Read Tase Naga YONZYEC 3 Bible Online

YONZYEC 3 - Tase Naga bible

YONZYEC 3

¹Ngaz kuex Tishox kox wawc murx gurc aungx yaq lvmz kuex tuiuz jix waz rvtauk.

²Vpiq rueq ngaz kuex pinhtumc nyauk hvlc khurx nuex htawc gay phuex.

³Menjenc thuinz httax muq maq ngaz kuex lauk wvruip ruip thvt yaq.

⁴Vpiq rueq ngvy ngvmx kuex tvraungx tsuik tsuik rap gay ruiux, ngvy ruk vrawz htenc kuex tvbunx gay tueq.

⁵Vpiq rueq ngaz kuex tvkuilc tvdaz nuiyc rvwvlc kuilc daz maq khvrc gay phuex.

⁶Vpiq rueq ngaz kuex kungkhux nuex thueyc wvnc tueq hez ikhoc raungnyauk mungx nuex tvhttax phuex.

⁷Vpiq rueq ngaz kuex yanx ruiuz htenc maq khvrc gay phuex; ngaz kuex khoktep miq vshiz ikhoc dungc wvnc juing lvmx tvluimc juing vguez.

⁸Ngaz muex romc kuy tvkoc ramc tauk, yuq muinz Tishox rueq tay muq;

⁹Ngaz khuemx wvnc tauk baung ruip saz nuex tuingshaung gay ningkhvnc nuex; ngaz khuemx wvnc koq tueq rullez ngaklez yaungx tauk.

¹⁰Vpiq rueq ngvy phamc tvkoc jvp- bawx rueq ikhoc bvmc yaq; hangsic rueq ikhoc ngvy htauk nuex phamx gay phuex.

¹¹Vpiq rueq ngaz kuex lvmx phic wawc yurc lvp vtueq, tv-phuinz tv-phux puinz ruiux, ngaz kuex taq gay shec phuex.

¹²Vpiq rueq laq kuex lvmz vtueq ngaz kuex vpiq laqsvnz gap juing sawk pharc muex tv-yaungc phuex.

¹³Vpiq rueq ngvy shauk pumz nuex laqsvnz htenc maq tvlvt tv-phot gap gay shuex.

¹⁴Miq htenc rueq muinz ngaz kuex nuiyq tuimc nueykuic phuex; ngaz kuex tsuingshiq lotlaz rueq shummarc juing muex yaungx vtaungx.

¹⁵Vpiq rueq ngaz muex kuq phuex nuingc phuiuz svy juing lotlaz nuex kuilc daz juing tataz rvtueq.

¹⁶Vpiq rueq ngvy htvlx kuex ghaq nuex hut ruiux, ngvy wac kuex lung rauk htauk nuex tv-ngawk tawk kuq gay phuex.

¹⁷Ngaz rueq gvnhttuingc, nomic, nuiyc vlenc vlauk ngoz yaq kuex yvmx wuez raz tvnx lauk gay tauk.

¹⁸Ngaz kuex rullungx vluz httax lvp taungx rvmuq; Yehowa muex tvluimc muinz vhtumx shex.

¹⁹Ngaz ithuiuz isac nuiyc ngaz yuimx guez wuik guez rvwvlc vtaungx kuex khuip hvlc vyangx rvtueq;

²⁰Ngaz rueq kvruex lvmx kuex mkaq muinz rvwvl tvmaung vtueq ngvy siyac kuex thuinbac yaq.

²¹Yuq muinz kvruex wawc phvnx shiz kuex ngaz rueq rvwvl lvp vtueq tvluimc juing lvp yek tauk:

²²Yehowa nuex htumx muq maqmuq lungwawc nuiyc menjenc thuinz kuex raungnvp raungwuic ikhoc hvlx vtueq,

²³shalx dung wvnc yaq ikhoc vsuingc suing phaungx ngaungx yaq.

²⁴Ngaz rueq lvp tauk lotlaz kuex Yehowa rvtueq, kvkhoc rvtueq vpiq muex ngaz rueq tvluimc vshaungx.

²⁵Yehowa rueq vpiq muex tvluimc jix miq pumz tek muex vhvlx lvmz tvkhic yaq,

²⁶Kvkhoc rvtueq naungshiq palc wvnc tvkoc vpiq kuex thuinz vluz maq bvmc shix kuex naungshiq tvkoc vhvlx pinhtumc rvtueq.

²⁷Naungshiq yalxrox pat nuex vruex thuinz vluz lvmz tvluingc wvnc kuex vhvlx pinhtumc rvtueq.

²⁸Naungshiq kuilc daz rvhumc tix nuex, naungshiq vshiz lauk lauk suinglix maq nanx vtueq ngaungc chuing rvtueq;

²⁹Tvluimc juing vhttax shauk doc ningkhvnc nuex, naungshiq kvjungc vtueq ghaq nuex bumx aungx yaq.

³⁰Wungthvt vtueq yomnamc ruiux muinz, naungshiq rueq kvruex lotlaz kuex rvhumc aungx yaq.

³¹Taungjix kuex menjenc vhttax waz rvtueq, naungshiq kuex pattup tvdux gay phuex rvmuq.

³²Vpiq rueq naungshiq muex vyonz yec juing tvhttuiuc kuq phuex, yuq muinz naungshiq tvkoc vpiq lungwawc thuinz kuex vsuing hungc httax yaq.

³³Vpiq rueq naungshiq kuex vyonz vyec juing nuiyc vthuiuz vsac tvyaungc tvkoc raungc raq yaq rvmuq.

