Read Tase Naga YEREMIA 39 Bible Online

YEREMIA 39 - Tase Naga bible

YEREMIA 39

¹Yuda hokhvmx Zedekia hoc nuex ngaungc wawc tvkuiuz rac yapix lex rokshiz nuex, Babelon hokhvmx Nebukhadnezar rueq piq nolaungx bix lotlaz maq raz tueq Yerusalem kuex khvt tueq.

²Hokhvmx Zedekia hoc nuex ngaungc tueq wawc rokshiz rac wawc shiz, yapix lex bvlic raungx tvkuiuz raungnuiyq ghaqyungx palx ruk htenc tvbunx httak gay rvhumc tueq.

³(Yerusalem kuex khvt gay tueq nuex, Babelon hokhvmx waz miq vjoz vyungx vlaungx bix lotlaz kuex Vmungx Palx Kaluix nuex miqmac baung lvmz wuez tueq; kvruex hez kuex Nergal Sarezer, Samgar Nebo, Sarsekhim nuiyc vganc Nergal Sarezer rvtueq.)

⁴Hokhvmx Zedekia nuiyc piq nolaungx bix lotlaz rueq kvkhoc yaungx yaq kuex khiz vtueq, tsuinghez kuex kvruex raungwvrx dvyx ghaqyungx kvwawc yuz wvnc tvkoc hunglaungx wuez tueq. Tsuinghez kuex hokhvmx waz sunc nuex kay juing lvmx maq dung kaz wvnc vtueq palx ruk vnueyc tvjuy tueq hvlwvl lvmx maq Yodan Warc nuex yuz wvnc wuez tueq.

⁵Yuq muinz Babelon nolaungx bix rueq tsuinghez kuex yurc vtueq Yerikho ghaq hep tvnx wawc Zedekia kuex lvp gay tueq. Tsuinghez rueq Hamat mungx wawc Ribla ghaqyungx nuex httax yaq Babelon Hokhvmx Nebukhadnezar kox nuex piq kuex shvlx wvnc tueq, kvkaq Nebukhadnezar rueq piq kuex htvp htaz phox tueq.

⁶Piq rueq Ribla ghaq maq Zedekia saz miqwaz sahez kuex Zedekia rueq lawc yaq khaungkac nuex thvt gay tueq, Yuda mungx wawc vyungx vlaungx bix htenc muinz thvt gay tueq.

⁷Kvruex yimaq piq rueq Zedekia muik kuex tv-phuk kuq gay ruiux, Babelon mungx nuex shvlx wvnc tvkoc yanx ruiuz maq buinc tueq.

⁸Kvruex baunglaung, Babelon miq htenc rueq hokhvmx hoc nuiyc mungx miqsaz yuimx htenc kuex jauk gay ruiux, Yerusalem ghaq palx ruk htenc kuex httak gay tueq.

⁹Tvsuip nuex nolaungx yungx waz Nebuzaradan rueq ghaqyungx nuex kvjungx yaq miq htenc nuiyc piq kox nuex yauk tenz vtueq vnyuip miq htenc tauk vdvmz nuex Babelon nuex lvp thuq wvnc tueq.

¹⁰Piq rueq tsak vnyvmx yvmx muinz lvp muq htemc saz jix wvyvmc kuex Yuda mungx nuex tvjungx taq gay shec ruiux, svpiq sunc nuiyc wuik vnax htenc tsuingshiq muex kuq shec tueq.

¹¹Yuq muinz Hokhvmx Nebukhadnezar rueq piq nolaungx yungx waz rvtueq Nebuzaradan muex shuimc vkay kuex kuq vtueq nvr tueq:

¹²“Mnoz rueq Yeremia kuex thuiyx kaz vtueq piq kuex vhvlx waq lawc mawc shuiuz. Piq kuex nauk guirguenz kaz, piq rueq roc yaq phvnx htenc kuex shuimx kuq shuiuz.”

¹³Kvkhoc rvtueq Nebuzaradan kuex piq rulc vdvmz vjoz vyungx vlaungx bix rvtueq Nebushazaban, Nergal Sarezer nuiyc vganc Babelon hokhvmx waz miq vyungx laungx bix lotlaz rueq,

¹⁴ngaz kuex hokhvmx wangx khoktep mungx wawc shvlx kaz ruex. Tsuingshiq rueq ngaz kuex yuimx nuex vhvlx maq httuiuc waungc kuex khic roc jix Shaphan suiuz Ahikam saz Gedalia rueq tvkhup wungx khung nuex shvlx taq kaz phuex. Ngaz kuex kvruex yuq mungx miqsaz rulc vdvmz nuex httax naungx tauk.

¹⁵Ngaz kuex hokhvmx wangx khoktep mungx nuex shuiuz gay rvhumc yaq nuex dvyx, Yehowa rueq jungx phuex,

¹⁶“Mnoz rueq Ethiopi miqsaz Ebedmelek muex, Tvphaungc Tvsuip Yehowa Israel Tishox rueq ngoc, ngaz rueq kungkhux nuex jungx wvnc tauk rulc rv-ngvlc ghaqyungx vruex tvbac gay shaungx, kvruex kuex tvrungx wanx shaungx rvmuq. Kvkaq vruex yaungx wvnc tuex nuex mnoz rueq khic lvp tvkoc kvyuq httax kuiuz.

¹⁷Yuq muinz ngaz, Yehowa rueq mnoz kuex tvkhup wungx phaungx, mnoz kuex mnoz hisungx vtuiux miq hez yauk kvyuq lekuy gay rvhumc tuiux rvmuq.

¹⁸Ngaz rueq mnoz kuex tvguing tvwungx phaungx, mnoz kuex thueyc muq rvtuiux. Mnoz kuex ngaz muex tvluimc kvmx vtuiux ningkhvnc nuex mthuiuzthuic luenx tuiux. Ngaz, Yehowa rueq jungx vphaungx,” ngoz tueq jungx tueq.