Read Tase Naga LEWI 5 Bible Online

LEWI 5 - Tase Naga bible

LEWI 5

¹Mvrax kvdawc shomc kuy yauk shuimc kuex vkhoc rvtueq. Mkhoc shoc maq miq washiz shiz kuex tvrac rungx maq hakhix yaungc tvkoc gvl ruiux yuq, piq rueq khiz tueq, tay tueq rulc rv-ngvlc jungx kuq muq ngoz ruiux yuq, mvrax yaq gay muex yaungx yaq.

²Miq vshiz shiz rueq htungx vlayx rulc rv-ngvlc sawc muq nyvmx saz maungx ikhoc phvnx kuex tvmaung raung muq maq shuimx gay tueq nuiyc piq rueq yvmx lac shuimx gay tvnx kuex lvmx lvy dvyx piq rueq tuiuz ruiux yuq, piq kuex sawc muq nuiyc mvrax lvp tueq.

³Miq vshiz shiz rueq miqsaz nuex kungkhux maq phuex kop yaq sawc muq phvnx yvmx yuq muinz tvmaung raung muq maq shuimx gay tueq nuiyc yvmx dvyx ruezruez piq rueq yvmx lac shuimx gay tvnx kuex lvmx lvy dvyx piq rueq tuiuz ruiux yuq, piq rueq mvrax lvp yaq.

⁴Miq washiz shiz rueq yvmx muinz rac muq ngoz tueq tvmaung muq maq kvtuemc vtueq bomkhvrc tvy yix, piq rueq yvmx lac shuimx gay tvnx kuex kvkaq lvmx lvy tuiuz ruiux yuq, piq rueq mvrax lvp tueq.

⁵Kvkhoc phvnx mvrax lvp jix waz kuex piq rueq shuimc tvyaq tueq mvrax laung nuex kvpiq nvyx lvp tuex rvmuq. Kvruex yaq gay tueq mvrax laung nuex,

⁶shomc kuy juing tvyaungc muex khelbuenx vkuiux rvmuq ngoz ruiux khelkhix vkuiux kuex Yehowa kox nuex lvmc lvy juing rvtueq. Shomc waz rueq kvruex waz mvrax laung nuex shomc nawk kuy shomc kuq shuex rvtueq.

⁷Miq vshiz shiz rueq khelbuenx, rvmuq ngoz ruiux khelkhix maq shomc kuy tvkoc taungx lot muq ngoz ruiux kuex, piq mvrax kvdawc laung nuex hituiuc vnueyc, rvmuq ngoz ruiux baro vnueyc kuex Yehowa kox nuex lvmc lvy juing rvtueq, vshiz kuex mvrax kvdawc laung nuex, vshiz kuex wvr maq jauk shomc kuy laung nuex rvtueq.

⁸Piq rueq kvruex shomc waz kox nuex lvmz laq ruiux yuq, shomc waz rueq mvrax kvdawc shomc kuy juing wushawx kvmaq kungkhux shomc kuy juing rvtueq. Piq rueq wushawx khux kuex kvpuinc kaz muq juing vduingx tv-ngawk gay juing rvtueq,

⁹kvmaq wushawx tvguiy raungluingx kuex lvmz vtueq shomrawx tvroz nuex buit juing rvtueq. Kvjungx yaq tvguiy kuex shomrawx jungx yaz nuex tvjuiux gay rax. Vruex kuex mvrax lvmc gay shomc kuy rvtueq.

¹⁰Kvruex yimaq piq rueq vphvnc juing htungx httax yaq rulc rv-ngvlc vganc vshiz kuex wvr maq jauk shomc kuy juing rvtueq. Ekvkhoc maq shomc waz rueq kvruex waz mvrax laung nuex shomc nawk kuy shomc kuq ruiux yuq mvrax dawc kuy rvhumc tuex.

¹¹Kvruex waz rueq hituiuc vnueyc, rvmuq ngoz ruiux baro vnueyc lvp lot muq ngoz ruiux kuex, mvrax kvdawc shomc kuy tvkoc wungwanx kilogram vshiz kuex lvmc lvy rax. Piq rueq wungwanx htauk kvyuq olip puiz, rvmuq ngoz ruiux vhomc vtumc phvnx htawc mvy muq, yvmx khoc lac ngoz ruiux lec kvruex vruiy vwungx maq shomc kuy rvmuq, mvrax kvdawc shomc kuy rvtueq.

¹²Piq rueq kvruex shomc waz kox nuex lvmz laq vtueq shomc waz rueq kvruex wawc yaukkhunc shiz lvmz ruiux Yehowa muex lotlaz shomc kuy mvhttarc tvtsuingc vshiz shomrawx htauk nuex phuiuz vsvy shomc kuy ikhoc wvr maq jauk shomc kuy juing rvtueq. Kvruex kuex mvrax kvdawc shomc kuy rvtueq.

¹³Ekvkhoc maq shomc waz rueq kvruex waz mvrax laung nuex shomc nawk kuy shomc kuq yaq rvtueq, kvruex waz kuex mvrax dawc kuy rvhumc tuex. Kvjungx yaq wungwanx kuex shomc waz rueq phuiuz svy tvkoc rvtueq.

¹⁴Yehowa rueq Moshe muex vphvnc juing tvrac htenc kuex vkhoc kuq shec tueq.

¹⁵Ukhaq yuq muinz Yehowa tvkoc tvlvy kuy juing vsawc hup vsvmx htenc kuex tvmaung raung muq maq kvtungc wungc vtueq mvrax yaq gay ruiux yuq, Yehowa tvkoc shomc kuy juing vmac vtsac vguez khelbuenx pung, rvmuq ngoz ruiux khelkhix pung kuex lvmc lvy juing rvtueq. Kvruex htawz vrawz kuex tvrac rvkhauk laz shuimx yaq tawk rulc rv-ngvlc htvp htaz kuy juing rvtueq.

¹⁶Piq rueq kuy juing kuex tvlvy kuy tvkoc tvkhvlc gay tueq ningkhvnc nuex, yaq gay tueq laung kungkhux nuex kuy juing htauk nuex jvnc vtueq pasen 20 tvrvp kuy rax yaq. Piq rueq kvruex kuex shomc waz yauk nuex lekuq ruiux shomc waz rueq muinz kvruex waz yaq tueq mvrax laung nuex shomc nawk kuy tvyaungc muex nyvmx saz shomc kuq ruiux, kvruex waz kuex mvrax dawc kuy rvhumc tuex.

¹⁷Miq vshiz shiz rueq Yehowa rueq vnvr lvmz phvnx shishiz kuex tvmaung raung muq maq yaq gay ruiux yuq, piq mvrax yaq gay ningkhvnc nuex piq rueq mvrax murx gurx shuex.

¹⁸Piq rueq shomc waz kox nuex mvrax kvdawc shomc kuy juing tvyaungc muex vmac vtsac vguez khelbuenx pung, rvmuq ngoz ruiux khelkhix pung vshiz lvmc lvy juing rvtueq. Kvruex htawz vrawz kuex tvrac rvkhauk laz shuimx yaq tawk rulc rv-ngvlc vhtawz htvp htaz juing rvtueq. Shomc waz rueq kvruex waz rueq tvmaung raung muq yaq gay tueq mvrax laung nuex shomc nawk kuq ruiux yuq, kvruex waz muinz mvrax dawc kuy rvhumc tuex.

¹⁹Kvruex kuex Yehowa muex piq yaq gay tueq mvrax laung nuex, mvrax kvdawc shomc kuy rvtueq.