Read Tase Naga LEWI 8 Bible Online

LEWI 8 - Tase Naga bible

LEWI 8

¹Yehowa rueq Moshe muex,

²“Ngaz httax yaq Tap kaluix daungx kvyuq Arun nac sahez kuex shvlx laq loq, shomc waz rueq svmc juing khvy, ruimruimc puiz tix, mvrax kvdawc shomc kuy juing manx roalc pung, khelbuenx pung nueyc, wisiz lomx muq wanx boarshiz kuex lvmz laq loq.

³Kvruex yuq mungx miqsaz htenc kuex gvl vtueq vdvmz nuex tvtuimx shuiuz,” ngoz tueq jungx tueq.

⁴Moshe kuex Yehowa rueq nvr tueq rulc rv-ngvlc shuimx kaz tueq, kvkaq miq htenc rvtuimx httuiuc kaz koq tueq,

⁵piq rueq, “Majuiuc ngaz rueq shuimx vshaungx kuex Yehowa rueq vnvr lvmz rvtueq,” ngoz tueq jungx tueq.

⁶Moshe rueq Arun nac sahez kuex max kvyuq shvlx laq vtueq yuix rvhoalc tvkoc jungx tueq.

⁷Piq rueq Arun muex svmhung nuiyc hungluz kuex tvsvmc ruiux khez nuex kheshuit shuit kuq tueq. Hungtuingx svmhung muinz piq rueq tvsvmc kuq ruiux, vsvp waq maq vtauk kheshuit maq piq khez nuex shuit kuq tueq.

⁸Piq rueq khuiuq puingc juing kvmuinz puingc kuq ruiux Urim nuiyc Thummim[1] kuex htawc taq tueq.

⁹Arun khux nuex khux phop kuex tvdaungc kuq ruiux, kvruex max kvyuq Yehowa rueq piq muex nvr tueq rulc rv-ngvlc vlekuq vsawc tvtsuingc mal rvtueq kuimphox marc kuex tvbuz kuq tueq.

¹⁰Kvruex yimaq Moshe rueq ruimruimc puiz tix kuex lvmz vtueq, Yehowa httax yaq Tap nuiyc kvyuq httax yaq hup svmx phvnx ruip saz kuex nyvt ruiux, kvruex hup vsvmx htenc kuex Yehowa muex lekuq tueq.

¹¹Piq rueq vpuiz wvyvmc lvmz vtueq shomrawx nuiyc shomrawx htauk nuex lauk mvshix buit ruiux, shomrawx nuex seng yaq hup svmx htenc, pantuimz nuiyc kvruex yaz phaungx htenc kuex Yehowa muex lekuq tueq.

¹²Kvmaq ruimruimc puiz tix wvyvmc kuex Arun khux nuex shvy ruiux, ngauz tvduic ruimruimx kuq tueq.

¹³Moshe kuex Yehowa rueq nvr tueq rulc rv-ngvlc Arun saz miqwaz sahez kuex max nuex gvl vtueq, svmhung htenc tvsvmc kuq ruiux, kheshuit shuit kuq tueq, khux nuex khux phuk htenc tv-phop kuq tueq.

¹⁴Moshe rueq mvrax kvdawc shomc kuy tvkoc manx roalc pung kuex het laq vtueq, Arun nac sahez muex manx khux poz kvyuq tsuinghez yauk kuex tvdaungc tueq.

¹⁵Moshe rueq kvruex thvt ruiux, tvguiy wvyvmc lvmz vtueq piq yaukshix maq shomrawx shuk wawc vrungx htenc kvyuq nyvt tueq. Kvjungx yaq tvguiy kuex shomrawx yaz phaungx kvyuq ruiuc gay tueq. Kvkhoc maq kvruex piq rueq lekuq ruiux tvsawc nawc tueq.

¹⁶Moshe rueq vwuk mungx wawc vpuiz lotlaz, vthuinz wawc vhvlx baung, vkvl htenc nuiyc vkvl wawc vpuiz htenc kuex lvmz vtueq, shomrawx htauk nuex wvr maq jauk tueq.

¹⁷Piq rueq manx khuix, vngvmx nuiyc vpuk vyiz vlomx kvjungx yaq lotlaz kuex Yehowa rueq nvr tueq rulc rv-ngvlc jerak phic nuex wvr maq jauk gay tueq.

¹⁸Kvruex yimaq Moshe rueq wvr maq jauk shomc kuy tvkoc khelbuenx pung kuex lvmz vtueq, Arun nac sahez muex khelbuenx khux poz kvyuq tsuinghez yauk kuex tvdaungc tueq.

¹⁹Moshe rueq kvruex thvt vtueq, tvguiy kuex shomrawx samx bvlic htauk kvyuq buit tueq.

