Read Tase Naga LEWI 27 Bible Online

LEWI 27 - Tase Naga bible

LEWI 27

¹Yehowa rueq Moshe muex

²Israel miqsaz htenc rueq phvnc juing tvrac kuex kuq tueq. Ukhaq rueq yuq muinz Yehowa muex bomkhvrc htep kuex phvnx shaungx ngoz tueq khvmc kuq shuex nuex, vruex kuimphox htawz rulc rv-ngvlc kuq ruiux yuq piq kuex tvdungc gay rvhumc tuex.

³Vhtawz tvrac tawk shenc rulc rv-ngvlc: - rullungx wawc rok nueyc maq wawc rok tvruk panc miqwaz kuex: kuimphox sawx 50 - yalxjuik kuex: kuimphox sawx 30 - rullungx wawc bv-ngac maq wawc rok nueyc panc miqwaz kuex: kuimphox sawx 20 - yalxjuik kuex: kuimphox sawx 10 - rullungx wawc bv-ngac maq kaq kox miqwaz saz kuex: kuimphox sawx 5 - rullungx wawc bv-ngac maq kaq kox yalxjuik saz kuex: kuimphox sawx 3 - rullungx wawc rok tvruk jvnc miqwaz kuex: kuimphox sawx 15 - rullungx wawc rok tvruk jvnc yalxjuik kuex: kuimphox sawx 10

⁸Bomkhvrc tay jix waz kuex htemc rvmc hvlc rvtueq vhtawz vrawz vtaq kuex phvnx lot muq ngoz ruiux yuq, piq kuex shomc waz kox nuex shvlc lvy rax, bomkhvmc tvy jix waz piq rueq kuq lot shuex tanc khvnc maq shomc waz rueq vhtawz htvp htaz kuy rax.

⁹Yehowa muex bomkhvrc nuex seng yaq nyvmx saz shomc kuq ruiux yuq, Yehowa muex kuq shuex yauk noalc phvnx ruip htenc kuex vsawc shex ningkhvnc nuex,

¹⁰Bomkhvrc tvy jix waz rueq kvruex laung vganc nyvmx saz maq layc mvy muq. Piq rueq vsuing layc gay ruiux yuq kvruex vnueyc wvtaungx kuex Yehowa tvkoc yaungc rax.

¹¹Yuq muinz bomkhvrc nuex seng yaq nyvmx saz kuex nawk palx htungx maq sawc muq ngoz ruiux yuq, Yehowa muex shomc kuy mvy muq, piq rueq nyvmx saz kvruex shomc waz kox nuex lvmc lvy rax.

¹²Shomc waz rueq nyvmx saz kvruex lawc vtueq vhtawz htvp htaz tvy rax, kvkhoc taq shuex htawz kuex rvkhauk laz tvtsuir rax.

¹³Kvruex waz rueq nyvmx saz kvruex rez yek roc ngoz ruiux yuq, vhtawz vtaq htauk kvyuq vshac htauk nuex pasen 20 jvt kuy juing rvtuex.

¹⁴Miq washiz shiz rueq miqmac yuimx kuex Yehowa muex lekuq ruiux yuq, shomc waz rueq yuimx kvruex vhvlx vbac kuex lawc vtueq vhtawz htvp htaz tvy rax, kvkhoc taq shuex vhtawz kuex rvkhauk laz tvtsuir rax.

¹⁵Miqmac yuimx kuex lekuy jix waz rueq yuimx kvruex tvyez rez yek roc ruiux yuq, vhtawz vtaq htauk kvyuq vshac htauk nuex pasen 20 jvt kuy juing rvtuex.

¹⁶Miq washiz shiz rueq miqmac wuik vnax wawc ghaq phushiz tanc kuex Yehowa muex lekuq ruiux yuq, kvruex ghaqphux kvyuq khic yuingc yaq lix kuex lawc vtueq vhtawz htvp htaz rax, wanx tsvmz kilogram 20 yuingc juing ghaqphux kuex kuimphox sawx rokshiz nuex htvp htaz tvy rax.

¹⁷Piq rueq miqmac wuik vnax kuex Tvyez kuy Raungwawc vhtumx wvnc nuex lekuq ruiux yuq, vhtawz rvkhauk laz kuy rax.

