Read Tase Naga YEREMIA 21 Bible Online

YEREMIA 21 - Tase Naga bible

YEREMIA 21

¹Yuda hokhvmx Zedekia rueq Malchia saz Pashhur nuiyc Maseia saz Zephania kuex ngaz kox nuex tvkaz vtueq vkhoc thoz phuex:

²“Babelon hokhvmx Nebukhadnezar nuiyc piq nolaungx bix rueq ghaqyungx kuex komc gay tueq ningkhvnc nuex, naungshiq tvkoc Yehowa kox wawc kejux maq jungx kuq koq. Yehowa rueq naungshiq tvkoc vpiq vwangc juing phvnx shishiz tvyaungc vtueq Nebukhadnezar kuex mtvyek gay shueq.”

³Kvruex yimaq Yehowa rueq ngaz muex vkhoc jungx phuex rulc rv-ngvlc ngaz kox nuex tvkaz phuex hez muex jungx tauk.

⁴Yehowa Israel Tishox rueq Zedekia muex vkhoc jungc tvkoc tvjungx phuex, “Ngaz rueq Babelon hokhvmx nuiyc piq nolaungx bix kuex khvt jix mnolaungx bix kuex tvsumx gay shaungx. Mnolaungx bix koz vlaq taungx vwawx htenc kuex ghaqyungx vmungx baung nuex phungc taq shuex.

⁵Ngaz rueq mnoz kuex ngvy hungc lotlaz, ngvy thuinkhvy, ngvy kvbuit nuiyc ngvy thuinz phez vtueq khvt gay shaungx.

⁶Vruex ghaqyungx nuex httaz jix miq lotlaz ngaz rueq thvt gay shaungx; miq htenc nuiyc nyvmx saz htenc kuex vhiz juing thuimkux rueq thueyc wuez tuex.

⁷Yuq muinz, mnoz nuiyc mmiq vyungx vlaungx bix kuex ralx rvlungc, khvmx vrvmc nuiyc vmac vtsac wawc dung wvnc ruiux muinz, kvjungx yaq nuimshiq nuiyc vruex ghaqyungx wawc miq htenc kuex hokhvmx Nebukhadnezar nuiyc mnoz thvy gay roc yaq mralx hez yauk nuex nuimshiq lotlaz ngaz rueq lekuq gay phaungx. Nebukhadnezar rueq nuimshiq kuex thvt gay kv-phuinx. Piq rueq nuimshiq vshiz muinz tvjungx kv-phuinx rvmuq, menjenc kv-phuinx rvmuq, nuimshiq ukhaq muex muinz thuinz tvthuiuz shuex rvmuq. Ngaz, Yehowa rueq jungx vshaungx,” ngoz tueq.

⁸Kvruex yimaq Yehowa rueq miq htenc kvmac jungc tvkoc ngaz muex jungx phuex, “Tay shuinz! Ngaz, Yehowa rueq mnoz muex rullungx tvraungx lvmx nuiyc vthueyc nuex kay lvmx vwawc thvlc wvnc tvkoc kuq vphaungx.

⁹Vruex ghaqyungx vyuq httaz jix ukhaq yuq muinz ralx rvlungc, khvmx vrvmc nuiyc vmac vtsac htenc maq thvy gay rvhumc tuex. Yuq muinz majuiuc ghaqyungx vruex khvt yaq Babelon miqsaz kox nuex nyuip waungc jix hez kuex vthvy gay rvhumc tuex rvmuq; tsuingshiq rullungx kuex dung wvnc lvp tuex.

¹⁰Ngaz rueq vruex ghaqyungx kuex kvjungx muq tvkoc htvp htaz gay tauk, kvruex tvbac gay shuex. Kvruex ghaqyungx kuex Babelon hokhvmx muex lekuq gay vtueq, piq rueq ghaq rawx nuex httuiuc laz jauk gay shuex. Ngaz Yehowa rueq jungx vshaungx.”

¹¹Yehowa rueq Dawid suiuz vsaz tamx, Yuda honoc yuimx wawc miq hez muex bomjungc jungc kuy tvkoc ngaz muex jungx phuex: “Ngaz Yehowa rueq jungx vphaungx kuex tay wuez shuinz. Lawc shuinz vlvmz rvkhauk laz maq wvraungx nuiyq phoc kuy rax. Piq muex laulawc jix waz kox wawc laulawc rvhumc muq tvkoc tvguing shuiuz. Mkhoc shoc maq mnoz rueq shuimx muq ngoz ruiux yuq, mnoz rueq layx bac shuimx vshuiux kuex tvmut mvy muq wvr ikhoc ngvy thuinkhvy rueq khamc gay shuex.

¹³Yerusalem lex, mnoz kuex tvnx nuex ngaungc yaq lung rauk ikhoc warc tvnx htenc htauk nuex johvlc jvp yaq. Yuq muinz ngaz rueq mnoz kuex khvt gay phaungx. Nuiyshiq kuex uraq muinz khvt lot muq, mpalx ruk htenc kuex uraq muinz tvbunx gay shuex rvmuq, ngoz tueq mnoz rueq ngoz shuiux.

¹⁴Yuq muinz mnoz rueq shuimx wvnc toq rulc rv-ngvlc ngaz rueq mnoz muex murx tvgurc phaungx. Mhoc kuex wvr maq jauk gay shaungx, kvmaq wvr kvraq tvroz tuimz kuex khamc gay shuex. Ngaz, Yehowa rueq jungx vshaungx.”