²⁰Yehowa rueq nvr tueq rulc rv-ngvlc khelbuenx kuex tvhtaq tvruk jumz ruiux, vpuk vyiz nuiyc vhuk htenc kuex yuix maq hoal vtueq, vkhux poz, vpuiz maq raz tueq wvpumz tuimx wvr maq jauk tueq. Vkhoc wvr maq jauk shomc kuy kuex vphuiuz vsvy shomc kuy ningkhvnc nuex, kvruex homc tumc kuex Yehowa rueq raungc raq yaq.

²²Kvruex yimaq Moshe rueq shomc waz bix muex ngauz tvduic kuy muex vnueyc ngoc yaungc khelbuenx pung waz kuex hvt laq vtueq, kvruex khux kvyuq Arun nac sahez yauk kuex tvdaungc tueq.

²³Moshe rueq kvruex thvt ruiux tvguiy wvyvmc kuex lvmz vtueq, Arun nac keq kox nabuir nuex muinz, yauk keq kox shikuiux nuiyc yaz keq kox shikuiux kvyuq muinz nyvt kuq tueq.

²⁴Kvruex yimaq Arun sahez kuex gvl vtueq, tsuinghez nac keq kox nabuir htenc, yauk keq kox shikuiux htenc nuiyc yaz keq kox shikuiux htenc nuex nyvt kuq tueq. Kvjungx yaq tvguiy kuex Moshe rueq shomrawx samx bvlic htauk nuex buit wuinc tueq.

²⁵Piq rueq vpuiz, vpuiz waq vmiz, vwuk mungx nuex kop yaq puiz lotlaz, vthuinz wawc vhvlx pinhtumc baung, vkvl htenc nuiyc kvyuq kop yaq vpuiz, vkeq kox huk kuex lvmz tueq.

²⁶Kvruex yimaq wisiz lomx muq wanx boarx kvwawc wanx phux shiz lvmz vtueq Yehowa muex lekuq ruiux, vpuiz maq vtvhungx wanx, wanx vshanx htenc wawc vshiz phok lvmz vtueq, khelbuenx puiz rulc vkeq kox huk phawc htauk kvyuq tvdaungc tueq.

²⁷Piq rueq phuiuz svy lotlaz kuex Arun nac sahez yauk nuex kuq koq tueq, tsuinghez rueq Yehowa muex yauk noalc htep tvyaungc vtueq lekuq wuez tueq.

²⁸Kvruex yimaq Moshe rueq tsuinghez kox wawc kvruex phuiuz vsvy kuex lvmz vtueq, ngauz tvduic shomc kuy juing ikhoc tvyaungc ruiux wvr maq jauk shomc kuy juing htauk shomrawx nuex jauk tueq. Kvruex kuex phuiuz vsvy shomc kuy ningkhvnc nuex kvruex homc tumc kuex Yehowa rueq raungc raq yaq.

²⁹Kvruex yimaq Moshe rueq vkhuiuq kuex yauk noalc htep muex tvyaungc vtueq Yehowa muex lekuq tueq. Kvruex ngauz tvduic khelbuenx khuiuq ngvmx kuex Moshe laung mvnjuz rvtueq. Yehowa rueq nvr tueq phvnx ruip saz kuex Moshe rueq shuimx lvmz tueq.

³⁰Moshe rueq ruimruimc puiz tix wvyvmc nuiyc shomrawx htauk wawc tvguiy wvyvmc kuex lvmz vtueq, Arun nac sahez htauk nuex nuiyc tsuinghez khoz vkhvy nuex buit wuinz kuq tueq. Piq rueq kvkhoc raz tueq tsuinghez nuiyc tsuinghez khoz vkhvy htenc kuex Yehowa muex lekuq tueq.

³¹Moshe rueq Arun nac sahez muex, “Ngvmx kuex Yehowa httax yaq Tap kaluix daungx hep kvyuq lumc vtueq, Yehowa rueq nvr tueq rulc rv-ngvlc ngauz tvduic shomc kuy juing wanx rulc phauk naungx shuinz.

³²Kvjungx yaq ngvmx nuiyc wanx kuex wvr nuex jauk gay shuinz.

³³Nuimhez kuex ngauz tvduic htungx tvlot laz raungx mvshix tup Tap kaluix phic kox nuex nauk dung kaz.

³⁴Nuimhez mvrax dawc tvkoc majuiuc raungnuiyq vkhoc shuimx lvmz vshix kuex Yehowa rueq vnvr rvtueq.

³⁵Yehowa rueq nvr yaq htenc kuex nuimhez rueq Tap kaluix daungx kvyuq raungx mvshix tup, raungnuiyq raungwvrx shuimx lvmz shuinz. Mkhoc shoc maq nuimhez rueq shuimx lvmz muit ngoz ruiux, nuimhez vthueyc rvtuinx. Vruex kuex Yehowa rueq ngaz muex vnvr bomc rvtueq,” ngoz tueq jungx tueq.

³⁶Kvkhoc rvtueq Moshe maq raz tueq Yehowa rueq nvr tueq phvnx ruip saz kuex Arun nac sahez rueq shuimx lvmz wuez tueq.