³⁴Naungshiq siyac htenc khoktep nuex shuiuz rvhumc vtueq tvbunx gay shuex nuex Taungjix rueq tuiuz yaq;

³⁵Vpiq rueq kuq yaq lvp aungx yaq htenc naungshiq rueq tvlvlc gay vshix kuex vpiq rueq tuiuz yaq;

³⁶Tvrac rungx maq khac phoc tvyaq yaq kuex vpiq rueq tuiuz yaq.

³⁷Taungjix thuinroc htauk maq dvyx yvmx yuq muinz tvyaungx lot shuex.

³⁸Vhvlx nuiyc vbac muinz vpiq rueq nvr shuex rulc rv-ngvlc yaungx wvnc yaq.

³⁹Naungshiq mvrax yaq gay ningkhvnc nuex naungshiq rueq murx gurx vshix rvyruiux, yvmx ngoz lac kvbot nyvnx jungc aungx yaq nguinx?

⁴⁰Naungshiq rueq phvnx vshix lvmx kuex helc roalc wuez ix, Yehowa kox nuex kvroz wvnc yek ix.

⁴¹Raungmungx nuex httax yaq Tishox kox nuex naungshiq thuinz vmungx htenc kuex daz vtueq vjux thoz ix;

⁴²“O Yehowa lex, nuiyshiq rueq mvrax yaq gay tiq nuiyc khawx gay tiq, nuiyshiq mvrax htenc kuex mnoz rueq dawc kuq gay phux rvmuq.

⁴³“Mnoz rueq nuiyshiq kuex yurc vtueq thvt gay phux; mmenjenc thuinz kuex mthuinz khvy maq puingc gay toq,

⁴⁴Nuiyshiq vjux thoz bomc kuex mnoz kox nuex duic waungc tvkoc phuemx htvy kaz.

⁴⁵Mnoz rueq nuiyshiq kuex mung -kawx suingkez namx yauk muex tvyaungc gay phux.

⁴⁶“Nuiyshiq kuex ralx htenc lotlaz rueq shummarc nueykuic kuex rvhumc vtix.

⁴⁷Naungshiq kuex kuilc daz jamjaux nuiyc vbac tac wvnc maq dvyx shex lvy wvnc vtix; naungshiq kuex kvhiz kvyaz nuiyc vhiz vsungx maq dvyx httax vtix.

⁴⁸Ngvy miqsaz htenc batac wvnc ningkhvnc nuex yuix ruilx htenc kaz yaq ikhoc muik phic yvlx yaq.

⁴⁹“Ngvy muik phic kuex yuix saz ruilx ikhoc thauk muq maq kaz yaq kuex

⁵⁰Yehowa rueq raungmungx maq lawc vtueq naungshiq kuex khiz phuex nuex httuiuc laz rvtueq.

⁵¹Vruex ghaqyungx wawc yalxjuik rulx htenc nuex yaungx wvnc tueq kuex ngaz rueq khiz vtueq ngvy thuinz vmungx nuex yonz vtaungx.

⁵²“Ngaz kuex shuiuc pac juing yvmx muinz vguez rvhvt maq ralx hez rueq ngaz kuex wushawx ikhoc bix tsvnc rvhumc vtaungx.

⁵³Tsuinghez rueq ngaz kuex ghaq khurx mungx nuex vtvraungx tuip gay vtueq lung maq puingc gay phuex.

⁵⁴Ngvy htauk nuex yuix rueq luimz wvnc phuex tueq, vthueyc kuex vnyek shex ngoz tueq ngaz rueq tvmaung tauk.

⁵⁵“O Yehowa lex, ngaz rueq mnoz kuex ghaqkhurx maq guyc ramc vphaungx,

⁵⁶Ngaz rueq guyc ramc vphaungx kuex mnoz rueq tay kuy tvkoc thoz phaungx tueq, mnoz rueq tay kuq phux.

⁵⁷Mnoz rueq ngaz muex ngoc nauk hiz kaz ngoz tueq tvralc jungx kuq phux.

⁵⁸“Taungjix lex, ngaz kuex palc wvnc muex mnoz httuiuc kaz vtueq ngvy rullungx kuex palc wvnc phux.

⁵⁹Ngvy khawc lvlc vyaq yauk shuimc kuex mnoz rueq tuiuz vtueq; ngvy tvkoc vlvmz phox kuq phux.

⁶⁰Ngvy ralx hez rueq ngaz kuex mtanc lac shuiuc pac yaq nuiyc tsuinghez rueq ngaz mkhoc lac dvnc yaq nguinx kuex mnoz rueq tuiuz yaq.

⁶¹“O Yehowa lex, tsuinghez rueq ngaz shummarc yaq kuex mnoz rueq tay toq; tsuinghez rueq dvnc yaq lotlaz muinz mnoz rueq tuiuz yaq.

⁶²Tsuinghez rueq nuiyq tuimc ngvy lvmz kuex jungx saq vtueq tsuinghez kvmungx htenc kuex tvhungx wuez yaq.

⁶³Tsuinghez rueq ngaz kuex raungnvp maq raungx tvyac laz shummarc wuez yaq.

⁶⁴“O Yehowa lex, tsuinghez rueq shuimx wvnc tueq rulc rv-ngvlc tsuinghez muex murx tvgurc shuiuz;

⁶⁵Tsuinghez kuex httonx tvmx vtueq tsuingthuinz tvhtumx gay shuiuz!

⁶⁶Tsuinghez kuex khuyx vtueq ghaq htauk vwawc tvmaq gay shuiuz!”