Read Tase Naga ESAIA 6 Bible Online

ESAIA 6 - Tase Naga bible

ESAIA 6

¹Hokhvmx Uzia thueyc kaz tueq raungwawc, ngaz rueq Taungjix kuex khiz tauk. Vpiq kuex johvlc raungc hvlc hoc daungraungc nuex ngaungc yaq, vpiq hungluz khvy kuex Shomc Yuimx mvrc laz rvtueq.

²Vpiq tvroz nuex Seraphim htenc tvkomc jvp yaq, vraungx tvruk phok httax yaq. Vraungx vnueyc phok maq tsuingc htvlx kuex puingc ruiux, vganc vnueyc maq miqmac pumz kvyuq, vganc vnueyc kuex vbaz muex rvtueq.

³Tsuinghez vshiz maq vshiz rueq ngoz yaq kuex: “Vsawc, vsawc, vsawc! Tvphaungc Tvsuip Yehowa kuex vsawc! Vpiq ngauz vngax kuex mungkawx nuex mvrc yaq.”

⁴Tsuinghez guyc sez tvruingc rueq Shomc Yuimx yaz phaungx kvbuilc vtueq, Shomc Yuimx nuex wvr khuiuq mvrc kaz tueq.

⁵Ngaz rueq, “Ngvy tvkoc tvluimc juing vguez shex! Ngvy nuix bar maq dung yaq bomc poz ruip rawx kuex mvrax kvjaz jvnc rvtueq, bomc poz tek nuex mvrax bomc poz kvjak yaq miqsaz htenc hvlwvl nuex httax vtaungx ningkhvnc nuex, ngaz kuex tvbac gay rvhumc vtaungx. Yuq muinz ngvy muik maq tiq, Tvphaungc Tvsuip Yehowa Hokhvmx waz kuex ngaz rueq khiz tauk.”

⁶Kvruex yimaq Seraphim vshiz rueq shomrawx wawc wvr kuinx vshiz kuex kap maq tvkap tsenz laq vtueq ngaz kox nuex svt kaz ruex.

⁷Piq rueq tsauz thuiyc yaq wvr kuinx kvmaq ngvy nuix bar nuex htunc vtueq, “Mnuix bar kuex vmaq htunc ningkhvnc nuex, majuiuc mmvrax tvsawc gay tueq, mmvrax htenc dawc kuq gay kv-phux shex,” ngoz phuex.

⁸Kvruex yimaq Taungjix rueq, “Ngaz rueq ukhaq lac tvkaz shaungx? Mruex jix lac naungshiq kvjaz jungc jix waz muex yaungx tvnx?” ngoz tueq jungx yaq kuex ngaz rueq tay tauk. Ngaz rueq, “Ngaz kaz taungx! Ngaz tvkaz koq!” ngoz tueq tvralc tauk.

⁹Kvkhoc rvtueq vpiq rueq ngaz kuex miq htenc kox nuex tvkaz vtueq vruex bomjungc kuex kuy tvkoc jungx phuex: “Nuimshiq rueq mtanc dvyx tay ruiux muinz, nuimshiq rueq tuiuz tay muit. Nuimshiq rueq mtanc dvyx lawc ruiux muinz, yvmx wuez yaungx yaq nguinx nuimshiq rueq tuiuz muit.”

¹⁰Kvruex yimaq vpiq rueq ngaz muex, “Miq htenc kvruex thuinz kuex tvbvruz tuz gay shuiuz, tsuinghez nac htenc tvbawx gay shuiuz, muik htenc tvmawz gay shuiuz, kvkaq tsuingshiq rueq khiz lot muq, tay lot muq nuiyc tuiuz muq rvshuex. Tsuingshiq kvkhoc yaungx wvnc ruiux yuq, tsuingshiq kuex ngvy kox nuex kvroz yek vtueq tvhvlc tvsawc kuy rvhumc tuex,” ngoz tueq jungx phuex.

¹¹Ngaz rueq, “Taungjix lex, mtanc nuex httuiuc laz vkhoc yaungx wvnc tvnx?” ngoz tueq wiz tauk. Vpiq rueq, “Ghaqyungx htenc bac wvnc vtueq sawc ric yaungx wvnc tuex nuex httuiuc laz, yuimx htenc kuex kuiyqshuik kuiyq shix yaungx wvnc vtueq, ghaq kuex sawc riric phaq tvwawc gay shec shuex vkhing nuex httuiuc laz rvtuex, ngoz tueq tvralc phuex.

¹²Ngaz rueq kvwawc miq htenc kuex vluz nuex thuq gay ruiux kvruex ghaq vraungx kuex thuic guez thaungc guez tvyaungc gay shaungx.

¹³Kvruex mungx kvyuq miq kuex pasen 10 tanc dvyx shex kvjungx ruiux muinz, piq muinz tvbac gay rvhumc tuex; tsuingshiq kuex vduiuz vruez gay khauk rauk jungx khuiuq ikhoc yaungx tuex,” ngoz tueq tvralc phuex. (Pulx jungx khuiuq kuex Tishox vpiq miqsaz vnyalx tvjvp phaungc wvnc ngoc rvtueq.)