Read Tase Naga LEWI 11 Bible Online

LEWI 11 - Tase Naga bible

LEWI 11

¹Yehowa rueq Israel miqsaz htenc tvkoc

²phvnc juing tvrac htenc Moshe nuiyc Arun muex kuq tueq. Nuimshiq rueq phuiuz mvy yaq ghaq ngvmx saz kuex,

³huk shix httuinc phak ruiux, svy tvyez yaq ngvmx saz htenc kuex phuiuz mvy yaq,

⁴yuq muinz kola-uk (kamel), waukpot nuiyc rabit ngvmx kuex phuiuz mvy muq. Vruex phvnx ngvmx saz kuex svy tvyez ruiux muinz huk httuinc phak muq ningkhvnc nuex sawc muq.

⁷Wauk ngvmx kuex phuiuz mvy muq. Huk httuinc phak ruiux muinz svy tvyez muq ningkhvnc nuex sawc muq ngoz tueq tvmaung tvy rax.

⁸Nuimshiq rueq kvruex phvnx nyvmx saz htenc ngvmx kuex phuiuz mvy muq, vmaungx muinz shuimc mvy muq; kvruex kuex sawc muq phvnx rvtueq.

⁹Nuimshiq rueq vraungx nuiyc vsuik vhttax phvnx ngaq kuex svy mvy yaq,

¹⁰yuq muinz vraungx nuiyc vsuik vguez phvnx yuix yungsaz kuex svy mvy muq.

¹¹Kvkhoc yungsuiuz yawxsaz phvnx htenc kuex sawc muq ngoz tueq tvmaung tvy rax. Kvruex phuiuz mvy muq, vmaungx htenc nuex doc muinz kvtungc mvy muq.

¹²Vraungx nuiyc vsuik httax muq yuix yungsaz phvnx htenc ngvmx kuex svy mvy muq.

¹³Nuimshiq rueq suirsac juing phuiuz mvy muq phvnx wushawx kuex vruex rvtueq; lawx yungx, wuzkhuiuq, lawx, lawx saz, tsongpoyrauk lawx, lawtawx, wuzkhax, lawx kirux, wukvmx, kvmx luiz, wutuiux guip, phauk suiyq.

²⁰Vdawk khuemc rvyaq phvnx yungsuiuz yawxsaz maq lvy vtueq, vraungx vhttax yungsuiuz yawxsaz vngoz lotlaz kuex sawc muq.

²²Nuimshiq rueq phuiuz mvy yaq kuex kup jawrawx, kuixboarx nuiyc kuphttek rvtueq.

²³Yuq muinz vraungx httax ruiux kvhet khuemc rvyaq vganc kuiux ruinx phvnx lotlaz kuex sawc muq.

²⁴Ngvmx saz vthueyc kaz maungx shuimc jix ukhaq yuq muinz raungyac nuex httuiuc laz sawc muq: huk httuinc phak ruiux svy tvyez yaq ngvmx saz htenc maq lvy vtueq, huk httuinc vhttax ngvmx saz lotlaz nuiyc vphamc thenc yaq vyaz bvlic phvnx lotlaz rvtueq. Ekvkhoc phvnx ngvmx saz maungx kuex lvmc wvnc jix rueq miqmac khvy kuex huy rax, yuq muinz piq kuex raungyac nuex httuiuc laz sawc muq.

²⁹Ghaq nuex kvhet khuemx yaq yawxsaz phvnx wawc tvruiuc, yuiuq phuiuq, tsongtuik,

³⁰tsongpix, jerret, tsongkhuiux phvnx htenc kuex sawc muq rvtueq.

³¹Kvruex htenc nuiyc kvkhoc phvnx maungx htenc shuimc jix waz kuex raungyac nuex httuiuc laz sawc muq.