¹⁸Piq rueq ghaqphux kuex Tvyez kuy Raungwawc httuiuc yix maq, laukshiz hulawx lekuq yek ruiux yuq shomc waz rueq yix maq tvyez kuy yek juing raungwawc nuex httuiuc laz, kvjungx yaq raungwawc htenc kvruex laung vhtawz kuex tvyomx vtueq htvp htaz kuy rax.

¹⁹Piq rueq ghaqphux kvruex tvyez rez yek roc ngoz ruiux yuq, vhtawz vtaq htauk kvyuq pasen 20 jvt kuy juing rvtuex.

²⁰Miq washiz shiz rueq Yehowa kox wawc ghaqphux kuex kungkhux tvyez ruiyx muq maq, vganc washiz muex shaung gay ruiux yuq, piq rueq ghaqphux kvruex tvyez ruiyx lvp muq shex.

²¹Httuiuc yek yaq Tvyez kuy Raungwawc nuex kvruex ghaqphux kuex Yehowa tvkoc pattup tsak jungx muex yaungx wvnc tuex; kvruex kuex shomc waz bix rueq guimz juing rvtueq.

²²Miq washiz shiz rueq vruiyx taq shec wuik vnax kuex Yehowa muex lekuq ruiux yuq,

²³shomc waz rueq Tvyez kuy Raungwawc nuex httuiuc laz, kvjungx yaq raungwawc kuex wvllawc vtueq wuik vnax htawz vrawz kuex htvp htaz rax, piq rueq wuik vnax htawz vrawz kuex kvruex raungnuiyq kvkaq dvyx kuy rax, kvruex kuimphox kuex Yehowa rueq guimz yaq.

²⁴Tvyez kuy Raungwawc httuiuc wvnc ruiux yuq, kvruex wuik vnax kuex vphaungc wawc ghaq jungx jix waz, rvmuq ngoz ruiux vsuiuz vsaz yauk nuex lekuy rax.

²⁵Vhtawz vrawz htenc kuex mungx htawz htvp htaz shuex kvkhoc tvy rax.

²⁶Nyvmx saz nyuiuz phaungc shauk shauk kuex Yehowa rueq guimz yaq ningkhvnc nuex, uraq muinz kvruex kuex vkuy roc thuinz maq shomc kuq lvp muq; manx saz, khelbuenx saz, khelkhix saz htenc kuex Yehowa laung rvtueq,

²⁷yuq muinz sawc muq nyvmx saz wawc nyuiuz phaungc kuex htvp htaz taq tueq vhtawz htauk kvyuq shashiz htauk nuex pasen 20 jvt kuy juing rvtuex. Kvruex tvyez ruiyx yek muq ngoz ruiux yuq, vganc washiz muex mungx htawz maq shaungc kuy rax.

²⁸Miqsaz muinz, nyvmx saz muinz, wuik vnax muinz Yehowa tvkoc lekuy tvlanc vlekuq gay kuex rvrez rvshaungc mvy muq. Kvruex kuex pattup Yehowa tvkoc rvtueq.

²⁹Miqsaz ngoz ruiux muinz kuy tvlanc vkuq gay kuex tvyez ruiyx yek lvp shuex rvmuq, piq kuex vthueyc juing rvtueq.

³⁰Tuiz vtsvmz yuq muinz, pulx thuey waqthuimx yuq muinz ghaq wawc vdung lotlaz mvnz rokshiz wawc mvnshiz kuex Yehowa tvkoc rvtueq.

³¹Miq washiz shiz rueq pulx thuey waqthuimx kvruex vrez roc ngoz ruiux yuq, vhtawz htvp htaz tvy yoalx htauk kvyuq shashiz htauk nuex pasen 20 jvt vtueq rez rax.

³²Vremc vruex nyvmx saz htenc rokshiz htauk wawc vshiz kuex Yehowa laung rvtueq. Nyvmx saz htenc kuex wvl vtueq rokshiz htauk wawc vshiz kuex Yehowa mvnz rvtueq.

³³Vtaungx jix rueq nyvmx saz vbac kuex thvl vtueq Yehowa muex kuy tvkoc kvmungx mvy muq, vthvlc vruez taq nyvmx saz kuex vganc maq httungx phvyx mvy muq, nyvmx saz vshiz kuex vganc vshiz maq httungx phvyx ruiux yuq, vnueyc vtaungx Yehowa laung yaungx tuex ningkhvnc nuex tvyez rez mvy muq.

³⁴Vkhoc vnvrc kvjaz htenc kuex Israel miqsaz tvkoc Yehowa rueq Moshe muex Sinai Kanx maq vkuq rvtueq.