Read Tase Naga YEREMIA 19 Bible Online

YEREMIA 19 - Tase Naga bible

YEREMIA 19

¹Yehowa rueq ngaz muex gvmtuik vshiz rez kay tvkoc jungx phuex. Vpiq rueq mungx miqsaz wawc walaungx bix wvyvmc nuiyc shomc waz bix wawc nyuiuz waz wvyvmc tauk shvlx laq vtueq,

²Tuik bunx Palx Kaluix maq yanz ruiux Hinnom Warc nuex kay tvkoc jungx phuex. Kvruex yuq ngaz rueq jungc juing bomjungc kuex piq rueq ngaz muex kuq phuex.

³Yehowa rueq ngaz muex jungx phuex, “Yuda mungx wawc hokhvmx bix nuiyc Yerusalem miqsaz lex, ngaz, Tvphaungc Tvsuip Yehowa Israel Tishox rueq jungx phaungx kuex tay shuinz. Ngaz rueq vruex baung vyuq kvkhoc thuimkux kuex tvdung gay shaungx, kvkaq kvruex lvmz tay jix miq tek vtueq kawc yawc wuez tuex.

⁴Ngaz rueq vruex shuimx shaungx, yvmx khoc lac ngoz ruiux lec miq htenc rueq ngaz kuex tuip gay phuex; tsuingshiq nuiyc tsuingshiq jix vwaz tamx rueq muinz, Yuda hokhvmx bix rueq muinz tuiuz muq vganc tishox htenc muex vruex baung htenc vyuq, shomc nawk kuy juing maq shomc kuq vtueq tvshuy shac tueq. Tsuingshiq rueq vruex baung vyuq mvrax vguez miqsaz tvguiy tvmvrc tueq,

⁵tsuingshiq sahez kuex wvr maq jauk shomc nawk juing muex tvyaungc vtueq Bala tvkoc shomrawx htenc tvhungx taq tueq. Vkhoc shuimc tvkoc tsuingshiq muex ngaz rueq mkaq muinz nvr mauk doc; kvkhoc ngvy thuinz nuex mkaq muinz httax tueq rvmuq.

⁶Kvkhoc rvtueq, vruex baung kuex Tophet, rvmuq ngoz ruiux Hinnom Warc ngoz tueq mkaq muinz muingc shuex rvmuq, kvkhoc ngoc tvraung, Miq Thvy Warc ngoz tueq muingc vkhing httuiuc wvnc tuex.

⁷Ngaz rueq vruex baung vyuq Yuda mungx miqsaz nuiyc Yerusalem ghaq jix rueq dvnc yaq lotlaz kuex tv-phvyx gay shaungx. Tsuingshiq muex ralx hez kvmac tvtaungx gay ruiux tsuingshiq kuex ralx rvlungc nuex tvthvt gay shaungx. Tsuingshiq maungx htenc kuex wushawx htenc nuiyc ngvmx saz svl vwvl htenc phuiuz svy muex kuq shaungx.

⁸Ngaz rueq vruex ghaqyungx vyuq bac hvlc vhiz juing tvhttuiuc shaungx ningkhvnc nuex, kvruex maq lvy jix miq tek vtueq kawc yawc ruiux wangc wuez tuex.

⁹Ralx hez rueq ghaqyungx kuex komc gay ruiux kvwawc miq htenc kuex thvy gay tvkoc hunglaungx wuez tuex. Ralx hez rueq komc laq tueq kuex vhiz juing ningkhvnc nuex ghaqyungx mungx nuex httax yaq miq htenc kuex vshiz maq vshiz rv-phuiuz vtueq, tsuingshiq sahez tauk phauk gay wuez tueq,” ngoz tueq jungx tueq.

¹⁰Kvruex yimaq Yehowa rueq ngaz rulc vdvmz kay naungc jix hez max kac nuex gvmtuik kuex tvbunx gay tvkoc jungx phuex

¹¹Tvphaungc Tvsuip Yehowa rueq, “Gvmtuik kuex tvhvlc yek mvy muq bunx kaz tueq ikhoc vruex ghaqyungx wawc miq htenc nuiyc vruex ghaqyungx kuex tvbunx gay shaungx. Tsuingshiq maungx htenc kuex vluip juing baung vguez ningkhvnc nuex miq htenc rueq tsuingshiq maungx kuex Tophet nuex muinz luip shuex.

¹²Vruex ghaqyungx nuiyc kvyuq httax jix hez kuex Tophet ikhoc ngaz rueq tvyaungc gay shaungx ngoz tueq ngaz rueq bomkhvmc kuq vshaungx.

¹³Yerusalem yuimx htenc, Yuda hokhvmx yuimx htenc, miqmac yuimx wux khux raungx nuex vhomc vtumc phvnx jauk vtueq ruiysuiyq htenc nuiyc vganc tishox htenc muex svpiq tix shvy vtueq shomc kuq yaq yuimx lotlaz kuex Tophet ikhoc sawc muq baung muex yaungx tuex,” ngoz tueq.

¹⁴Kvruex yimaq ngaz kuex piq bomjungc kuex jungphvnc tvkoc Yehowa rueq tvkaz phuex Tophet maq kaz wvnc tauk. Ngaz kuex Shomc yuimx wangx mungx nuex nyuip vtueq jvp ruiux miq htenc muex,

¹⁵Tvphaungc Tvsuip Yehowa Israel Tishox, rueq jungx tueq, “Mnoz khux tvtsanz vtueq ngaz rueq jungx phaungx kuex tay muq ningkhvnc nuex ngaz rueq ruez shaungx ngoz tueq jungx phaungx rulc rv-ngvlc, vruex ghaqyungx vyuq muinz, tvroz wawc miqghaq htenc nuex muinz ngaz rueq murx tvgurc shaungx,” ngoz tueq jungx tueq.