz Shebna; Asap saz luik tvtsuingc wuiyq jix waz Joa rvtueq.

⁴Asiria vyungx vlaungx waz rueq tsuingshiq muex Hokhvmx Hezekia kuex yvmx nuex lac kvtanc khvnc kvmx yaq nguinx kuex honoc waz rueq vtuiuz roc lvmz jungx tueq.

⁵Piq rueq, “Nolaungx hungc vlaungc kuex kvjaz maq layc gay lot shix ngoz tueq haz nuimshiq rueq tvmaung vshuinx? Asiria kuex khawc lvlc tvkoc nuimshiq muex romc kuy jix kuex ukhaq lac rvtvnx nuimshiq rueq tvmaung vshuinx haz?

⁶Nuimshiq kuex nuimshiq muex romc kuy tvkoc Ejip muex tvluimc vshuinx, yuq muinz kvruex kuex may-o kawz kuex ngvlhtulc muex tvyaungc shix rulc rv-ngvlc yaq. Kvruex kuex ngawk kaz vtueq m-yauk nuex shuiuq rueq ruimc kv-phux. Kvruex kuex Ejip hokhvmx waz muex tvluimc jix ukhaq yuq muinz kvkhoc rvhumc wuez tuex,” ngoz tueq jungx tueq.

⁷Asiria vyungx vlaungx waz rueq tvhttoarc vtueq, “Nuimshiq kuex Yehowa nuiyshiq Tishox muex tvluimc vshix ngoz tueq ngaz muex haz jungx wuez phuinx? Kvruex kuex Yehowa muex nawk palx juing baung htenc nuiyc shomrawx htenc kuex Hezekia rueq tvbac gay tueq nuex, Yuda nuiyc Yerusalem miqsaz htenc muex shomrawx vshiz nuex dvyx nawk palx tvkoc jungx tueq.

⁸Ngaz rueq honoc waz muingc maq nuimhez rulc rvlongx palx taungx. Nuimhez wawc mvre nuex ngaungc jix miq vpaung humc ruiux kuex, ngaz rueq nuimshiq muex vngaungc juing mvre 2,000 kuq phaungx.

⁹Nuimshiq kuex Asiria vyungx vlaungx nauc laq jix waz rulc doc muinz rvlongx khvmc muit rvyruiux, Ejip miqsaz htenc rueq nuimshiq kox nuex nolaungx renc htenc nuiyc vngaungc juing mvre htenc tvkaz shuex ngoz tueq haz tvluimc vshuinx.

¹⁰Yehowa rueq romc kuy vguez maq nuimshiq mungx kuex ngaz rueq tvbac khvt gay tueq ngoz tueq haz tvmaung vshuinx? Kvkhoc tvbac khvt gay tvkoc Yehowa vpiq pumz maq ngaz muex jungx phuex,” ngoz tueq.

¹¹Kvruex yimaq Eliakim, Shebna nuiyc Joa rueq vyungx vlaungx waz muex, “Nuiyhez muex Aramai kvjaz maq kvjak kuq koq. Nuiythuimx rueq kvruex kvjaz kuex tay yaq. Hebre kvjaz maq nauk jungx kaz; palx ruk htauk nuex httax yaq miq lotlaz rueq tay wuez yaq,” ngoz tueq jungx tueq.

¹²Piq rueq, “Nuimhez nuiyc hokhvmx waz muex dvyx vruex lvmz lotlaz jungc kuy tvkoc honoc waz rueq ngaz tvkaz phuex ngoz tueq haz tvmaung vshuiux? Rvmuq, ngaz rueq palx ruk htauk nuex ngaungc yaq miq htenc muex muinz jungx vshaungx, tsuingshiq muinz nuimshiq kvkhoc miqmac diq kuex saq ruiux miqmac shawz kuex nuingx wuez shuex,” ngoz tueq tvralc jungx tueq.

¹³Kvruex yimaq nolaungx yungx waz kuex kvtenc jvp vtueq Hebre kvjaz maq, “Asiria honoc waz rueq nuimshiq muex jungx tueq kvjaz kuex tay shuinz.

¹⁴Hezekia rueq nuimshiq kuex tvshonx muq mruez shueq, Hezekia rueq nuimshiq kuex palc wvnc lot muq, ngoz tueq piq rueq nuimshiq muex khvmc kuq yaq.

¹⁵Yehowa muex tvluimc tvkoc piq rueq laulawc ruiux muinz nuimshiq nauk kvlauc kaz. Yehowa rueq nuimshiq kuex palc wvnc ruiux, nuimshiq ghaqyungx lvp wvnc jix nuiyshiq Asiria nolaungx daungx kuex vpiq rueq tvthauk kuq gay shuex ngoz tueq nauk rvwvl kaz.

¹⁶Hezekia kvjaz nauk tay kaz! Asiria honoc waz rueq kvruex ghaqyungx kvmaq dung kaz vtueq koz vlaq tvdvy tvkoc nuimshiq muex nvr yaq. Nuimshiq lotlaz rueq miqmac svpiq ruiuz wawc svpiq thuey htenc, miqmac phuiuq muiuq jungx wawc vthuey htenc kuex puinz saq, miqmac yuix tumz wawc yuix kuex khuz nuingx vkhangx lvp shuinx.

¹⁷Kvruex yimaq honoc waz kuex kaz vtueq nuimshiq mungtan rulc rv-ngvlc yaq vganc vhttaz juing baung tvhungx kuq kv-phuinx; kvruex baung kvmaq nuimshiq rueq svpiq sunc wawc svpiq tix, wanx lumc tvkoc tuiz vtsvmz tvjomx wvnc shuinx.

¹⁸Yehowa rueq nuimshiq kuex palc wvnc shuex ngoz tueq nuimshiq rueq tvmaung tvkoc Hezekia rueq laulawc yaq kuex nauk tay kaz. Miq phvnx tishox htenc rueq tsuingshiq mungtan htenc kuex Asiria honoc yauk wawc palc wvnc tueq haz?

¹⁹Hamat nuiyc Arpad tishox htenc kuex majuiuc m-yuq lac? Sephawaim tishox htenc kuex m-yuq lac? Mruex jix rueq lac Samaria kuex palc wvnc tvnx?

²⁰Vruex mungtan lotlaz wawc mkhoc phvnx tishox htenc rueq lac tsuingshiq mungtan kuex honoc waz yauk wawc mtanc jauz lac palc wvnc tueq shex haz? Kvmaq Yehowa rueq Yerusalem kuex palc wvnc lot shuex ngoz tueq nuimshiq rueq yvmx ngoz tueq lac tvmaung vshuinx?” ngoz tueq ramc tueq.

²¹Hokhvmx Hezekia rueq tsuingshiq muex jungx tueq rulc rv-ngvlc kuiyqshuik dvyx httax tueq; tsuingshiq kuex bomc poshiz muinz kvjak wuez muq.

²²Kvruex yimaq Eliakim, Shebna nuiyc Joa kuex thuinbac vtueq miqmac khvy htenc juir gay ruiux Asiria vyungx vlaungx kvjaz kuex hokhvmx waz kox nuex jungx tvtay waung tueq.