Read Tase Naga ESAIA 8 Bible Online

ESAIA 8 - Tase Naga bible

ESAIA 8

¹Yehowa rueq ngaz muex, “Luik wuiyq juing lungdvmx yunghvlc vshiz lvmz vtueq luik thuey yunghvlc maq: ‘Yauk lox khvt, yauk lox maq nyvlc,’ ngoz tueq wuiyq shuiuz.

²Vkvmx juing shomc waz Uria nuiyc Jeberechia saz Zecharia tsuingnueyc kuex hakhix muex gvl taq shuiuz,” ngoz tueq jungx phuex.

³Mtanc rvmuq nuex ngvy taungnyuiuz kuex wvgvnz shex rvtueq. Kvkaq miqwaz saz jawx tueq, Yehowa rueq ngaz muex, “Piq muingc kuex, ‘Yauk lox khvt, yauk lox maq nyvlc,’ ngoz tueq muingc shuiuz.

⁴Kvruex nox kuex ‘Inyuiuz nuiyc iwaz,’ ngoz tueq max gvl thenc nuex Asiria hokhvmx waz rueq Damasku wawc hup vsvmx lotlaz nuiyc Samaria ghaq khvt vtueq vlvp wvnc hup svmx htenc kuex lvmz wvnc shuex,” ngoz tueq jungx phuex.

⁵Yehowa rueq ngaz muex jungx yek phuex.

⁶Piq rueq, “Vruex miq htenc vraq kuiyqshuik maq rv-nyuing kaz yaq Shiloa Warc wawc yuix kuex tuip gay ruiux, Rezin Hokhvmx nuiyc Peka Hokhvmx max nuex kvkhuirc wuez yaq ningkhvnc nuex,

⁷Ngaz Taungjix rueq Asiria honoc nuiyc piq nolaungx bix kuex shvlx vtueq Yuda mungx tvkhvt shaungx. Tsuingshiq kuex Euphrat Ruilx yuix puingx yaq ikhoc baung ruip maq buk wvnc shuex.

⁸Tsuingshiq kuex phauk khaq nuex httuiuc laz duiz puingx wvnc tueq yuix puingc nuiyc taungx vwawx lotlaz puingc wvnc vtueq, Yuda mungx kuex luimz wvnc shuex,” ngoz tueq jungx phuex. Tishox kuex naungshiq rulc vdvmz httax yaq! Vpiq raungkungx htenc maq ghaq vraungx kuex tvwungx kuq yaq.

⁹Miq phvnx htenc lex, hiyaz hvt maq rvtuimx wuez kuinz! Lvmx luz jix lex, tay wuez shuinz. Ralx khvt tvkoc tvyoalc shuinz, yuq muinz kvhiz wuez kuinz! Rvtueq, kvkhoc tvyoalc shuinz, yuq muinz kvhiz wuez kuinz!

¹⁰Nuimshiq rueq kvmungx wuez shuinz! Yuq muinz tsuingshiq rueq mkaq muinz lotlaungc shuex rvmuq. Nuimshiq rueq roc shuinx lvmz htenc kuex jungx shuinz! Yuq muinz kvruex lotlaz kuex khuec guez dvyx, yvmx khoc lac ngoz ruiux lec Tishox kuex naungshiq rulc vdvmz httax yaq.

¹¹Yehowa rueq vpiq luimc vkawc yunghvlc maq miq htenc rueq phvnx yaq lvmx kvyuq phvnx miq tvkoc ngaz muex honc tvsvmz kuq phuex. Piq rueq,

¹²“Miq rueq dvnc yaq kvyuq nauk lomx naungx kaz, tsuingshiq hiz yaq phvnx kvmac nauk hiz kaz.

¹³Ngaz kuex, Tvphaungc Tvsuip Yehowa vsawc rvtauk, tvtsuingc taq shuinz; ngaz kuex mnoz hiyaz vtuiux waz rvtauk.

¹⁴Vhiz tvtsanc nganc juing ikhoc ngvy vsawc ngauz vngax ningkhvnc nuex ngaz kuex miq htenc kvhtuip rulc juing lung ikhoc rvtauk; ngaz kuex Yuda nuiyc Israel mungx miqsaz htenc nuiyc Yerusalem ghaq jix htenc kuex tsvnc yaq bix ikhoc rvtauk.

¹⁵Miq paunghvlc kvhtuip rul wuez tuex; tsuingshiq kuex rul wvnc vtueq bunx wvnc tuex. Tsuingshiq kuex bix nuex manz wuez tuex.”

¹⁶Ngvy sangac hez lex, Tishox rueq ngaz muex vkuq bomjungc htenc kuex tvguing tvwungx taq shuinz.

¹⁷Yehowa rueq vpiq pumz kuex vpiq miqsaz kox wawc htvlx phawc kuex httuiyq gay tueq, yuq muinz ngaz kuex vpiq muex kvmx vtueq tvluimc shaungx.

¹⁸Ngaz muex Yehowa rueq vkuq nosaz rulx rulc vdvmz ngaz vyuq httax vtaungx. Zion Kanx htauk nuex httax yaq, Tvphaungc Tvsuip Yehowa rueq nuiyshiq kuex Israel miqsaz kox nuex vtvraungx bomjungc maq tvkaz phuex.

¹⁹Yuq muinz miq htenc rueq kvburx turx vtueq jungx yaq mantan dungc gvy jix bix nuiyc htaungc shvmmax bix kox nuex mantan bomc wisoz tvkoc nuimshiq muex jungx kv-phuinx. Tsuingshiq rueq, “Vtvsuip nuex, miq htenc rueq maungx yac htenc kox wawc htaungc bomc wiz mvy yaq nuiyc vtvraungx jix tvkoc vthueyc kay wuez jix rulc rvwiz soz wuez yaq,” ngoz tueq jungx wuez shuex.

²⁰Nuimshiq rueq tsuingshiq muex, “Yehowa rueq nuimshiq muex mkhoc lac tvluing kuq yaq kuex tay wuez shuinz! Htaungc shvmmax bix rueq jungx yaq kvjaz kuex nauk tay kaz, tsuingshiq rueq nuimshiq muex jungx yaq kvjaz kuex vkuilc vdaz tvhvlc kuq lot yaq rvmuq,” ngoz tueq tvralc shuinx.

²¹Miq htenc kuex thuinbac wuk tac raz tueq khvmx vrvmc rvhumc ruiux, mungtan kvmaq khuemx lvy wvnc tuex. Tsuingshiq khvmx vrvmc svy nuiyc thuinkhvy ningkhvnc nuex tsuingshiq rueq tsuingshiq hokhvmx nuiyc tsuingshiq Tishox muex kvtuemc taungc wuez tuex. Tsuingshiq rueq raungx nuex lawc

²²ghaq nuex kvwuirc lawc rvwuez shuex, yuq muinz tsuingshiq rueq yvmx muinz khiz muq, yuq muinz kuilc daz nuiyc vnyauk dvyx khiz shuex, tsuingshiq kuex vhiz juing raungx nyauk mungx nuex yurc gay rvhumc tuex.