Read Tase Naga YEREMIA 52 Bible Online

YEREMIA 52 - Tase Naga bible

YEREMIA 52

¹Zedekia kuex Yuda hokhvmx yaungx tueq nuex vrullungx wawc 21 rvtueq, Yerusalem nuex wawc rokshiz rac wawc shiz guimz lawc tueq. Vnyuiuz muingc kuex Hamutal rvtueq, Libna ghaqyungx wawc Yeremia saz rvtueq.

²Hokhvmx Zedekia kuex Hokhvmx Jehoiakim rueq shuimx tueq ikhoc Yehowa muex mvrax yaq tueq.

³Yehowa kuex Yerusalem nuiyc Yuda miqsaz htenc muex khaq vtueq tsuingshiq kuex vpiq khaungkac wawc yurc gay tueq. Zedekia rueq Babelon Hokhvmx Nebukhadnezar kuex khawx lvlx tueq,

⁴kvkhoc rvtueq Nebukhadnezar nuiyc piq nolaungx bix rueq Zedekia hoc nuex ngaungc wawc tvkuiuz rac yapix lex rokshiz, raungx rokshiz raungnuiyq Yerusalem kuex khvt tueq. Tsuinghez rueq ghaqyungx ke-phic kox nuex jerak tec vtueq kvtuk htenc htuz ruiux, palx ruk tvroz tuimz maq tuimx vtueq,

⁵Zedekia hoc nuex ngaungc wawc rokshiz rac wawc shiz nuex httuiuc laz tuimz tueq.

⁶Kvruex raungwawc yapix lex bvlic raungx tvkuiuz raungnuiyq, kvruex ghaqyungx kvyuq rvmc yunghvlc dung wvnc vtueq miq htenc rueq phuiuz svy juing yvmx muinz vguez shex,

⁷ghaqyungx palx ruk htenc muinz rul wvnc tueq. Babelon miqsaz rueq ghaqyungx kvruex tuimx laq tueq, yuq muinz nolaungx bix lotlaz kuex hokhvmx waz sunc hep wawc palx ruk vnueyc hvlwvl wawc kaluix kvmaq raungwvrx nuex dung kaz wuez vtueq, Yodan Warc tvnx tvtac nuex yuz wvnc tueq.

⁸Yuq muinz Babelon nolaungx bix rueq Hokhvmx Zedekia kuex yurc laq vtueq, Yerikho ghaq hep tvnx wawc lvp gay tueq, piq nolaungx bix lotlaz rueq muinz piq kuex gay shec tueq.

⁹Zedekia kuex Hamat mungx Ribla ghaqyungx nuex httax yaq Hokhvmx Nebukhadnezar kox nuex shvlc lvy rvhumc vtueq, kvruex yuq Nebukhadnezar rueq piq muex htvp htaz kuq tueq.

¹⁰Kvruex Ribla ghaq maq piq rueq lawc yaq nuex Zedekia saz miqwaz sahez kuex piq htumc nuex thvt gay tueq, Yuda mungx wawc vyungx vlaungx bix muinz thvt gay tueq.

¹¹Kvruex yimaq Zedekia muik kuex tv-phuk luc gay ruiux yanx ruiuz maq khvrc vtueq Babelon mungx nuex shvlx wvnc tueq. Zedekia kuex piq thueyc kay raungnuiyq nuex httuiuc laz Babelon mungx khoktep nuex shauk gay tueq.

¹²Babelon Hokhvmx Nebukhadnezar hoc nuex ngaungc wawc rokshiz rac wawc tvkuiuz, yapix lex bv-ngac, raungx rokshiz raungnuiyq, hokhvmx waz muex tharc jungc walaungx nuiyc piq nolaungx yungx waz rvtueq Nebuzaradan kuex Yerusalem nuex nyuip tueq.

¹³Piq rueq Yerusalem wawc Shomc Yuimx, hoc htenc nuiyc vkhek miqsaz yuimx htenc lotlaz kuex jauk gay tueq,

¹⁴piq nolaungx bix rueq ghaqyungx palx ruk htenc kuex httak tvrul gay tueq.

¹⁵Kvruex yimaq Nebuzaradan rueq ghaqyungx nuex kvjungx yaq miq htenc, shuimc nyuiuz rulx htenc nuiyc Babelon mungx nuex kvyenc wvnc jix hez htenc kuex Babelon nuex shvlx wvnc tueq.

¹⁶Yuq muinz piq rueq htemz vrvmz jix miqsaz wvyvmc kuex Yuda mungx nuex tvjungx taq gay shec tueq, tsak vnyvmx lvp muq jix htenc kuex kvruex mungx wawc svpiq sunc htenc nuiyc nax htenc nuex yauk tvshuimc tvkoc taq shec tueq.

¹⁷Babelon miq htenc rueq nvyrvyx htung htenc nuiyc Shomc Yuimx mungx wawc yakuemz htenc, yunghvlc nvyrvyx pankhuix kuex tvhuyx tvhut jek vtueq, nvyrvyx lotlaz kuex Babelon nuex lvmz wvnc tueq.

