Read Tase Naga YEREMIA 24 Bible Online

YEREMIA 24 - Tase Naga bible

YEREMIA 24

¹Yehowa rueq Shomc Yuimx kalc nuex vtaq phuiuz muiuq thuey boarx vnueyc kuex ngaz muex tvkhic phuex. (Kvruex kuex Jehoiakim saz Yuda Hokhvmx Jehoiachin nuiyc Yuda walaungx bix, thamx waz bix, nuiyc vshuimc vlvmc thenc hvlc bix htenc rulc vdvmz Yerusalem maq Babelon mungx nuex Babelon Hokhvmx Nebukhadnezar rueq shvlc wvnc yix yaungx wvnc tueq lvmz rvtueq.)

²Vphaungc wawc boarx nuex kungkhux vmuinx phuiuq muiuq thuey vhvlx htenc httax yaq; vganc vshiz nuex kuex vsvy mvy muq phuiuq muiuq thuey htenc vbac sawc sauk rvtueq.

³Kvruex yimaq Yehowa rueq ngaz muex, “Yeremia lex, mnoz rueq yvmx lac khiz tonx?” ngoz tueq wiz phuex. Ngaz rueq, “Phuiuq muiuq thuey htenc khiz tauk. Vhvlx phuiuq muiuq thuey kuex hvlc hvlc, vbac phuiuq muiuq thuey kuex bac hvlc, vsvy mvy muq,” ngoz tueq tvralc tauk.

⁴Kvkhoc rvtueq Yehowa rueq ngaz muex jungx phuex,

⁵“Ngaz Yehowa Israel Tishox rueq Babelon mungx nuex shvlc wvnc rvhumc jix miq htenc kuex, vhvlx phuiuq muiuq thuey vkhoc yaungx tuex ngoz tueq tvmaung vshaungx; ngaz rueq tsuingshiq muex menjenc vtueq tsvp kvp shaungx.

⁶Ngaz rueq tsuingshiq kuex bvmc lawc vtueq vruex mungtan vyuq tvyez shvlx wvnc yek shaungx. Ngaz rueq tsuingshiq kuex tvjvp guirx ruiux tvrul gay mauk; tsuingshiq kuex khic yuingc vtueq vphic rvgay shaungx rvmuq.

⁷Ngaz kuex Yehowa rvtauk lvmz tuiuz tvkoc, vtuiuz juing thuinz tsuingshiq muex ngaz rueq kuq shaungx. Kvkaq tsuingshiq thuinz vmungx lotlaz maq ngaz kox nuex yek wuez ruex ningkhvnc nuex, tsuingshiq kuex ngvy miqsaz yaungx ruiux, ngaz kuex tsuingshiq Tishox muex yaungx taungx.

⁸“Yuda Hokhvmx Zedekia, piq rulc vdvmz httax yaq mungx shuimc jix hez, vruex mungtan vyuq kvjungx httax yaq Yerusalem ghaq wuinz nuiyc Ejip mungx maq vkvhttot httax kaz htenc kuex, ngaz Yehowa rueq svy mvy muq laz juing vbac phuiuq muiuq thuey htenc ikhoc htvp htaz vtueq rvbomc nyamc taungx.

⁹Ngaz rueq mungkawx wawc miqphvnx lotlaz kv-khuirc hiyaz laz juing bac hvlc thuimkux kuex tsuingshiq htauk nuex tv-httuiuc shaungx. Ngaz rueq tsuingshiq tvpenc gay tauk baung ruip saz wawc miqphvnx lotlaz rueq tsuingshiq muex nueykuic shuex, shummarc shuex, ngoz ngax jungx saq vtueq tsuingshiq muingc maq kvtuemc taungc bomc rvhumc tuex.

¹⁰Tsuingshiq nuiyc tsuingshiq jix vwaz tamx muex ngaz rueq kuq tauk mungtan nuex tsuingshiq vshiz muinz vtvraungx httax muq laz juing tsuingshiq kox nuex ralx rvlungc, khvmx vrvmc nuiyc vmac vtsac htenc tv-httuiuc shaungx,” ngoz tueq jungx tueq.