Read Tase Naga YEREMIA 28 Bible Online

YEREMIA 28 - Tase Naga bible

YEREMIA 28

¹Kvruex raungwawc dvyx, Yuda hokhvmx Zedekia hokhvmx yaungc yaq wawc bvlic rac yapix lex bv-ngac nuex, Gibeon ghaq wawc Azur saz shvmmax Hanania rueq Shomc Yuimx mungx maq ngaz muex jungx phuex. Piq rueq ngaz kuex shomc waz bix nuiyc mungx miqsaz htumc nuex

²Tvphaungc Tvsuip Yehowa, Israel Tishox rueq jungx tueq lvmx vkhoc jungx tueq: “Ngaz rueq Babelon hokhvmx waz luimc vkawc kuex tvbunx gay tauk.

³Hokhvmx Nebukhadnezar rueq Babelon mungx nuex lvmz wvnc tueq Shomc Yuimx wawc tsak vnyvmx htenc lotlaz kuex ngaz rueq wawc nueyc lvmvnx vyuq lvmz wvnc yek shaungx.

⁴Ngaz rueq Babelon nuex lvp thuq wvnc tueq Yuda miqsaz lotlaz rulc vdvmz Jehoiakim saz Yuda hokhvmx Jehoiachin muinz tvyez shvlx wvnc yek shaungx. Rvtueq, ngaz rueq Babelon hokhvmx waz luimc vkawc kuex tv-ngawk kuq gay shaungx. Ngaz, Yehowa rueq jungx vshaungx.”

⁵Kvruex yimaq Shomc Yuimx mungx nuex jvp yaq shomc waz bix nuiyc mungx miqsaz lotlaz khaungkac nuex, ngaz rueq Hanania muex,

⁶“Vwangc juing nyix! Yehowa rueq kvruex mruez shueq ngaz rueq tvluimc vshaungx! Shomc Yuimx tsak vnyvmx lotlaz nuiyc vthuq wvnc rvhumc jix mungx miqsaz lotlaz kuex Babelon mungx wawc vpiq rueq tvyez shvlx wvnc yek shuex lvmx jungx jix vpiq shvmmax kvjaz kuex vpiq rueq tvhungx kuq shuex, ngaz rueq vsuing tvluimc vshaungx.

⁷Yuq muinz mnoz nuiyc mungx miqsaz htenc ngaz rueq jungx phaungx kuex tay wuez shuinz.

⁸Mnoz nuiyc ngvy vkhing max shauk, mvnnuex wawc shvmmax bix rueq miqphvnx paunghvlc muex nuiyc luimc vkawc yunghvlc mungtan htenc, ralx rvlungc, khvmx vrvmc nuiyc vmac vtsac thuimkux dung tuex lvmz jungx wvnc tueq.

⁹Yuq muinz nomic httax tuex ngoz tueq tvluz nuex jungc jix shvmmax kuex piq kvjaz vsuing yaungx wvnc tueq kuex khiz vtueq jix piq kuex Yehowa rueq vtvkaz shvmmax rvkhauk laz doc rvtueq lvmz dvyx lvp wvnc shuex,” ngoz tueq jungx tauk.

¹⁰Kvruex yimaq Hanania rueq ngvy duingx wawc kantaung kuex lvmz gay ruiux, kvruex tvhtaq tvruk tv-ngawk gay vtueq,

¹¹miq lotlaz khaungkac nuex, “Vruex kuex miqphvnx lotlaz duingx nuex Hokhvmx Nebukhadnezar rueq vtvdaungc taq kantaung kuex vpiq rueq vkhoc tv-ngawk gay shuex; vpiq rueq kvruex yauk shuimc kuex wawc nueyc lvmvnx nuex tvlot gay shuex ngoz tueq Yehowa rueq jungx tueq kvjaz kuex jungx tueq,” ngoz tueq jungx tueq. Kvruex yimaq ngaz dung kaz tauk.

¹²Vshauk puq httaz yix maq Yehowa rueq ngaz muex jungx phuex

¹³Hanania kox nuex kaz vtueq vkhoc jungx kaz kuiuz: “Mnoz rueq pulx kantaung kuex tv-ngawk gay toq, yuq muinz kvruex yuq yanx kantaung kuex httungx htawc gay shuex, ngoz tueq Yehowa rueq jungx tueq.

¹⁴Tvphaungc Tvsuip Yehowa Israel Tishox rueq, kvruex miqphvnx lotlaz htauk nuex yanx kantaung kuex tvdaungc shec shuex, tsuingshiq rueq Babelon Hokhvmx Nebukhadnezar muex shuimx kuq shuex ngoz tueq jungx tueq. Vpiq rueq yaruix wawc ngvmx saz htenc rueq doc muinz Nebukhadnezar muex shuimx kuq wuez shuex ngoz tueq Yehowa rueq jungx tueq,” ngoz tueq.

¹⁵Kvruex yimaq ngaz rueq Hanania muex vruex lvmz kuex tvhttoarc jungx tauk, “Hanania lex, tay shuiuz! Yehowa rueq mnoz tvkaz kv-phux rvmuq, mnoz rueq miq htenc muex rot kaq vtueq tvkvmx luimx vshuiux.

¹⁶Kvkhoc rvtueq mnoz rueq Yehowa kuex laulawc tvkoc miq htenc muex jungx toq ningkhvnc nuex vpiq rueq mnoz kuex khawx gay kv-phux. Majuiuc raungwawc max htumx nuex dvyx mnoz thueyc tuiux ngoz tueq Yehowa vpiq pumz maq jungx tueq,” ngoz tauk.

¹⁷Hanania kuex kvruex raungwawc lex mvshix yac nuex thueyc kaz tueq.