¹⁸Tsuinghez rueq shomrawx tvsawc nawc shuex nuex shuimc juing tvp tsawk juing panx, wvrkok tochuing htenc, shomc nawk kuq shuex nuex vbuit juing tvguiy htawc juing pantuimz, vhomc vtumc phvnx wvr maq jauk shomc kuy nuex shuimc juing pantuimz htenc nuiyc shomc yuimx mungx nuex nawk palx shuex yuq shuimc juing vganc nvyrvyx nuex seng yaq hup vsvmx htenc lotlaz muinz lvmz wvnc tueq.

¹⁹Tsuinghez rueq kuimshawx kuimphox htenc maq vtvhungx panx htenc nuiyc wvr kuinx htawc juing tuik htenc, shomc nawk kuq shuex wawc vbuit juing tvguiy tvjuiux juing pantuimz htenc, tvp tsawk juing panjamc htenc, wvrkok tochuing htenc, vhomc vtumc tvkoc pantuimz htenc nuiyc svpiq tix shomc kuq shuex nuex shuimc juing pantuimz httax mvhttax htenc muinz lvmz wvnc tueq.

²⁰Hokhvmx Solomon rueq Shomc Yuimx guirc nuex shuimc tvkoc vtvhungx shec htung vnueyc, yakuemz htenc, manx yac rokshiz rac vnueyc rueq pix yaq lihvlc yunghvlc nvyrvyx pankhuix hup vsvmx htenc rvtueq.

²¹Shvmx shishiz htung vnueyc kuex: vshiz nuiyc vshiz vjoz kox nuex meter 8 nuiyc tvroz tuimz nuex meter 5.3 rvtueq. Kvruex kuex wvjuix raz tueq vkawx htvy kuex millimeter 75 rvtueq. Htung vnueyc kvruex htungkhux tvhtung kuex vjoz kox nuex meter 2.2 httax yaq, kvruex tvroz tumz nuex pomegranat thuey htenc maq vtvsvp jak nac htenc httax yaq, kvruex lotlaz kuex nvyrvyx maq tvhungx tueq.

²³Jak nac tvsvp taq tueq htung tek nuex pomegranat thuey poz lotlaz shashiz rvtueq, 96 kuex ghaq maq kvkhic yaq.

²⁴Kvmaq raz tueq, nolaungx yungx waz Nebuzaradan rueq Shomc Wayungx Seraia muinz, piq khung wawc shomc waz Zephania nuiyc vganc vkhek miq shomc yuimx walaungx waz thuimx tauk thuq shvlx wvnc tueq.

²⁵Nolaungx kung shunshvlc jix waz muinz, ghaqyungx nuex kvjungx yaq hokhvmx waz rulc tharc rvjungc jix walaungx mvshix muinz, nolaungx yungx waz htuiz jix waz nolaungx rungx wvlwvlc tvtsuingc jix waz nuiyc vganc vkhek miq waz rok tvruk htenc tauk shvlx wvnc tueq.

²⁶Nebuzaradan rueq kvruex hez htenc kuex Babelon hokhvmx waz httax yaq Hamat mungx Ribla ghaqyungx nuex shvlx wvnc tueq,

²⁷hokhvmx waz rueq tsuingshiq lotlaz kuex wung vtueq soalc thvt gay wuez tueq. Kvkhoc rvtueq Yuda miqsaz kuex tsuingshiq mungtan kvwawc mungx ganc nuex thuq lvy rvhumc tueq.

²⁸Vruex kuex Nebukhadnezar rueq shvlx thuq wvnc tueq miqsaz muingc wvlc rvtueq: piq hokhvmx yaungx tueq wawc mvshix nuex, Yuda miqsaz 3,023;

²⁹wawc rokshiz rac wawc tvjvt nuex miq 832 kuex Yerusalem wawc shvlx wvnc tueq;

³⁰wawc roknueyc rac wawc thuimx nuex, Yuda miqsaz 745 kuex Nebuzaradan rueq shvlx wvnc tueq. Vshvlc wvnc rvhumc tueq miq lotlaz kuex 4,600 rvtueq.

³¹Ewilmerodak kuex Babelon hokhvmx yaungx tueq raungwawc, khoktep wawc tvdungc gay shaungx ngoz tueq, Yuda Hokhvmx Jehoiachin muex menjenc thuinz tvkhic kuq tueq. Vkhoc yaungx wvnc tueq raungwawc kuex Yuda Hokhvmx Jehoiachin khoktep nuex shuiuz rvhumc tueq, wawc rok thuimx rac wawc mvshix, yapix lex nueyc, raungx roknueyc rac raungx bv-ngac raungnuiyq rvtueq.

³²Ewilmerodak rueq piq muex menjenc vtueq piq rulc vdvmz Babelon mungx khoktep nuex httax yaq vganc hokhvmx bix htenc htauk nuex muinz pinhtumc vyungx tvtsanc nganc lvmz kuq tueq.

³³Kvkhoc rvtueq Jehoiachin rueq khoktep khoz vkhvy kuex layc gay ruiux, piq kvjungx yaq rullungx wvlex hokhvmx waz humpanx wawc phauk saq lvp tueq.

³⁴Piq tvraungx yaq wawwawx wvraungx nuiyq tek piq muex rax yaq phvnx kuex khauk khauk phvlx kuq tueq.