Read Tase Naga EZEKIEL 11 Bible Online

EZEKIEL 11 - Tase Naga bible

EZEKIEL 11

¹Tishox siyac rueq ngaz kuex tenz wvnc vtueq Shomc Yuimx shaldungc kox palx kaluix nuex shvlx wvnc phuex. Kvkaq palx kaluix hep nuex miqwaz rulx rok nueyc rac waz bv-ngac httax yaq kuex ngaz rueq khiz tauk; tsuinghez nuex vphvnx walaungx rvtueq Azur saz Jaazania nuiyc Benaia saz Pelatia muinz lomx yaq kuex ngaz rueq khiz tauk.

²Tishox rueq ngaz muex, “Vthueyc rvyaq miq waz lex, vruex ghaqyungx vyuq vbac kvmungx kuy jix layx bac jix hez kuex vruex hez vruex rvtueq.

³Tsuinghez rueq, ‘Nuiyshiq rueq mtanc httax muq nuex yuimx htenc kuex guirc lvp shix. Vruex ghaqyungx kuex ngvmx luimc juing tuik rulc rv-ngvlc yaq nuiyshiq kuex kvruex tuik mungx wawc ngvmx ikhoc yaungx vtix, yuq muinz kvruex tuik rueq nuiyshiq kuex wvr wawc tvwungx kuq yaq,’ ngoz tueq jungx wuez tueq.

⁴Majuiuc kuex vthueyc rvyaq miq waz lex, tsuingshiq kuex yomnamc gay shuiuz,” ngoz tueq jungx phuex.

⁵Yehowa siyac kuex ngvy htauk nuex httuiuc kaz vtueq miq htenc muex vruex bomjungc kuex jungphvnc tvkoc ngaz muex nvr phuex: “Israel miqsaz lex, nuimshiq rueq yvmx lac jungx vshuinx nuiyc yvmx lac kvmungx vshuinx kuex ngaz rueq tuiuz yaq.

⁶Nuimshiq rueq ghaqyungx vyuq miq paunghvlc thvt tueq yauk shuimc shuimx tuit ningkhvnc nuex lvmx htenc nuex miq maungx htenc mvrc yaq.

⁷“Kvkhoc rvtueq vruex kuex ngaz, Johvlc Yehowa rueq nuimshiq muex jungx vphaungx rvtueq. Vruex ghaqyungx kuex vsuing vshungc vlumc juing tuik rvtueq, yuq muinz ngvmx kuex yvmx khoc phvnx lac? Kvruex kuex nuimshiq rueq thvt gay tuit miq maungx htenc rvtueq! Nuimshiq kuex vruex yuq httax lvp tuinx rvmuq, ngaz rueq nuimshiq kuex vruex ghaqyungx vwawc yurc gay phaungx!

⁸Nuimshiq kuex yaung muex hiz tuinx haz? Ngaz rueq nuimshiq kuex thvy gay tvkoc yaung shuimc jix hez tvkaz shaungx.

⁹Ngaz rueq nuimshiq kuex vruex ghaqyungx vwawc yurc gay vtueq pungnuk miqsaz yauk nuex lekuq gay phaungx. Ngaz rueq nuimshiq kuex vthueyc vmvy murx tvgurc phaungx shex,

¹⁰nuimshiq kuex nuimshiq mungtan mungx nuex rv-khvt tuex kvyuq thvt gay kv-phuinx. Kvkaq ngaz Yehowa rvtauk kuex miq ruip rawx rueq tuiuz wvnc wuez shuex.

¹¹Tuik rueq kvruex mungx wawc ngvmx kuex tvwungx yaq ikhoc vruex ghaqyungx rueq nuimshiq kuex tvwungx kv-phuinx rvmuq. Ngaz rueq Israel mungtan baung ruip nuex httax vtuinx nuimshiq muex murx tvgurc phaungx.

¹²Ngaz Yehowa rvtauk lvmz muinz, yuimx phic yuimx phaungx wuinz mungtan htenc tvrac kuex phvnx vtueq ngvy tvrac htenc, ngaz rueq nvr shaungx htenc tvlvlc vshuinx kvmuinz nuimshiq rueq tuiuz wvnc wuez shuinx,” ngoz tueq ngaz muex jungx phuex.