³²Kvruex maungx kuex pulx kok, khvy, vkhuix, vmul nuiyc vshuimc vlvmc juing hup svmx phvnx shishiz htauk nuex dvy ruiux yuq, kvruex hup svmx kuex sawc muq, yuix nuex raungx tvyac laz tuimc tvy rax, kvruex yimaq jix sawc tuex.

³³Vmaungx kuex gvmtuik mungx nuex dvy ruiux yuq, kvruex tuik mungx nuex httax yaq htenc muinz vshuy vshac kay wuez ningkhvnc nuex kvruex tuik kuex tvbunx gay rax.

³⁴Kvruex tuik wawc yuix kuex phuiuz vsvy juing htauk kvyuq dvy ruiux yuq, kvruex phuiuz vsvy juing kvmuinz sawc muq, tuik wawc yuix muinz sawc muq.

³⁵Taungx vwawx phvnx shishiz nuex vmaungx kuex dvy kaz ruiux yuq, kvruex taungx vwawx kuex wvr tvp nuex yuq muinz, wvrkez nuex yuq muinz sawc muq shex ningkhvnc nuex tvbunx rvgay rax,

³⁶yuq muinz yuix saz jumx, rvmuq ngoz ruiux yuix tumz kuex vsawc shauk dvyx doc, vmaungx rueq heq itueq kvdvyx sawc muq.

³⁷Vyuingc vwuinc juing lix htauk kvyuq vmaungx kuex dvy ruiux yuq, vlix kuex shuy muq.

³⁸Yuq muinz yuix maq vthuimc taq vlix htauk kvyuq vmaungx kuex dvy ruiux yuq, kvruex vlix kuex sawc muq.

³⁹Phuiuz mvy yaq phvnx ngvmx saz vthueyc kaz maungx shuimc gay jix waz kuex raungyac nuex httuiuc laz sawc muq.

⁴⁰Vthueyc vruex kaz ngvmx kuex phuiuz jix waz rueq piq khoz vkhvy kuex vhuy ruec tvy rax, yuq muinz piq kuex raungyac nuex httuiuc laz sawc muq; vthueyc vruex kaz maungx kuex lvmc wvnc jix waz piq khoz vkhvy kuex vhuy ruec tvy rax, yuq muinz piq kuex raungyac nuex httuiuc laz sawc muq.

⁴¹Ghaq nuex kvhet khuemx yaq phvnx ngvmx saz ruip rawx kuex sawc muq ningkhvnc nuex nuimshiq rueq phuiuz mvy muq,

⁴²vhuk vguez vwuk maq kvhet khuemx yaq phvnx, rvmuq ngoz ruiux vhuk bvlic phvnx htauk nuex muinz vhuk paunghvlc httax vtueq ghaq nuex kvhet khuemx yaq phvnx ngvmx kuex nauk phauk kaz, kvruex kuex sawc muq.

⁴³Kvkhoc phvnx ngvmx saz ngvmx kuex phauk vtueq miqmac shauk vgvnz nauk tvshuy shac kaz.

⁴⁴Ngaz kuex Yehowa nuimshiq Tishox rvtauk, nuimshiq shauk pumz kuex vsawc taq shuinz, yvmx khoc lac ngoz ruiux lec ngaz kuex vsawc rvtauk.

⁴⁵Ngaz kuex Yehowa rvtauk, Ejip mungx wawc nuimshiq tvdungc shvlc wvnc jix nuimshiq Tishox rvtauk. Nuimshiq vsawc yaungc rax, yvmx khoc lac ngoz ruiux lec ngaz kuex vsawc rvtauk.

⁴⁶Vruex kuex ngvmx saz htenc nuiyc wushawx htenc, yuix nuex httax yaq phvnx ruip saz nuiyc taungx nuex kvhet khuemc rvyaq phvnx ruip saz nuex seng vtueq tvrac vruex kuex,

⁴⁷sawc yaq, sawc muq nuiyc tvraungx httax yaq phvnx wawc phuiuz mvy yaq, phuiuz mvy muq kuex tvrv-phvlc tvkoc rvtueq.