Read Tase Naga YONZYEC 5 Bible Online

YONZYEC 5 - Tase Naga bible

YONZYEC 5

¹O Yehowa lex, nuiyshiq nuex yvmx lac yaungx yaq nguinx kuex rvwvl shuiuz. Nuiyshiq kuex lawc vtueq, nuiyshiq tvyvlc sac yaq kuex khiz kuq koq.

²Nuiyshiq tsak vnyvmx kuex juiuc httuingx wuinz waz yauk nuex nyuip woz vtueq; pungnuk miqsaz muinz nuiyshiq yuimx htenc nuex httax yaq.

³Nuiyshiq muex vwaz tamx kuex ralx rueq thvt gay wuez tueq, majuiuc nuiyshiq muex vnyuiuz tamx kuex mvntix nyuiuz muex yaungx wuez yaq.

⁴Nuiyshiq rueq nuingc juing yuix kuex vhtawz kuy juing shex; nuiyshiq muex rax yaq janx kuex vrez raz tueq jauk vshix.

⁵Loze rvmuq ngoz ruiux kamel htenc ikhoc tvyuz tvbaz yurc gay rvhumc vtix, nuiyshiq hunnyex vtix, yuq muinz nyec tvkuiyq lvp miq.

⁶Nuiyshiq rueq miqmac tvraungx lvp tvkoc phuiuz svy kuex hungx laz lvp tvkoc, Ejip mungx nuiyc Asiria mungx wawc thoz kaz vtix.

⁷Nuiyshiq jix vwaz tamx rueq mvrax yaq wvnc tueq, yuq muinz majuiuc tsuingshiq kuex vguez shex, nuiyshiq kuex tsuingshiq mvrax ningkhvnc nuex kuilc daz rvhumc vtix.

⁸Nuiyshiq kuex dax hez htauk nuex jvnc vtueq vbac miqsaz rueq guimz lawc rvhumc vtix, vshiz raung rueq muinz tsuingshiq luimc kawc wawc nuiyshiq kuex daungc wvnc lot muq.

⁹Miq thvy gay jix hez kuex mungtan shuk vnoz nuex kvroz khuemx wuez yaq; nuiyshiq rueq phuiuz vsvy kuex thuiuzthuic maq khvmc vtueq thuiyx wuez vshix.

¹⁰Rvmc thuiuz rueq nuiyshiq tvthuiuz sac vtueq nuiyshiq khuix htenc kuex wvrkez ikhoc khamc gay yaq.

¹¹Nuiyshiq juik nyuiuz tamx kuex Zion Kanx htauk nuex yom- namc gay rvhumc wuez yaq; Yuda mungx ghaqtek nuex httax yaq nuiyshiq saz yalxjuik sahez muinz laungc maq woalc naungc rvhumc wuez tueq.

¹²Nuiyshiq vyungx vlaungx bix kuex shvlx laq vtueq tvshuirc pauk gay tueq; nuiyshiq walaungx bix kuex tvtsanc nganc rvhumc yaq rvmuq.

¹³Nuiyshiq yalxrox bix kuex dax ikhoc tsvmz htuiuz wuez yaq; miqwaz sahez muinz janx mvrx liq kuex ruiklez roplez gurx.

¹⁴Rullungx nyuiuz waz rulx kuex ghaqyungx palx kaluix nuex mkaq muinz ngaungc kaz muq shex, yalxrox bix rueq vtuimc vtvlc raungluingx muinz vguez shex.

¹⁵Vkokez juing kuex nuiyshiq rullungx nuex htumx kaz shex; vyonz vyec juing rueq nuiyshiq wvnuemc nvyc juing nuex nyuip lvp wvnc tueq.

¹⁶Nuiyshiq kvsomc parc juing yvmx muinz vguez shex. Nuiyshiq rueq mvrax yaq ning- khvnc nuex, majuiuc vkhoc rvhumc vtix.

¹⁷Nuiyshiq thuinz vmungx bac rvhumc vtix muik phic kvjumx ningkhvnc nuex sawc riric kvkhic lot muq,

¹⁸Zion Kanx kuex miq vguez ghaq kuiyq ghaqkhvmx ningkhvnc nuex, yaruix guyhex htenc kuex bac wvnc tueq baung kvyuq khuemx shamx wuez yaq,

¹⁹Yuq muinz, O Yehowa lex, mnoz kuex pattup hokhvmx rvtoq, vkhing htumx wvnc nuex httuiuc laz guimz lawc shuiux.

²⁰Mnoz rueq yvmx ngoz tueq lac nuiyshiq kuex kvtanc khvnc httvmx laz gay shec tonx? Mnoz rueq nuiyshiq kuex rvwvl yek phux haz?

²¹Yehowa lex, nuiyshiq kuex mnoz kox nuex tvyez shvlx wvnc yek koq! Nuiyshiq kuex tvyez shvlx wvnc yek koq! Mvnnuex wawc nuiyshiq ngauz vngax kuex yez kuq koq.

²²Rvmuq ngoz ruiux, nuiyshiq kuex pattup pat-sac tuip gay shex lac? Mthuinz khvy kuex tvshiz gay jauz vguez shex haz?