¹³Ngaz rawshvmx waung yaq nuex, Benaia saz Pelatia kuex thueyc kaz tueq. Ngaz kuex ngvy htvlx ghaq nuex bumx vtueq, “Johvlc Yehowa lex! Mnoz rueq Israel mungx nuex kvjungx yaq miq pumz tek vtueq thvy gay haz dvnc vshuiux?” ngoz tueq ramc tauk.

¹⁴Yehowa kuex ngaz rulc rvbomc phuex.

¹⁵Vpiq rueq, “Vthueyc rvyaq miq lex, Yerusalem nuex httax jix hez kuex mnoz nuiyc vthuq vruez wvnc mkungjix Israel miqsaz htenc nuex seng vtueq rvjungc phvnc wuez yaq. Tsuingshiq rueq, ‘Vthuq wvnc rvhumc jix hez kuex Yehowa muex nawk palx tvkoc yalc hvlc shex. Vpiq rueq vruex ghaq vraungx kuex naungshiq muex kuq phuex,’ ngoz tueq jungx wuez yaq.

¹⁶“Nuimshiq kuex lvmx luz wawc pungnuk phvnx rulc vdvmz httaz tvkoc tvkaz vtueq mungganc htenc nuex tvpanc nyanc gay tauk yuq muinz vhtox vlox maq tsuingshiq httax yaq baung nuex tsuingshiq rulc vdvmz ngaz httax taungx.

¹⁷“Kvkhoc rvtueq ngaz, Johvlc Yehowa rueq jungx vshaungx kvjaz kuex tsuingshiq muex jungx shuiuz. Ngaz rueq tsuingshiq tvpanc nyanc gay tauk mungtan htenc kvwawc tvtuimx vtueq Israel mungtan kuex tsuingshiq muex yez kuq yek shaungx.

¹⁸Tsuingshiq yek waung tueq nuex, tsuingshiq rueq vlvp vshuy vshac miqsuirc vsac yac yuimx htenc lotlaz kuex tsuingshiq rueq tuip gay wuez shuex.

¹⁹Ngaz rueq tsuingshiq muex thuinz vmungx vnyalx nuiyc thuinz vnyalx kuex kuq shaungx. Ngaz rueq tsuingshiq tsanc hvlc lung thuinz vmungx kuex lvmz gay ruiux, tay phvnx yaq thuinz vmungx kuex htawc kuq shaungx.

²⁰Kvruex yimaq tsuingshiq rueq ngvy tvrac htenc kuex phvnx tvhungx shuex. Ngaz rueq vnvr bomc lotlaz kuex tvmtuing maq phvnx phuex. Tsuingshiq kuex ngvy miqsaz, ngaz kuex tsuingshiq Tishox muex yaungx taungx.

²¹Yuq muinz vshuy vshac miqsuirc vsac yac yuimx htenc nawk palx lungwawx yaq jix htenc kuex ngaz rueq murx tvgurc shaungx. Tsuingshiq rueq shuimx wvnc tueq kuex tv-phvnc tsuingshiq muex murx tvgurc shaungx,” ngoz tueq, Johvlc Yehowa rueq jungx yaq.

²²Kherubim hez baz phaungc wvnc ruiux yuq, tsuinghez rulc vdvmz renc huk htenc kaz wvnc naungx yaq. Israel Tishox phelez ngauz ngax muinz tsuinghez htauk nuex rvtueq.

²³Kvruex yimaq phelez yaq kuex kvruex ghaqyungx kvwawc dung kaz vtueq shaldungc kox kanx nuex kvhttot kaz tueq.

²⁴Romzyac tvkhic maq Tishox siyac rueq ngaz kuex pix wvnc vtueq Babelon mungx nuex vthuq wvnc hez kox nuex ngaz kuex shvlx wvnc yek phuex. Kvruex yimaq romzyac tvkhic kuex moz wvnc tueq,

²⁵kvkaq ngaz kuex Yehowa rueq tvkhic phuex phvnx ruip saz kuex vthuq vruez wvnc hez muex jungphvnx tauk.